1 Kufumung kang ne ni bɔk aYakubu, asam Adakunom ne asam aTisa aYeso Kristi.

Imi tsin jɛk iko sak ni icɛn kusɔk abe afaa bafi izɔrɔk baYahuda*, yɔng fɛ́ ba se sharatat ni mben zizɛɛt.

Show yin!

2 Ábaruneng, nye yin iyɛ ikan, ngma izen fi i nyim yin ne kaakyi kuri imara, 3 nek iyin rēn yin fok imara inɔɔk atsak yin, bang saas akabɔk yin rasak, 4 nek anɔng, wosong yin akabɔk yin na a ya kashon nɔng i da sot yin gbagba, nɔng i da shining yin na kaakyɛ abak vit ikyɛng fi ibit yin. 5 Ke akak ayɛt yin bit kutsitsɛng kutsik, won na a ra awon na Adakunom nɔng a da ku nɔk. Nek Adakunom nesek kaangan ikyɛng fɛ́ a ra awon ni wu dang tsɛsɛk inɛn, a da ku nɔɔk. 6 Awɛt izen fɛ́ anet tsin tsɛt ikyɛng, won na a nɔɔk atsak vit inye digit, nek ngma ayɔng fɛ́ a nye digit, a se tɛ kudúng ashi, fi kuwun fesem aze na aza. 7 Anet tɛ ayɔng bi di tɛ a da kyem a sɛ ikikak ni bɔk aTisa awo; 8 ayet anet fɛ́ a bɛ kuyiring asa afaa, a kyem a nyeseng ni ikyɛng izining awo.

9 Won aruneng fɛ́ a yet akan, na a tsot kugwɔm nek Adakunom mi ku nɔk iratek. 10 Won arum ba na tsot kugwɔm fok Adakunom mi tun ito ice ni wu, nek iwu tsin gosok tɛ agam. 11 Nek kunom ya gbɛrɛy, ku wat ku koot agam e, ne ato me kpas, ni kusas e wat ku gang. Kpaf anɔng fɛ́ arum bi ka na gang ayit kutsɛt wu.

12 Adakunom da te awɛng na anet fɛ́ a te gbinding ni izen imara, nek ama fɛ́ a ya awɛng naton imara me, a bi sɛ izang kutset vit igang fɛ́ Adakunom kin fɛ̀ a bi nɔɔk bayɔng fɛ́ ba kushim.

13 Ngma ayɔng fi imara ku bɛ́, anet e bi fɛ̀ ye, <<Adakunom di ki mara awo.>> Nek Adakunom nye akak anyas, ke na mara akak awo. 14 Kaangan ses imara, nek ikɔk kuyiring wu, ni ku ku kɔk ma ku ku sak a ra iduk ikyɛng. 15 Ama fi ikɔk e mi shining, ni i ma tes inɛn. Ama fi inɛn e mi rasak, ni i ma bɛ́ ni iku.

16 Ábaruneng, ba bi ki bɔrɔk yin awo. 17 Kaakyi kunang kutek ni kugyat, ku nes azanɛn, ku nes narɔ Ada fɛ́ a nye mgbey, ayɔng fɛ́ da a shesheng nse tɛ nawu fɛ́ na serese awo. 18 A ki nɔɔk yit kutset nek inɔɔk atsak yit ni ifɛ̀ wu, a sak in sot yit bafi imɛsɛng, ayɛt nzam nkyɔrɔk fi iwu nye.

19 Ábaruneng fi in ka ba shim makiyi, wes yin ato ni ikyɛng deng: Kaangan na a sot afi ifoos ziri ziri, a bi sot afi cɛɛt ni ibeseng iyɛ ziri ziri awo, 20 nek ibeseng iyɛ anet awe bes ni kusot kutek fɛ́ Adakunom shim awo. 21 Nek anɔng, won yin iras nggɔn imaan e, ne kaakyi kuri ntomong anyas. Ayɛt kameneng iyɛ, shan yin ifɛ̀ fɛ́ ba mi tuus ayɛt in, fi i da kyem i ki sheshek yin.

22 Da i bi wɔrɔk yin ace yin awo, ni foos yin ifɛ̀ Adakunom kyɛk awo, ikyɛng ira yet, sot yin bafi ira me. 23 Nek ngma ayɔng fɛ́ a foos ifɛ̀ me kyɛk vit inye me, a se kpaf tɛ anet fɛ́ a yɛrɛ ice wu na amadubi, 24 ama fɛ́ a gang iyere me, na tseng, na ma te burum nse ayisi wu. 25 Awɛt ngma anet fɛ́ a nɔɔk nhwyɛ wu ni imɛɛs ntsi ntek, ntsi ntek fi in bes ni ibisik, ne ya kashon i nye nɔng, da a sot anet ifoos e kyɛk na nye burum awo, kɛ a sot afi i inyes e, ba da ku te itek naton ngma ikyɛng fɛ́ a se ni ira me.

26 Ngma anet fɛ́ a di fok iwu se ni kusot fɛ́ Adakunom shim, awɛt da a kyem ayit kanu wu awo, a tsin wɔrɔk ice wu kyɛk, irēn ikuus Adakunom wu yet ifɛ́ abap. 27 Kuri ikuus fɛ́ Ada Adakunom shan yet iyɔng fi i se vit karìk, ke ikyɛng icɛɛt ayi, iyɔng fɛ́ ba di gbingding bakumung nɛ nakpin ayɛt izot na, ni iyisik kurɔm vit imoon ice ayɛt ikyɛng fi i da ki beseng yit azatse kang.