1 Mwanaing'holo loyabenile ihota lya saba, nakwali tulu kilanga kwa mhela wa nusu saa. 2 Nani nandiwona wahilisi wa kilanga saba walingwima kumwando kwa Nguluwi, nawo nawapegwa mhalamhanda saba.

3 Mhilisi wa kilanga yunji nakeza, nakema kumwando mwa honhu ha kulavila nhambiko yawele na chifunyizi cha zahabu. Naye nakapegwa ubani winji yaulavye ndolendole hamwe na kulanda kwa wanhu wa Nguluwi weng'ha mchanya mwa honhu ha kulavila nhambiko ha zahabu, iwele kumwando kwa chigoda cha undewa. 4 Iyosi lya ula ubani naukwina kilanga kwa Nguluwi hamwe na kulanda kwa wanhu wa Nguluwi kulawa mmoko mwa wahilisi wa kilanga walingwima kumwando kwa Nguluwi. 5 Hamba, mhilisi wa kilanga nakahola chifunyizi chichila, nakachimemeza makala ga chiluli kulawa kuli honhu ha kulavila nhambiko, nakachitoza kuli isi. Nakulawila lizi na lumwemwesa na limachinyina.

6 Hamba, wala wahilisi wa kilanga saba wawele na mhalamhanda saba nawewika goya leka wapembe. 7 Mhilisi wa mwaluko nakapemba mhalamhanda. Nakulawila na nhonya ya maganga na chiluli vibatane na danda, navitozwa mchanya mwa isi. Imwe ya kadatu ya isi naisomigwa na imwe ya kadatu ya migodi naisomigwa na mahamba madeche geng'ha nagalakala. 8 Hamba mhilisi wa kilanga wa keli nakapemba mhalamhanda. Chinhu chifandile kota chidunda chikulu chilingwaka chiluli, nachitajigwa kuli bahali. Imwe ya kadatu ya bahali nayali danda, 9 imwe ya kadatu ya vilumbigwe vinji naviwele mbahali na viwele na ukomu navibagama na imwe ya kadatu ya mitumbwi mikulu nachiwifigwa.

10 Hamba, mhilisi wa kilanga wa kadatu nakapemba mhalamhanda. Nhondwe ng'hulu nailagala kulawa kilanga, ikwaka kota chenje, nakugwila kuli imwe ya kadatu ya nzanda na mli nzasa za mazi. 11 Nhondwe ayo naichemigwa usungu. Lelo, imwe ya kadatu ya gala mazi gawa ga usungu na wanhu wenji nawabagama kwa mazi ago, kwa vila nagajelwa usungu.

12 Hamba, mhilisi wa kilanga wa kane nakapemba mhalamhanda. Isanya na nyelezi na nhondwe navitowigwa na kwajiliza imwe ya kadatu ya kulavya lumuli. Imwe ya kadatu ya nemisi nahaiwele na lumuli lwa isanya. Imwe ya kadatu ya nechilo nahaiwele na lumuli lwa nyelezi na nhondwe. 13 Hamba, nambona na kuhulika ikungule limwe liguluka mchanya ng'hatu kilanga, lilonga kwa lizi ng'hulu, "Wogaya, wogaya, wogaya wawo, walingikala mchanya mwa isi! Mhela wahilisi wa kilanga wadatu waponile howopemba mhalamhanda zawo!"