1 Logakwete ago, nanyhulika lizi kota lizi ng'hulu ya ikugusi lya wanhu wenji kilanga wolonga, "Yatogoligwe Nguluwi! Ugombozi na ukulu na mong'ho vyeng'ha ndo vya heye Nguluwi wa hetwe! 2 Mina utaguso wa heye ndo utanganika na wa kukomya. Kamtagusa yula mng'hondwa, mkulu nayawele yayajilize isi kwa ung'hondwa wa heye. Nakamgaza kwa chiwalo cha kuwakopola vitumagwa wa heye!" 3 Nawalonga lwa keli, "Yatogoligwe Nguluwi! Iyosi lya chiluli chilingulakaza muji awo wokwina kilanga mazuwa gose!" 4 Wala wasekulu makumi meli na wane na vila vilumbigwe vikomu vine, navifunama, nawamfugamila Nguluwi yekalise mchanya mwa chigoda cha undewa, wolonga, "Ena! Yatogoligwe Nguluwi!"

5 Hamba lizi nailawa kuli chila chigoda cha undewa, ilonga, "Mtogoleni Nguluwi hemwe vitumagwa wa heye weng'ha, hemwe mlingumdumba, wadodo kwa wakulu." 6 Hamba nanyhulika lizi kota lizi ya ikugusi likulu lya wanhu na lizi lya mazi menji galingubogoma ng'hatu, ilonga, "Yatogoligwe Nguluwi! Kwa vila Mkulu Nguluwi wa hetwe Yawele na Ludali kangulongoza! 7 Tusangalale na kutowa luchenze, tumtogole! Kwa vila mhela wa mnvina ya kuhesa kwa Mwanaing'holo uya, na mdala yalinguhesigwa kewika goya. 8 Naye nakakundizwa, kuvalizwa nguwo ya kitani inojile, ilingung'hala!" Nguwo ayo ya kitani linojile ndo madito ganojile ga wanhu wa Nguluwi.

9 Naye mhilisi nakandonjela, "Wandiche aga, ‘Wabweda wala walalichigwe kuli mnvina ya kuhesa ya Mwanaing'holo!’ " Kahi nakandonjela, "Awu ndo ulonzi wa kukomya wa Nguluwi." 10 Lelo, heni nhanyigwa hali magulu ga heye, nangana ndimfugamile. Ila heye kandonjela, "Leka! Heni nda chitumagwa hela kota hegwe na wang'holozo, tweng'ha twangumdamla Yesu. Ila mfugamile Nguluwi! Mina kukomya kugubuligwe na Yesu ndo ulinguwalangazila waloli."

11 Hamba, nambona kilanga kugubuligwe, ako nakwali Falasi yumwe mzelu, naye yamkwinile, nayali yochemigwa Wakitumbila na Yatanganiche. Ndikomya, naye ndo kangutagusa na kitowa kwa chiwalo cha mbuli zigoloche. 12 Meho ga heye ndo kota ilapi lya chiluli na mchanya mwa mutwi wa heye namwali na vipembelo vinji. Naye kana itagwa lyandichigwe, kuduhu munhu yoneche yavizelele ila heye yuye. 13 Nayali yavalizwe nguwo nazilwechigwe mli danda, itagwa lya heye lyanguchemigwa "Ulonzi wa Nguluwi." 14 Wamizi wa kilanga nawamuwinza wawele wakwinile falasi wazelu na wavalile nguwo za kitani nzelu chweya. 15 Ipanga linoleche lyangulawa mumlomo mwake leka yawatowe wanhu wa isi zeng'ha. Naye kowadima kwa ng'hweku ya chuma na kuikama divai kuli honhu ha kukamila ha kuzudila kwa Nguluwi Yawele na Ludali. 16 Naye kana itagwa lyandikwa kuli nguwo ya heye na mihaza lyake, "Mndewa wa wandewa na Mkulu wa wakulu."

17 Hamba, nandimona mhilisi wa kilanga yumwe yemile hali isanya. Nakalila kwa lizi ng'hulu, yovilonjela videje vyeng'ha vidodo vilinguguluka kilanga, "Muye! Mting'hane kwa mnvina ya Nguluwi iwele ng'hulu, 18 leka mulye miwunde ja wandewa na wakulu wa wamizi na miwunde ja wanhu wawele na mong'ho na miwunde ja falasi na ja wanhu wakwinafalasi na miwunde ja wanhu weng'ha, welejehe na wapogozi, wadodo kwa wakulu."

19 Hamba, nandilyona alila igongolo hamwe na mndewa wa isi na mwamizi wa hewo wekungazije hamwe leka wetowe ngondo na yula yonayali yekalise mchanya mwa falasi hamwe na wamizi wa heye. 20 Ila alyo igongolo nalibatigwa, hamwe na yula mloli wa udesi, heye yaditile vinduzanduza honhu ha heye. Kwa avyo vinduzanduza, nakawahada wanhu wala waibochele yila ndonya ya alyo igongolo, nawo hewo walifugamile limalukolo lya heye. Alyo igongolo na ayo mloli wa udesi, nawatozwa wawele wakomu kuli lila ilamba lya chiluli lilingwaka kwa maganga galingwaka. 21 Wamizi wa hewo nawabagama kwa ipanga lilawile kumlomo kwa yula yakwinile falasi. Mideje jeng'ha jochiguta kwa mitufi ja ng'huli za hewo.