1 Hamba nandimona mhilisi wa kilanga yunji yawele na ludali yodulika kulawa kilanga. Nayali yavalizwe ng'hungugu na ipinde lya nhonya mchanya mwa mutwi wa heye. Kumeho kwa heye nakwali kota isanya na magulu ga heye kota mizengo ja chiluli. 2 Mmoko wa heye nakebata chitabu chidodo chigubuligwe. Nakawika mgulu wa heye wa kudilo mchanya mwa bahali na mgulu wa kumoso mchanya mwa isi, 3 naye nakachema kwa lizi ng'hulu kota isimba lilingubuma. Naloyakwinize lizi, mibumo saba najidichila kota limlungu. 4 Ajo mibumo saba lojilavile lizi, nandali ndikale goya kwandika, ila nanyhulika lizi kulawa kilanga ilonga, "Ulonzi wa ajo mibumo saba ndo uviso, uleche kwandika!"

5 Hamba yula mhilisi wa kilanga yondimuwene yokwima mchanya mwa bahali na mchanya mwa isi nakenula moko wa heye wa kudilo kulajila kilanga, 6 nakelaha kwa itagwa lya Nguluwi yalingikala mazuwa gose, heye yalumbile kilanga na isi na bahali na vinhu vyeng'ha viwele mumo, nakalonga, "Mhela wa kubeteza umala! 7 Ila mhela yula mhilisi wa kilanga wa saba hoyopemba mhalamhanda, majesa ga uviso ga Nguluwi kwa mbuli zoyaganile zokwenela, kota navyoyawadamlile waloli nawawele vitumagwa wa heye."

8 Hamba, lizi yila yonyhuliche kulawa kilanga aho mwaluko, nailonga na heni kahi, ilonga, "Ulute, ukachihole chila chitabu chigubuligwe kuli moko wa yula mhilisi wa kilanga yemile mchanya mwa bahali na mchanya mwa isi." 9 Lelo, nandimlutila yula mhilisi wa kilanga nakumlonjela umhe chila chitabu chidodo. Naye nakandonjela, "Chihole, ulye. Kuli mlomo wa hegwe chowa chinonile kota hanombwa, ila mmunda wa hegwe chowa chausungu!" 10 Lelo, nandichihola chila chitabu chidodo kulawa kuli moko wa yula mhilisi wa kilanga, nandichilya. Nacho nachinona kota hanombwa mumlomo mwangu, ila lomelile nachali chausungu mmunda mwa heni. 11 Hamba, nawandonjela, "Kwanguganigwa kulavya uloli kwa chiwalo cha wanhu wenji wa isi na nhanzi na wanhu wa ndonga nyinji na wandewa!"