1 Hamba nambona igongolo limwe lilawa kuli bahali, liwele na vitwi saba na mbalati kumi, nachila mbalati nayali na chipembelo. Itagwa lya kumliga Nguluwi nalyandichigwa kuli chila mutwi. 2 Lila igongolo ndiliwene nalyali lifandile kota iduma, magulu gake nagali kota magulu ga idubu na mlomo wa heye nawali kota mlomo wa isimba. Lila izoka nalimha lila igongolo mong'ho wake na chigoda cha heye cha undewa na ludali lwinji. 3 Mutwi umwe wa alyo igongolo nawoneka kota nawali ulumizwe lukami, ila chilonda acho nachali chiponile. Wanhu wa isi yeng'ha nawabubuwazwa na igongolo lila na kuliwinza. 4 Wanhu weng'ha nawalifugamila alila izoka kwa vila nalimha alila igongolo ludali lwake. Hewo nawalifugamila alila igongolo, wolonga, "Whaani yewhanile na igongolo alino? Kahi whaani yoweza kitowa nalyo?"

5 Alila igongolo nalikundizwa kulonga ulonzi wa kidaya na wa kumliga Nguluwi. Nakapegwa ludali lwa kudita mijito ja heye, mihela makumi gane na meli. 6 Lelo, nakaluka kumliga Nguluwi na kuliliga itagwa lya heye na kuliga honhu hoyalingikala Nguluwi na wala weng'ha walingikala kilanga. 7 Igongolo ling'ang'ale nalikundizwa kitowa ngondo na kuwasumya wanhu wa Nguluwi. Nakapegwa ludali kwa chiwalo cha wanhu wa chila isi na chila nhanzi na lukolo na ndonga. 8 Wanhu weng'ha wawele ngikala muisi womfugamila, ila wala hela wawele matagwa ga hewo nagandichigwa kuli chitabu cha ukomu cha Mwanaing'holo yakopoligwe kulawa mwaluko wa isi.

9 "Yawele na makutu ga kuhulika, nayahuliche!

10 Yaganigwe kibatigwa kuli ngondo, kobatigwa kuli ngondo.

Wa kukopoligwa kwa ipanga, naye kokopoligwa kwa ipanga.

Ayi ndo nyhemo kwa wanhu wa Nguluwi wawe na kwimilila na makundo."

11 Hamba, nambona igongolo linji, likwina kulawa kuli isi, nalyo nalyali na mbalati mbili kota za mwanaing'holo, nalilonga kota izoka. 12 Nalyo nalyali na ludali lweng'ha lwa lila igongolo lya mwaluko. Naliditila mijito ludali alo kumwando kwa alyo igongolo, naliikola lupichi isi yeng'ha na weng'ha wawele mumo, walifugamile lila igongolo lya mwaluko, yawele na ng'hovu ya chila chilonda cha kubagama chiponile. 13 Lelo, ali igongolo lya keli nalilajila vinduzanduza vikulu, mbaka kudita chiluli kudulika kulawa kilanga uye mchanya mwa isi kumwando kwa wanhu weng'ha. 14 Nalyo naliwahada wala walingikala muisi kwa vinduzanduza avyo vyoyapegwe kudita hali alyo igongolo lya mwaluko. Igongolo alyo, naliwalonjela walingikala muisi, wagomanjize limalukolo kwa kulitogola lila igongolo naliwele lilumizwe vibi, ila naliwa likomu kahi. 15 Nalipegwa kujela ukomu kuli lila limalukolo lya igongolo lya mwaluko na lila limalukolo lya igongolo lilonje na kuwakopola wanhu weng'ha wohambe wafugamile limalukolo lya igongolo. 16 Naliwadita weng'ha, wadodo na wakulu na wawele na lufufu kwa wazunwa na welejehe kwa wapogozi, wawichigwe ulajilo kuli moko wa hewo wa kudilo ama kuli vihanga vya hewo. 17 Kahi nalilemeza munhu yoneche yaleche kugula wala kuguza chinhu, ila yawele na ulajilo awo, uwele ndo itagwa lya igongolo lila ama namba ya itagwa lya heye.

18 Aha ndo hawele na luhala lulinguganigwa. Heye yawele na nyhala kangutang'ula winji wa igongolo alyo, mina ndo winji wa chiwunhu na namba yake ndo miya sita na makumi sita na sita (666).