1 Hamba, namhegwa idenje liwele kota ng'hweku ya kupimila, nandonjelwa, "Winuche ukapime ng'handa ya Nguluwi na honhu ha kulavila nhambiko ha kufunyizila ubani na kuwawaliza wanhu walingufugama mng'handa ya Nguluwi. 2 Ila uleche luga luwele kunze kwa ng'handa ya Nguluwi uleche kupima vihengo vya kunze, mina awo wapegwa wanhu wa isi zinji, wawele nguubiga mji welile kwa mhela wa myezi makumi gane na meli. 3 Nani ndowalajiza walolezi wa heni weli leka walavye usenga kulawa kwa Nguluwi kwa mhela wa mazuwa elufu imwe na miya mbili na makumi sita (1,260), wawele wavalile migunila."

4 Awo walolezi weli ndo kiwhana na migodi mili ja mizeituni na vinhu vili vya kuwichila chenje viwele ngwima hali Mkulu wa isi. 5 Ila munhu wone yajeze kuwadumya, chiluli cholawa kumlomo kwa hewo wawo na kuwadumya wehile wa hewo na chila munhu yojeza kudumya, kobagama kota ahyo. 6 Vitumagwa wa Nguluwi wana ludali lwa kudinya kilanga, nhonya ileche kutowa mhela howolavya uloli. Kahi wana ludali lwa kugagalamla mazi gawe danda na kuitowa isi na chila mbuli za kudumya kwa chila mhela howogana wawo.

7 Ila howosinda kulavya ulolezi awo, igongolo ling'ang'ale lilingulawa mlikulubila, lyochitowa na hewo na kuwakopola. 8 Mitufi ja hewo jopona kuli nzila za muji ukulu nawoyagazigwe Mkulu wa hewo. Itagwa lya muji awo lyanguchemigwa Sodoma ama Misili. 9 Wanhu weng'ha na chila isi na nhanzi na ndonga na lukolo na lanji wolola mitufi ajo kwa mhela wa zuwa zidatu na nusu na howokundiza zitiligwe mchilaga. 10 Wanhu wawele ngikala muisi wosechelela kubagama kwa hewo weli. Wodita mvina na kihilichila ndolendole, mina waloli awa weli nawali wawagazile lukami wanhu wa isi. 11 Logamalile mazuwa gala gadatu na nusu, muhe wa ukomu kulawa kwa Nguluwi nauwenjila, nawo nawema, wanhu weng'ha wawawene nawadumba lukami. 12 Hamba, awo waloli weli nawahulika lizi ling'angala kulawa kilanga iwalonjela, "Mkwine mbaka kuno." Nawo nawakwina kuchanya kilanga kuli ng'hungugu, aku wang'honyo wa hewo wowalola. 13 Mhela wuwo, nakulawila limachinyina likulu lya isi na imwe ya kumi ya muji naigwa. Wanhu elufu saba (7,000) nawabagama kwa limachinyina lila. Wanhu waponile nawadumba ng'hatu na kumtogola Nguluwi wa kilanga.

14 Aku kugaya kwa keli kupuluta, ila kugaya kwa kadatu kwanguya himahima.

15 Muhilisi wa kilanga wa saba nakapemba mhalamhanda ya heye. Lizi ling'angala naihulikwa kilanga ilonga, "Undewa wa isi sambi uwa undewa wa Mkulu Nguluwi wa hetwe na Kilistu Mlohozi, naye kolongoza mazuwa gose!" 16 Hamba, wala wasekulu makumi meli na gane, wawele ngikalisa kuli vigoda vya undewa, hala hoyawele Nguluwi nawagwa chifunama, nawamfugamila Nguluwi, 17 wone walonje,

"Twanguta malumbo hegwe Mkulu Nguluwi Uwele na Ludali,

uwele bahano na ulinguya!

Mina kwa ludali lwa hegwe lukulu,

kwangwaluka kulongoza.

18 Wanhu wa isi zeng'ha nawali wazudile,

ila kuzudila kwa hegwe kuya,

ena mhela wa kuwatagusa wabagame.

Wuwo ndo mhela wa kuwalolela vitumagwa wa hegwe wawele ndo waloli,

na wanhu wa hegwe weng'ha welile walingulitogola itagwa lya hegwe,

wakulu kwa wadodo.

Kahi ndo mhela wa kuwadumya weng'ha walinguidumya isi."

19 Hamba ng'handa ya Nguluwi iwele kilanga naigubuligwa na isanduku lya heye lya ilagano nalyoneka mli ng'handa ya Nguluwi. Nakulawila lumwemwesa na lizi na limlungu na limachinyina na nhonya ng'hulu ya maganga.