1 Awu ndo ugubulo yaulavile Yesu Kilistu, yapegwe na Nguluwi leka yawalajile vitumagwa wa heye mbuli ilingulapa kulawa habehi. Kilistu nakamlajiza mhilisi wa kilanga yamlonjele chitumagwa wa heye Yohana mbuli ayo. 2 Naye Yohani nakasimila geng'ha goyawene, gawele ndo ulonzi wa Nguluwi na vinhu vyeng'ha Yesu Kilistu vyoyalonjile na kudita. 3 Kabweda heye munhu yawele ngusoma chitabu achi chiwele na usenga wa chiuloli na wabweda hewo wawelenguhulika na kuhulichiza gandichigwe mchitabu achi, mina mhela wa mbuli ayi wahabehi.

4 Heni Yohana ndanguwandichila vilundo saba vya wanhu walingumkunda Kilistu viwele mkowa wa Asiya. Ndanguwaganilani isungu lya Nguluwi na kikala goya kulawa kwa heye yawele baho na yalinguya, kulawa kwa muhe saba wawele hali chigoda cha heye cha undewa 5 na kulawa kwa Yesu Kilistu, mlolezi wa kukundigwa, wa mwaluko kuzilipuligwa kulawa kuli kubagama, yawele chilongozi wa wandewa wa isi. Heye kangutugana na kwa danda ya heye ibohoche mumsalaba, katudita twilejehe kulawa kuli gehile ga hetwe, 6 nakatudita hetwe tuwe undewa wa watambika, tumditile mijito Nguluwi, Mhaza wa heye. Kwa heye Yesu Kilistu gawe ukulu na ludali, mazuwa gose! Ena.

7 Mwela yoo! Kanguya na ng'hungugu! Chila munhu komona, na wala wamhomile. Nhanzi zeng'ha muisi zolombocheza kwa chiwalo cha heye. Ahi ndo vyoiwa, Ena.

8 "Heni nda mwaluko na kuduma kwa chila chinhu," Kangulonga Mkulu Nguluwi Yawele na Ludali, nayawele baho yawele aha na yalinguya.

9 Heni nda Yohana, mng'holozenu, kwa nzila ya kilumba na Yesu, nda hamwe na hemwe kuli kugazigwa kuli undewa wa heye na kwimilila ng'hatu. Heni nanyilikwa kuli chihilwa chiwelenguchemigwa Patimo kwa chiwalo cha kudamla ulonzi wa Nguluwi na kula kukomya koyagubule Yesu. 10 Lelo, kuli zuwa lya Mkulu, namemezwa na Muhe Yelile, nanyulika kumbele kwa heni lizi ling'angala kota lizi lya mhalamhanda. 11 Alyo lizi nalilonga, "Wandiche kuli chitabu gala gouwele ngugona, uchihiliche kuli vilundo saba vya wanhu walingumkunda Kilistu, yani Efeso na Simulina na Peligamoni na Suatila na Salide na Filadelifiya na Laudikeya."

12 Lelo, nanyinduka ndimone ayo yalonjile na heni, nambona vinhu saba vya zahabu vya kuwichila chenje 13 na hagati ha vinhu saba vya zahabu vya kuwichila chenje nakwali na yumwe yafandile kota Mwana wa munhu, naye nayali yavalile ikanzu lilefu na isali lya zahabu mmhambaga. 14 Mnvili za heye nazali nzelu chweya kota sufi, kota seluji na meho ga heye nagali kota ilapi lya chenje, 15 magulu ga heye nagali kota shaba ihovujigwe kuli mfuo wa chiluli na lizi lya heye lyali kota lizi lya kubogoma kwa mazi. 16 Kuli moko wa heye wa kudilo nayali yebate nhondwe saba na kumlomo kwa heye nakulawa ipanga liwele na ukali unoligwe kweng'ha kwili. Chihanga cha heye naching'hala ng'hatu kota isanya lya nemisi.

17 Lelo, vyondimuwene hela, nanyigwa hali magulu ga heye kota mtufi. Ila heye nakawika moko wa heye wa kudilo mchanya mwa heni, nakalonga, "Uleche kudumba! Heni ndo wa mwaluko na wa kuduma. 18 Heni ndo yuye yawele mkomu! Nandali mbagame, ila, ulole, sambi ndamkomu mazuwa gose. Ndanalo ludali lwa kubagama na kuli isi ya wabagame. 19 Lelo, sambi wandiche mbuli ayi youiwene, mbuli iwelengulawila sambi na gala golawila hamba. 20 Uviso wa nhondwe zila saba zouziwene kuli moko wa heni wa kudilo na uviso wa vila vinhu saba vya zahabu vya kuwichila chenje ndo awu. Zila nhondwe saba ndo wahilisi wa kilanga wa vilundo vya wanhu walingumkunda Kilistu na vila vinhu saba vya zahabu vya kuwichila chenje, ndo vilundo saba vya wanhu walingumkunda Kilistu.