1 Hamba nandichona chitabu kuli moko wa kudilo wa yula yekalise mchanya mwa chigoda cha undewa, nacho nachali chandichigwe mgati na kunze na kuwohigwa kwa ihota mala saba.Chitabu chibinigwe chiwohigwe na ihota mala saba 2 Nandimona mhilisi wa kilanga yawele na mong'ho yodamla kwa lizi ng'hulu, "Yalikohi yawele na katogo na yalinguganigwa kubena mihota jiwichigwe mihuli na kuchigubula chitabu acho?" 3 Nahakuwele ne yumwe kilanga na muisi na hasi ha isi, yoweza kuchigubula acho chitabu ama kuchilola mgati mwake. 4 Nani nandila ng'hatu kwa vila nahoneche ne yumwe wa kugubula chitabu acho ama kuchilola mgati mwake. 5 Hamba yumwe wa wala wasekulu nakandonjela, "Uleche kulila! Ulole! Isimba lya nhanzi ya Yudasi na lulelo lwa Daudi, heye kasumya. Heye koweza kubena jila mihota saba jiwele na mihuli na kuchigubula chila chitabu."

6 Hamba, nambona hala hagati ha chila chigoda cha undewa Mwanaing'holo limile, yazungulutwe chila ubanzi na wala wawele na ukomu wane na wala wasekulu. Ayo Mwanaing'holo nakoneka kota yakopoligwe, yawele na mbalati saba na meho saba, ziwele ndo Muhe saba wa Nguluwi zilajizwe kuli isi yeng'ha. 7 Yula Mwanaing'holo, nakaluta nakuchihola chila chitabu kuli moko wa heye wa kudilo wa yula yekale mchanya mwa chila chigoda cha undewa. 8 Baho du loyachiholile chila chitabu, awo wawele na ukomu wane na wala wasekulu makumi meli na gane nawafunama hali Mwanaing'holo. Chila yumwe wa hewo yawele na igombogombo na chifunyizi cha zahabu chimemile ubani, jiwele ndo kulanda kwa wanhu wa Nguluwi. 9 Nawo nawemba lwimbo lunyale wolonga,

"Hegwe uliyeng'ha kuna katogo ka kuhola chitabu acho,

na kubena mihota ja mihuli jake,

kwa vila hegwe nakukopoligwa,

na kwa danda ya hegwe kumgulila Nguluwi wa hetwe,

wanhu kulawa chila nhanzi na ndonga na ivyazi na isi yeng'ha.

10 Kuwadita wawe undewa na watambika wamkolele mijito Nguluwi wa hetwe,

nawo wolongoza isi yeng'ha."

11 Kahi nandola, nanyulika lizi ya wahilisi wa kilanga wenji ng'hatu, huweza kuwawaza. Kulawa nzingo zeng'ha za wala wawele na ukomu na za wala wasekulu wekale kuzunguluta chigoda cha undewa, 12 walonga kwa lizi ng'hulu,

"Mwanaing'holo yakopoligwe, ndo heye yaliyeng'ha wa kubochela

ludali na lufufu na luhala na mong'ho,

na ukulu na lutogo na kuhulichizwa."

13 Hamba nanyulika vilumbigwe vyeng'ha kilanga na muisi na hasi ha isi na mbahali vilonga,

"Kwa heye yekalise kuli chigoda cha undewa,

na kwa heye Mwanaing'holo,

kuwe na lutogo na kuhulichizwa na ukulu na ludali,

mazuwa gose na mazuwa gose."

14 Wala wawele na ukomu wane nawalonga, "Ena!" Nawo wasekulu wagwa chifunama, nawatambichiza.