1 Hamba nambona ulajilo wunji ukulu na wa kububuwaza kilanga, nakwali aho wahilisi wa kilanga saba wawele na nongwa saba za kuduma, kwa nongwa azo saba, kuzudila kwa Nguluwi nakwenela.

2 Hamba, nambona chinhu kota ulajilo wa bahali ya chilolelo ihanzigwe hamwe na chiluli. Hafungo ha ayo bahali nandiwona wanhu walisumile lila igongolo na limalukolo na namba ya itagwa lya heye. Mmoko mwao nawali webate ving'weleng'wele vyowapegwe na Nguluwi. 3 Nawali wokwimba lwimbo lwa Musa chitumagwa wa Nguluwi na lwimbo lwa Mwanaing'holo, wolonga,

"Mkulu Nguluwi Yawele na Ludali,

madito ga hegwe ndo makulu na ga kububuwaza ng'hatu!

Hegwe mndewa wa isi zeng'ha,

nzila za hegwe zitanganika na za kukomya.

4 Mkulu, ndo whaani yohambe yakudumbe hegwe?

Whaani yohambe yalitogole itagwa lya hegwe?

Hegwe uliyeng'ha ndo welile.

Wanhu wa isi zeng'ha wokuyila na kukufugamila,

mina madito ga hegwe ganojile goneka."

5 Logapulute ago, nambona, ng'handa ya Nguluwi igubuligwe kilanga na mgati mwake nambona ihema lya ulolezi wakuwabaho Nguluwi. 6 Lelo, wala wahilisi wa kilanga saba, wawele na nongwa saba, nawalawa amo mng'handa ya Nguluwi, wavalizwe nguwo za kitani zinojile ziwele zing'halile na wawopigwe mmhambaga mwa hewo misali ja zahabu. 7 Yumwe wa vila vilumbigwe wane wawele na ukomu, nakawapa wala wahilisi wa kilanga saba visaye saba vya zahabu vimemile kuzudila kwa Nguluwi, yalingikala mazuwa gose. 8 Ng'handa ya Nguluwi naimemezwa iyosi lilingulawila kuli ukulu na ludali lwa Nguluwi na hapawele na munhu yadahile kwinjila mng'handa ya Nguluwi mbaka kuduma kwa nongwa saba za wala wahilisi wa kilanga saba.