1 Heni nda sekulu, ndangukwandichila hegwe mng'holozangu Gayo, yondikuganile ng'hatu kuli kukomya. 2 Mng'holozangu, ndangukuganila chila mbuli inojile na ndangukuganila uwe mkomu mlukuli kota vyouwele ukomu wa hegwe wa chimuhe. 3 Nasangalala lukami, wang'holozangu wamwe lowafichile ahano, nakundonjela heni vila hegwe vyoulinguhulichiza kukomya na vyoulingulutilila kikala kuli kukomya. 4 Kuduhu chinhu chilingusangalaza ng'hatu kota kuhulika wana wa heni wangikala kuli kukomya.

5 Mng'holozangu ndikuganile, hegwe ndo wakukundigwa kuli chila mijito joukola kwa wang'holozo, hanga ndo wawe wajenzi. 6 Wang'holozetu awo wachilonjela chilundo cha wanhu walingumkunda Kilistu aha kwa mbuli ya igano lya hegwe. Dedede, uwatanze vila ilingumnojeza Nguluwi leka walutilile na majendo gawo. 7 Mina wangwaluka majendo ga hewo kuli uchitumagwa wa Kilistu ne kubochela utanzi woneche kulawa kwa wanhu wohambe wamkunde Kilistu. 8 Lelo, hetwe twanguganigwa kuwatanza wanhu awa, leka natwe tudahe kilumba kuli mijito ja hewo kwa chiwalo cha kukomya.

9 Nanyandika baluwa kwa chilundo cha wanhu walingumkunda Kilistu, ila Diotelefe yawele yogana kuwa chilongozi wa hewo, halingugana ng'hatu kunyhulichiza. 10 Lelo, hondikuya ndoziwika hazelu mbuli zeng'ha zoyalingudita na ulonzi wihile woyalingutulavila na udesi woyalingulonga kwa hetwe. Naye kangulema kuwabochela awo wang'holoze wawele mmajendo na kahi kanguwalemeza wanhu wanji walingugana kuwabochela na kangujeza kuwawinga mli chilundo cha wanhu walingumkunda Kilistu.

11 Mng'holozangu, uleche kuwinza ulajilo wihile, ila unojile. Chila yalingudita ganojile ndo wa Nguluwi, ila yalingudita mbuli zihile, hanamzela Nguluwi. 12 Chila munhu kangumtogola Demetiliyo, ena, kukomya kuko kwangutawiza mbuli ya heye. Natwe kahi twangulavya ulolezi wa hetwe kwa heye, nagwe kwanguvizela kota chotulonga ndo twangukomya.

13 Ndanazo mbuli nyinji za kukulonjela, ila silinguvigana kwandika kuli baluwa ayi. 14 Ndangutumbila kukona mazuwa mado hela na baho todogola goloko.

15 Ndangukuganila wikale goya. Wagoloko wa hegwe wangukulamsa. Walamse wagoloko wa hetwe chila yumwe.