1 Heni nda Yuda, chitumagwa wa Yesu Kilistu na mng'holoze Yakubu, ndanguwandichilani hemwe mchemigwe na Nguluwi na muwelengikala kuli igano lya Nguluwi Mhaza, na kwamilwa na Yesu Kilistu.

2 Ndangukuganilani isungu na kikala goya na igano kulawa kwa Nguluwi viwe na hemwe.

3 Wang'holozangu, nandali na majesa ga kuwandichilani kwa chiwalo cha wula ulohozi wotuwele hamwe, ila yanguganigwa ndiwandichile mlutilile na ibamba kwa chiwalo cha makundo gala Nguluwi yawapele wanhu wa heye kamwe hela kwa mhela weng'ha. 4 Mina wanhu wohawamzelele Nguluwi wapegwa kiyinjiza kwa uviso hali hetwe, wanhu wawele, kwa chiwalo cha kupegwa lufufu kulawa kuli ukomu wa hewo wihile, wagalusa usenga wa isungu lya Nguluwi wa hetwe na kumbeza Yesu Kilistu yawele yaliyeng'ha Chilongozi na Mkulu wa hetwe. Ila, Maandiko Matakatifu nagalonga kulawa katali, utaguso ulinguwabeta wanhu awo.

5 Lelo ndangugana kuwakumbusani, hanga aga namina mlonjelwa ulonzi awu, mkumbuche vila Bwana navyoyawalohole wanhu wa Isilaeli na kuwalavya kuli isi ya Misili, ila hamba nakawadumya wala nawowali hambe wakunde. 6 Mkumbuchile wala wahilisi wa kilanga nawaganile wawe na ukulu kusinda nawowawele nawo, ahyo, nawaleka honhu hawo howaganigwe kikala. Nguluwi nakawawika honhu hawele na jiza na kuwawoha kwa minyololo mazuwa gose leka watagusigwe zuwa yila ng'hulu. 7 Mkumbuche kahi Sodoma na Gomola kahi na miji ja hafungo hake, wenyeng'haye wa aho nawadita kota wala wahilisi wa kilanga, nawadita ung'hondwa na kiditila mbuli mlukuli zilingulemezwa, nawapegwa utaguso wa chiluli mazuwa gose ne kuduma, leka iwe ikanyo kwa wanhu weng'ha.

8 Ahyo ndo vyowawele wanhu awa. Kulota kwa hewo kwanguwalongoza kuli kuziditila wavu ng'huli za hewo wawo, nakubeza ludali lwa Nguluwi na kuviliga vilumbigwe vikulu vya kilanga. 9 Naye Mikaeli, yumwe wa wahilisi wakulu wa kilanga, nahaditile ahyo. Kwa kula kitwanza hali heye na Limazoga kwa chiwalo cha lukuli lwa Musa, Mikaeli nahajezile kulitagusa Limazoga kwa maligo, ila nakalonga, "Mkulu yuye nayakunghanuchile!" 10 Ila wanhu awa wanguliga choneche chohawachizelele, wosumigwa kwa mbuli zizila zowazizelele kwa vihendo vyao, kota vyojivizelele migongolo jiwele hela luhala. 11 Mane wawo! Wanhu awo wawinza vihendo vivila vya Kaini. Kwa chiwalo cha sendi, weyinjiza kuli nongwa yiyila ya Balaamu. Wabelenhuka kota Kola vyoyabelenhuche na wasumigwa kota heye vyoyasumigwe. 12 Kwa iyowe lyawo lilihela nyhala na kwa kiganilila wawo, wanhu awo ndo walinguwaditila vibi mnvina ya hemwe yomlingudita kwa igano. Wafanda kota ng'hungugu iwele hela nhonya ilingwezuligwa na mbeho. Hewo wafanda kota migodi jilagaze mahamba johambe jilele mafuza, jibagame ng'hatu, jing'humbuligwe. 13 Wanhu awo wafanda kota nhigu ng'hulu ya bahali na madito ga hewo ga soni gangoneka kota ifulo. Hewo wafanda kota nhondwe ziwele ngulubaluba ziwele ziwichilwa mazuwa gose honhu ha jiza ng'hulu.

14 Naye Henoki, yawele ndo sekulu wa saba kulawa Adamu, nakalagula ahi kwa wanhu awo, "Muhulichize! Mkulu kokuya hamwe na wahilisi wa kilanga wa heye welile wenji wohambe wawazigwe, 15 kuwatagusa wanhu weng'ha na kuwagaza weng'ha wohambe wamnojeze Nguluwi kwa chiwalo cha madito ga hewo geng'ha gehile gowaditile ne kumdumba Nguluwi na kwa chiwalo cha ulonzi weng'ha wihile ula wanhu wehile nawamlijile!"

16 Wanhu awa ndo wawele ngung'ung'uta mazuwa gose na kupala nongwa za wanji na kuwatogola wanhu wanji ng'hatu kwa chiwalo cha kupegwa vinhu.

17 Ila hemwe moloko, mkumbuchile gala gomlonjelwe aho katali na watumigwa wa Mkulu wa hetwe Yesu Kilistu. 18 Nawawalonjelani, "Mazuwa ga kuduma, wolawila wanhu walinguwinza maya ga wanhu wohambe wamdumbe Nguluwi, nawo, wowaseka hemwe kota wapoka." 19 Awo wanhu wehile ndo wawele nguwambuza hemwe mibagule, wanhu wa maya ga isi, wawele hela Muhe wa Nguluwi. 20 Ila hemwe, ndilinguwaganani heni, mizenje mwemwe kuli makundo ga hemwe ganojile ng'hatu. Mlande kwa ludali lwa Muhe Yelile 21 na kupona kuli igano lya Nguluwi, mumbeteza Mkulu wa hetwe Yesu Kilistu yawele na isungu lya heye, kowagalalilani ukomu wa mazuwa gose ne kuduma.

22 Muwonele isungu wanhu wawele na lunhwinhwi, 23 Muwalohole kwa kuwanyasula kulawa mchiluli. Ila kwa wanji muwe na isungu hamwe na kilolela, mzudila mbaka na nguwo za hewo za maya gehile.

24 Kwa heye yadahile kuwemilila hemwe mleche kugwa kuli gehile na kuwegala hemwe kwa usangalalo mbaka kumwando kwa ukulu wa heye. 25 Kwa heye yawele yaliyeng'ha Nguluwi, Mlohozi wa hetwe, uwe ukulu na kuzeleka ng'hatu na ludali na mong'ho kukolela Yesu Kilistu Mkulu wa hetwe, kulawa mazuwa gose na sambi na mbaka mazuwa gose galinguya! Ena.