1 Chila munhu yokunda kota Yesu ndo Kilistu Mlohozi, ayo ndo mwana wa Nguluwi. Chila yomgana mhaza kangumgana na mwanage kahi. 2 Ahi ndo vyotulinguvizela kota twanguwagana wana wa Nguluwi, kwa kumgana Nguluwi na kuhulichiza mizilo ja heye, 3 mina kumgana Nguluwi ndo kuwinza mizilo ja heye, mizilo ja heye hajiwele itunyo, 4 mina chila yawele mwana wa Nguluwi koweza kuisumya isi. Natwe twanguisumya isi kwa makundo ga hetwe. 5 Whaani, lelo, yoweza kuisumya isi? Ndo yula yalingukunda kota Yesu ndo Mwana wa Nguluwi.

6 Yesu Kilistu ndo yezile kwa mazi ga ubatizo wa heye na kwa danda ya kubagama kwa heye. Hezile kwa mazi hela, ila kwa mazi na kwa danda. Naye Muhe Yelile kangutawiza kota ndo kukomya kwa vila Muhe ndo kukomya. 7 Lelo, wabaho walolezi wadatu, 8 Muhe wa Nguluwi na mazi na danda. Awa wadatu wangikundiza. 9 Twangukunda ulolezi wa wanhu, ila ulolezi wa Nguluwi una mong'ho ng'hatu na awu ndo ulolezi yaulavile Nguluwi kwa chiwalo cha mwanage. 10 Yalingumkunda Mwana wa Nguluwi kanawo ulolezi awo mgati mwa heye ila yawele yohambe yamkunde Nguluwi kangumdita heye yawe mdesi, mina haukundile ulolezi yaulavile Nguluwi kwa chiwalo cha Mwanage. 11 Ulolezi ndo awu, Nguluwi nakatupa ukomu wa mazuwa gose ne kuduma na ukomu awo ndo wa kuli mwanage. 12 Yoneche yalingumkunda Mwana wa Nguluwi kanawo ukomu awo, yula yohambe yamkunde Mwana wa Nguluwi, kahela ukomu.

13 Ndanguwandichila leka muwe mvizela kota mwanawo ukomu wa mazuwa gose ne kuduma hemwe mlingulikunda itagwa lya Mwana wa Nguluwi. 14 Natwe hatulingudumba hali Nguluwi, kwa vila twangukunda kota hotumlanda choneche kota vyoyogana heye, kotuhulichiza. 15 Heye katuhulichizaga chila hotumlanda na kwa vila tuvizela ng'hatu kota katuhulichizaga chila hotumlanda, kahi tuvizela kota kotupa chila chotulingumlanda.

16 Munhu hoyomona mng'holoze kadita wihe wohambe umuhiliche kuli kubagama, kanguganigwa kumlandila kwa Nguluwi, naye Nguluwi komha ukomu. Ndangulonga mbuli ayi kwa chiwalo cha wala waditile gehile, hagawele ga kubagama. Ila wabaho wihe ulingumigala munhu kuli kubagama, nani silonga kota mwanguganigwa kumlanda Nguluwi kwa chiwalo cha mbuli ayo. 17 Chila munhu yalingudita gohambe gamnojeze Nguluwi ndo gehile, ila hana gehile hambe gamhiliche munhu kuli kubagama.

18 Tuvizela kota chila yawele mwana wa Nguluwi halingudita gehile, kwa vila Mwana wa Nguluwi kangumwamila goya na yula Mwihe howeza kumdoliza. 19 Tuvizela kota hetwe twa wana wa heye Nguluwi hanga isi yeng'ha yangulongozwa na yula Mwihe. 20 Tuvizela kahi kota Mwana wa Nguluwi koya, nakatugalila uwanzi leka tumzele Nguluwi wa kukomya, tikale mgati mwa Nguluwi wa kukomya kuli kilumba na Mwanage, Yesu Kilistu. Ayu ndo Nguluwi wa kukomya na ndo ukomu wa mazuwa gose ne kuduma.

21 Hemwe wanangu, miyuse kuli kufugamila jimalukolo.