1 Logakwete ago nandiwona wahilisi wa kilanga wane wemile kuli nzingo zine za isi, wolemeza mbeho zine za isi leka mbeho zileche kuputa mchanya mwa isi ne mchanya mwa bahali ne mchanya mwa migodi. 2 Hamba, nandimona mhilisi yunji yokwina kulawa kolilawilaga isanya, yawele na muhuli wa Nguluwi yawele mkomu. Nakakwiniza lizi na kuwalonjela wahilisi wa kilanga wane wapeligwe ludali lwa kuwifya isi na bahali, 3 yula mhilisi nakalonga, "Mleche kuwifya isi ne bahali ne migodi, mbaka hotusinda kuwawika muhuli vitumagwa wa Nguluwi wa hetwe mli vihanga vya hewo." 4 Hamba, nanyulika hisabu ya hewo wawichigwe muhuli kuli nhanzi ya Waisilaeli, wanhu lachi imwe na makumi gane na elufu zine (144,000). 5 Nhanzi ya Yudasi wanhu kumi na mbili elufu (12,000) wawichigwe muhuli na wa nhanzi ya Lubeni wanhu kumi na mbili elufu (12,000) wawichigwe muhuli na wa nhanzi ya Gadi, wanhu kumi na mbili elufu (12,000) wawichigwe muhuli 6 na wa nhanzi ya Asheli, wanhu kumi na mbili elufu (12,000) wawichigwe muhuli na wa nhanzi ya Nafutali, wanhu kumi na mbili elufu (12,000) wawichigwe muhuli na wa nhanzi ya Manase, wanhu kumi na mbili elufu (12,000) wawichigwe muhuli 7 na wa nhanzi ya Simoni, wanhu kumi na mbili elufu (12,000) wawichigwe muhuli na wa nhanzi ya Lawi, wanhu kumi na mbili elufu (12,000) wawichigwe muhuli na wa nhanzi ya Isakali, wanhu kumi na mbili elufu (12,000) wawichigwe muhuli 8 na wa nhanzi ya Sebuluni, wanhu kumi na mbili elufu (12,000) wawichigwe muhuli na wa nhanzi ya Yusufu, wanhu kumi na mbili elufu (12,000) wawichigwe muhuli na wa nhanzi ya Benjamini, wanhu kumi na mbili elufu (12,000) wawichigwe muhuli.

9 Hamba, nandola nambona likugusi lya wanhu wa chila nhanzi na lukolo na ndonga, wemile kumwando mwa chigoda cha undewa na kumwando kwa Mwanaing'holo, wavalile nguwo nzelu na miputi ja uchindu mmoko mwao. 10 Nawakwiniza lizi wolonga, "Ulohozi wangulawa kwa Nguluwi wa hetwe yekalise kuli chigoda cha undewa na vivila wangulawa kwa Mwanaing'holo." 11 Wahilisi wa kilanga weng'ha nawema kuchizunguluta chila chigoda cha undewa na vila vilumbigwe viwele na ukomu vine. Nawagwa chifunami kumwando kwa chila chigoda cha undewa, wamfugamila Nguluwi, 12 wolonga, "Ena! Kutogola na ukulu na luhala na malumbo na mong'ho na kuhulichiza kwa Nguluwi wa hetwe, mazuwa gose, Ena!"

13 Nakedichila yumwe wa wala wasekulu, yondonjela, ndaze! "Wanhu awa wavalizwe nguwo nzelu ndo whaani? Na walawa kohi?" 14 Nandimwidichila, "Mkulu, hegwe kuvizela!" Naye nakandonjela, "Awa ndo walingulawa kuli gala magazo makulu, nawo wahovuga nguwo za hewo na kuzidita ziwe nzelu chwee! Kuli danda ya Mwanaing'holo. 15 Ahyo, wa kumwando kwa chigoda cha undewa cha Nguluwi, nawo wangumkolela Nguluwi mijito, nemisi na nechilo kuli ng'handa ya heye. Heye yalingikala kuli chigoda cha undewa kowamila. 16 Howokona nzala kahi ne howokona ng'halu. Ne howolyona isanya ne ivuche ling'hang'ale haliwalakaza. 17 Mina, ayo Mwanaing'holo yawele hagati ya chigoda cha undewa, kowadima, naye kowalongoza kuli nzasa ya mazi gawele na ukomu. Naye Nguluwi kogabagusa mahozi geng'ha kuli meho ga hewo."