1 Heni sekulu, ndangukwandichila hegwe mamo, uhaguligwe na Nguluwi hamwe na wana wa hegwe ndilinguwagana kuli kukomya. Haiwele heni ndiliyeng'ha ndilinguwagana, ila wala weng'ha walingukuzela kula kukomya, wanguwagana, 2 kwa vila kukomya kwangikala mgati mwa hetwe na wolutilila kuwa baho mazuwa gose. 3 Ndanguwalandila kunoga kwa Nguluwi na isungu na kikala goya zilingulawa kwa Nguluwi Mhaza na kwa Yesu Kilistu, Mwana wa Mhaza, ziwe hamwe na hetwe kuli kukomya na igano.

4 Nasangalala ng'hatu kona kota wamwe wa wana wa hegwe, wangikala kuli kukomya kota Mhaza vyoyatulajize. 5 Lelo, ndangukwandichila hegwe Mamo, tweng'ha tulingumkunda Kilistu tigane. Kulanda aku hakuwele mzilo unyale, ila ndo mzilo wuwula wotuwele nawo kulawa mwaluko. 6 Ali ndo igano, kikala kwa kuhulichiza mzilo wa Nguluwi. Mnzilo womuhuliche kulawa katali ndo awu, mwanguganigwa mweng'ha kikala kuli igano.

7 Wahadi wenji wenela kuli isi yeng'ha, wanhu wawele hambe wakunde kota Yesu Kilistu koya kwa hetwe, yawele na lukuli lwa munhu. Munhu yalingulonga ago ka mng'honyo wa Kilistu. 8 Lelo, milolele hemwe leka mleche kwajiliza chila chomchigongomanyile mijito, ila mpegwe chonolo cha hemwe chenele.

9 Munhu yoneche yawele hambe yebatilile kuli malanguso ga Kilistu, ila yalingubelenuka, kahela Nguluwi. Ila yalingikala kuli malanguso ago kanaye Mhaza na Mwana. 10 Lelo, wone munhu yoye kwa hemwe ne kuwagalilani malanguso ago, mleche kumbochela hakaye henu ne kumlamsa. 11 Mina yalingumlamsa munhu ayo, kangihanza naye kuli madito ga heye gehile.

12 Kwa vila ndanazo mbuli nyinji za kuwalonjelani, ila siviganile kudita ahyo kwa kwandika, ila ndangitumbila kuwajendelani na kulonga na hemwe tuchilola leka kusangalala kwa hetwe kwenele. 13 Wana wa kalumbu wa hegwe yahaguligwe na Nguluwi wangukulamsa. *