1 Hamba, nandimona mhilisi wa kilanga yumwe yodulika kulawa kilanga yawele na chichumulilo cha ikulubila na minyololo mikulu mmoko mwa heye. 2 Nakalibata lila izoka lya katali, ndo Vijeni ama Limazoga nakaliwoha na wula mnyololo kwa miyaka elufu imwe (1,000). 3 Mhilisi nakalitoza kuli ikulubila na kuhinda lwizi lwa kwinjilila ako na kuwika ihota na muhuli, leka lileche kuweza kahi kwajiliza wanhu wa isi zeng'ha mbaka aho miyaka elufu imwe (1,000) hojimala. Ila hojimala miyaka ajo yomgana kudoholigwa kahi, ila kwa mhela udo hela.

4 Hamba nambona vigoda vya undewa na wanhu wekalise mchanya, wanhu awo nawapegwa ludali lwa kutagusa. Kahi nambona muhe wa wala wakopoligwe kwa chiwalo cha kukunda kukomya kwa Yesu na kweneza ulonzi wa Nguluwi. Awo nahawalifugamile alyo igongolo ama limalukolo lyake, ne kuwichigwa ndonya mvihanga vya hewo ama mmoko mwa hewo. Nawapegwa kahi ukomu nawalongoza kahi hamwe na Kilistu kwa miyaka elufu imwe (1,000). 5 Wala wayage wabagame hawapatile ukomu mbaka miyaka elufu imwe (1,000) genele. Awu ndo uzilipulo wa mwaluko. 6 Watambichizwe na kahi ndo welile hewo weng'ha wawele mli uzilipulo awu wa mwaluko. Kubagama kwa keli hakuwa na ludali hali hewo, wowa watambika wa Nguluwi na wa Kilistu, nawolongoza hamwe na heye kwa miyaka elufu imwe (1,000).

7 Mhela miyaka elufu imwe (1,000) hojimala, Limazoga lyodoholelwa kulawa kuchinweng'ho. 8 Lelo, kolawa kunze, kokwaluka kwajiliza wanhu wa isi zeng'ha wasambaluche chila honhu muisi, wanhu awa wanguchemigwa Gogu na Magogu. Limazoga lyowakungajiza hamwe kwa chiwalo cha ngondo, nawo wowa wenji kota misanga ja kumwani. 9 Nawakola kuli isi yeng'ha, nawazunguluta mkambi ya wanhu wa Nguluwi na muji wa Nguluwi yalinguugana. Ila chiluli nachidulika kulawa kilanga, nakuwalakaza. 10 Nalyo Limazoga nalyali liwajiliza wanhu, lyotajigwa mgati mwa ilamba lilingwaka chiluli cha baluti, amo lyamumo lila igongolo na yula mloli wa udesi, nawo wogazigwa nemisi na nechilo, mazuwa gose.

11 Hamba, nambona chigoda cha undewa chikulu chizelu, nayula yawele ngikalisa hali chigoda acho. Isi na kilanga vyajilila hali meho ga heye, nahavyoneche kahi. 12 Hamba, nandiwona wanhu wakulu kwa wadodo, nawema hali chigoda cha undewa na vitabu vigubuligwa. Hamba chitabu chiyage, ndo chiwele chitabu cha ukomu, nacho chogubuligwa kahi. Wabagame wogazigwa kota vyogawele madito ga hewo, kota vyoyandichigwe mgati mwa vitabu avyo. 13 Bahali yowalavya kunze wabagame wawele mgati mwa heye, kubagama na isi ya wabagame vyowalavya kunze wabagame wawele mgati mwake. Chila yumwe nakatagusigwa kwa gala goyaditile. 14 Hamba, kubagama na isi ya wabagame navitajigwa mli ilamba lya chiluli. Ilamba alyo lya chiluli ndo kubagama kwa keli. 15 Munhu yoneche itagwa lya heye halyandichigwe kuli chitabu cha ukomu, nakatajigwa kuli ilamba lya chiluli.