1 Hamba, nambona ulanga unyale na isi inyale. Ulanga ula wa mwaluko na isi ila ya mwaluko navyali vipulute, nayo bahali nayali haduhuli kahi. 2 Ndiwona muji welile, Yelusalemu inyale, udulika kulawa kwa Nguluwi kilanga. Nawali uwichigwe goya kota mdala yahesigwe yenolije kiting'hana na mlume wa heye. 3 Hamba nanyulika lizi likulu kulawa kuli chigoda cha undewa ilonga, "Ulole! Hakaye ha Nguluwi ndo hamwe na wanhu. Kochikala hamwe na hewo, nawo wowa wanhu wa heye, naye kowa Nguluwi wa hewo. 4 Heye kobagusa mahozi ga hewo geng'ha, mina kubagama kowa kuduhuli ng'hatu na ne usungu na ne chililo na ne kutama, kwa vila vinhu vya mwaluko vipuluta!"

5 Hamba yula yekalise mchigoda cha undewa nakalonga, "Ulole, ndangudita vyeng'ha viwe vinyale." Kahi nakandonjela, "Wandiche mbuli ayi, mina ulonzi awu ndo wa kitumbila na wa kukomya!" 6 Hamba nakandonjela, "Genela! Heni ndo Alufa na Omega, Mwaluko na Kuduma. Yawele na ng'halu ndompa chinhu cha kunwa kulawa kuli nzasa ya mazi ga ukomu ne kulavya sendi. 7 Heye yoneche yalingusumya aga, kobochela acho, nani ndowa Nguluwi wa heye naye kowa mwanangu. 8 Ila wanhu walingudumba na wohambe wakunde na walihela luhala na walingukopola na wang'hondwa na wahawi na walingufugamila jimalukolo na wadesi weng'ha honhu ha hewo howa mgati mwa lila ilamba lilingwaka chiluli na baluti, ako ndo kubagama kwa keli."

9 Hamba yumwe wa wala wahilisi wa kilanga saba wawele na vila visaye saba navimemile nongwa saba za kuduma, nakoya na kundonjela, "Uye! Nani ndokulajila mdala yahesigwe mche wa Mwanaing'holo!" 10 Lelo, Muhe Yelile naumema kwa heni, naye mhilisi kanyhilika mchanya mwa chidunda chikulu ng'hatu chiling'wemang'wema. Kandajila muji welile wa Yelusalemu, udulika kulawa kwa Nguluwi kilanga, 11 upulika kwa ukulu wa Nguluwi. Kupulika kwake nakwali kota iganga lya sendi nyinji kota vila yasipi ilingupulika kota chilolelo. 12 Nawali na lukanzi lulefu na lukulu luzungulute muji awo, luwele na lwizi migazi kumi na mbili, chila lumwe na lwimililwa na mhilisi wa kilanga. Mchanya mwa chila lwizi nahandichigwa limwe lya matagwa ga nhanzi kumi na mbili za Isilaeli. 13 Kwali na lwizi migazi midatu, ubanzi wolilawila isanya lwizi migazi jidatu na kaskazini lwizi migazi jidatu na kusini lwizi migazi jidatu na kolizinjila isanya lwizi migazi jidatu. 14 Lukanzi lwa muji awo lwali luzenjigwe mchanya mwa maganga ga msisi kumi na meli, mchanya mwa chila iganga nahali handichigwe itagwa limwe lya wala vitumagwa kumi na weli wa Mwanaing'holo.

15 Ila yula mhilisi yalonjile na heni nayali na ng'hweku ya zahabu leka yaupime muji awo na lwizi lugazi lwa heye na lukanzi lwa heye. 16 Muji awo nawali na banzi zine zilingiwhana, ung'wemang'wema na ugazi nawiwhana. Lelo, mhilisi nakaupima muji awo kwa ng'hweku ya heye, nawali na ung'wemang'wema wiwhanile na ugazi na wiwhanile kuza kuchanya, kota kilomita elufu mbili na miya zine (2,400). 17 Hamba nakaupima lukanzi lwa heye, lwali na ugazi wa mita makumi sita (60) kwa chipimilo cha meho ga chiwunhu, ndo chiwele mhilisi wa kilanga chonayapimile. 18 Lukanzi alo nalwali luzenjigwe kwa maganga madung'hu ga sendi nyinji, muji wuwo nawali uzenjigwe kwa zahabu inojile, ilingung'hala kota chilolelo. 19 Maganga ga msisi wa lukanzi awo nagali ganolijigwe kwa chila iganga lya sendi nyinji. Iganga lya mwaluko lya msisi nalyali iganga lya sendi nyinji lidung'hu na lya keli lya yakuti samawati na lya kadatu kalikedoni na lya kane zumalidi 20 na lya kahano salidoniki na lya sita akiki na lya saba kilisolito na lya nane zubalajadi na lya tisa topazi na lya kumi kilisopilaso na lya kumi na imwe yasintho na lya kumi na mbili ametisto. 21 Jila lwizi migazi kumi na mbili najali na lulu kumi na mbili na chila lwizi lugongomanywa kwa lulu imwe. Chila nzila ng'hulu ya muji naigongomanywa kwa zahabu inojile, ilingupulika kota chilolelo.

22 Siwene Ng'handa ya Nguluwi kuli muji awo, mina Mkulu Nguluwi Yawele na Ludali na yula Mwanaing'holo ndo ng'handa ya Nguluwi ya muji awo. 23 Muji awo hambe ulape isanya ne nyelezi kuung'alichila, mina ukulu wa Nguluwi wanguung'alichila na Mwanaing'holo ndo lumuli lwa muji awo. 24 Wanhu wa isi wochikala kuli lumuli lwake na wandewa wa isi wougalila lufufu lwa hewo. 25 Lwizi migazi ja muji awo jowa jichumuligwe nemisi yeng'ha, kwa vila hakuwa na nechilo amo. 26 Wanhu wa isi zeng'ha wougalila muji awo, ukulu na lufufu lwa isi. 27 Ila kuduhuli chinhu choneche chiwele chikokomoche chikwinjila amo, ne munhu yoneche yodita mbuli ya kuzudiza ama ya udesi hokwinjila amo. Ndo wala hela wandichigwe kuli chitabu cha ukomu cha Mwanaing'holo ndo wokwinjila kuli muji awo.