1 Hamba yula mhilisi nakandajila lwanda lwa mazi galingigala ukomu galingupulika kota chilolelo, golawila mchigoda cha undewa cha Nguluwi na cha Mwanaing'holo. 2 Lwanda alo naluloka hagati ha muji. Hafungo ha lwanda alo nakwali na igodi lya ukomu lilingulela mafuza mala kumi na mbili kwa mwaka, iwele ndo mala imwe chila mwezi, mahamba ga alyo igodi ndo mikwandi ja kuwateleka wanhu wa isi zeng'ha. 3 Haduhuli chinhu choneche chipanjilwe na Nguluwi chowa kuli muji awo. Chigoda cha undewa cha Nguluwi na cha Mwanaing'holo chowa kuli muji awo na vitumagwa wa heye womfugamila. 4 Wochiwona naye meho kwa meho na itagwa lya heye lyokwandikwa mli vihanga vya hewo. 5 Nechilo kowa kuduhuli kahi, ne howolapa lumuli lwa chenje ama lwa isanya kahi, mina Mkulu Nguluwi kowamwemwesela, nawo wolongoza kota wandewa mazuwa gose.

6 Hamba mhilisi wa kilanga nakandonjela, "Ulonzi awo ndo wa kukomya na wa kitumbila. Mkulu Nguluwi yawelenguwapa waloli walonje usenga wa heye kwa Muhe wa heye, nakamlajiza mhilisi wa heye yawalajile watumigwa wa heye mbuli ziwele zolawila sambi baha."

7 "Uhulichize!" "Ndanguya himahima. Kobweda yula yalingibatilila mbuli za uloli ziwele kuli chitabu achi."

8 Heni Yohana, nandizona na kuzihulika mbuli azi. Vyonanyuliche na kona, nanyigwa hali magulu ga ayo mhilisi wa kilanga yandajile mbuli azi, nangana kumfugamila. 9 Ila heye nakandonjela, "Leka kudita ahyo! Heni nda chitumagwa hela kota hegwe na wang'holozo waloli na weng'ha wawele nguhulichiza malajizo gawele muli chitabu achi. Mumfugamile Nguluwi!" 10 Kahi kandonjela, "Uleche kudita kota uviso mbuli ya uloli iwele muli chitabu achi, mina mhela wa kulawila kwa ago wahabehi. 11 Wanhu walingudita wihe na walutilile kudita wihe, yula yawele yakokomoche yalutilile kuwa yakokomoche. Yawele ngudita ganojile nayalutilile kudita ganojile, yula yawele yelile nayalutilile kuwa yelile."

12 Yesu kangulonga, "Muhulichize! Ndanguya himahima hamwe na igano lyondimpa chila yumwe kulawa kuli madito ga heye. 13 Heni ndo Alufa na Omega, wa mwaluko na wa kuduma. Wamwaluko na wa kuduma kwa chila chinhu."

14 Wabweda wala walinguhovuga nguwo za hewo, wawe na hachi ya kulya ifuza lya igodi lilingigala ukomu na ludali lwa kwinjila kuli lwizi migazi ja muji. 15 Ila mibwa na wahawi na wang'hondwa na walingukopola na walingufugamila jimalukolo na weng'ha walingugana kulonga udesi, wochikala kunze kwa muji.

16 "Heni, Yesu, ndimlajiza mhilisi wa kilanga yawalonjele mbuli ayi kuli vilundo vya wanhu walingumkunda Kilistu. Heni nda lulelo lwa lukolo lwa Daudi. Heni ndo nhondwe ilingupulika lufuku!"

17 Muhe wa Nguluwi na mdala yalinguhesigwa, wangulonga, "Uye!" Chila munhu yalinguhulika ali, nayalonje, "Uye!" Yawele na ng'halu yoye na yalingugana mazi ga ukomu yahole ne kulavya sendi.

18 Heni ndanguwakanya weng'ha walinguhulika mbuli za uloli uwele kuli chitabu achi, munhu yoneche yokonjeza choneche kuli mbuli ayo, Nguluwi komonjezela nongwa zandichigwe kuli chitabu achi. 19 Munhu yoneche yopungula choneche kuli ulonzi wa uloli uwele kuli chitabu achi, Nguluwi komsukula honhu ha heye kuli lila igodi lya ukomu na honhu ha heye kuli muji welile, uwele ulonjigwe kuli chitabu achi. 20 Yesu yalingulavya kukomya kwa heye kuli mbuli ayi kangulonga, "Ndangukomya ndanguya himahima." Ena. Uye Mkulu Yesu! 21 Ndanguwaganilani wanhu weng'ha wa Nguluwi isungu lya Mkulu Yesu. Ena.