1 Ábaruneng, iyin fi i tsin ya yin kashon ni ikuus azɔk yit aTisa aYeso Kristi, i bi tonoso yin ishim ice awo. 2 Won nfɛ yit, anet akak bɛ narɔ inyim yin, a mi te itsɔm bɔk ifi itsɔm nɛ ares atek makiyi, na akan akak fɛ́ a te agyɛt ares bɛ́ a nɔ ba. 3 Ki i tonong yin ishim ice sak na ayɔng fɛ́ a te ares itsɔm ni fɛ̀ yin ni wu, <<Karɔ isonong karatek ka yet kafɔɔn,>> ni ma fɛ̀ yin na akan e, <<Ngɔn tsi nyeseng aza>> ke ni fɛ̀ yin ni wu, <<Sonong aze aben bakat na atak hom.>> 4 Ki ira yin anɔng, a sot i mi tonong yin ishim ice yɔng awɛ, i mi tsɛɛt yin ishɔt ifɛ́ aduk kuyiring yɔng awɛ?

5 Wes yin ato, bacɛk iyɛ na baruneng hom! Adakunom mi kasa bakan azatse na ba sot barum ni inɔɔk atsak, iba ba fɛ̀ ba bi ya kurúm ni igwɔm Adakunom tɛ fɛ́ a kin fɛ̀ a bi nɔɔk bayɔng fɛ́ ba kushim awɛ? 6 Ngma na anɔng, iyin byɛs yin bakan. Ayet barum e ba ba ki mɔɔt yin awɛ? Iba ba ba ki kɔk yin sak na atu ishɔt awɛ? 7 Ayet iba ba ba cɛɛt ncɛɛt ibyes naton iyerek itek ifɛ́ aYeso awɛ? Ayet ni iyerek aYeso de fɛ́ ba ki yes yin mo awɛ?

8 I da se gyat ki in nye yit ikyɛng fi i se ni ijɛk ni Ntsi Adakunom yɛ, <<Shim afidang isot ngɔn ti ice ngɔn.>> 9 Awɛt ki itonoso yin ishim ice nate yin, i nye yin inɛn, ama anɔng ba mi ki ya yin ni ishɔt tɛ bayɔng fɛ́ ba dun ntsi. 10 Nek ngma ayɔng fɛ́ a kyem a nye ntsi ngma, ama dun ni nzining kyɛk, a mi dun ni ishɛrɛp e ngma kusum. 11 Nek ayɔng fɛ́ a fɛ̀ ye, <<I bi ra kujang awo,>> ke na fɛ̀, <<I bi fɛt anet awo.>> Ki da ngɔn ra kujang awo tit ifɛt anet kyɛk, ngɔn mi sot afi idun ntsi.

12 Nek anɔng, ayɛt icɛɛt ni ntomong yin, rēn yin fok ba bi ki ra yin ishɔt ni ntsi. Ntsi me nang bi ki bisik yin washak. 13 Nek anet fɛ́ a se dang angmishish, ba bi ku ra ishɔt vit angmishish. Nek anet fɛ́ a bɛ angmishish, a fok inyim ishɔt Adakunom awo.

14 Ábaruneng, igyat e yet akyɛ ke anet nye fok iwu bi inɔɔk atsak, wat vit kutomong fɛ́ a di ki tonong ɛ? Inɔɔk atsak kuri iyɔng da kyem i ku sheshek ɛ? 15 Won in fɛ̀ yit aruneng ke anganeng akak ayi se vit ares ite ke nayak iya ayi. 16 Kɛ akak ayɛt yin fɛ̀ ni wu, <<Tsi tik kyang, Adakunom da te mɔɔ ni ihwya,>> vit ikyɛng fɛ́ a nye naton kudaam wu fɛ́ ba di, akyi ikyɛng itek dɔng a nye yɔng ɛ? 17 Kpaf anɔng, inɔɔk atsak fi i se vit kutomong fi ku da tonong, yet kukom e.

18 Akak da kyem a fɛ̀, <<Ngɔn bɛ inɔɔk atsak, Imi ras ntomong ntek.>> Di tonong inɔɔk atsak ngɔn vit kutomong, imi da ka tonong inɔɔk atsak hom ayɛt kutomong fi in ras. 19 Ngɔn nesek atsak fok Adakunom yet azining. I se gyat anɔng! Itseng ma i nesek atsak ni itiim irɔm.

20 Kushɔp kukak! Ngɔn shim fok ma ba da tonong ikikak fi i da di, nɔng i da ni i rēn fok inɔɔk atsak vit kutomong yet abap ɛ? 21 ADakunom kin fɛ̀ adakop yit aIbrahim se tabat na yisi wu, nek nggɔn ntek wu fɛ́ a kin di nabak ari wu aIshaku ni kuta ashosh awɛ? 22 Kɔ di yin, fi inɔɔk atsak wu ni ikyɛng fɛ́ a nye in ra kutomong ngma na, inɔɔk atsak se ishining ni kutomong fɛ́ a ra. 23 Nek anɔng wu fi ifɛ̀ Adakunom di se ishining yɛ, <<AIbrahim nɔɔk atsak na Adakunom, na anɔng wu fɛ́ Adakunom fɛ̀ a se tabat na yisi wu,>> a tɛ a ku yes mo afidang Adakunom. 24 Kɔ di yin, anet se tabat ashon Adakunom nek ikyɛng fɛ́ ras, da nek inɔɔk atsak kyɛk aziye awo.

25 Kpaf anɔng wu, fi inyak agwɔm aRahab kin se tabat, ama fɛ́ a kin nɔɔk batom baYahuda karɔ ifɔɔn ari wu, a tɛ a ka ba tsa ni irèn iduk awɛ? 26 Tɛ anet fɛ́ a se dang kabik ni rɔm wu yet kukom e, kpaf anɔng, inɔɔk atsak fi i se dang ntomong yet kukom e.