1 Hamba, nandimona mhilisi wa kilanga yunji yodulika kulawa kilanga. Nayali na ludali lukulu, nayo isi naimulikwa kwa kung'ala kwake. 2 Naye nakakwiniza lizi kwa iyowe, yolonga, "Kugwa, muji ukulu wa Babiloni kugwa! Lelo kuwa hakaye ha vijeni na jimazoga, kuwa hakaye ha mideje jihile na migongolo ja kuzudiza ng'hatu. 3 Kwa vila nhanzi zeng'ha nazigala divai ng'hali ya hegwe iwele na mong'ho ulinguwambuza kudita ung'hondwa, hewo wandewa wa isi wadita ung'hondwa hamwe na hegwe. Hewo nawaguza vinhu vya isi wana lufufu lwinji kulawa kubweda kwinji lukami kwa hegwe ne kuduma."

4 Hamba nanyhulika lizi liyage kulawa kilanga ilonga,

"Wanhu wa heni, muche kuli muji awo wa Babiloni.

Leka mleche kihanza kuli ung'hondwa wa heye,

mleche kihanza kuli gehile ga heye.

5 Mina wihe wa heye uwa winji ng'hatu, uchilunda mbaka kilanga,

na Nguluwi hagasemwile gehile ga heye.

6 Mditileni Babiloni kota vyoyawaditileni hemwe,

mumhilusile mala ya keli kwa gala goyawaditile,

muhanzileni mchizombe cha heye divai ng'hali mala keli.

Kota chakunwa choyakuwichile hegwe.

7 Mumhe magazo na usungu vyoilingumlapa kwa kidaya kwa heye,

kota ukulu na kikala kwa heye kwa kubweda.

Kangilonjela mnhumbula ahi,

‘Aha ndangikala heni mndewa wa chidala.

Heni siwele munhu yafililwe na mlume, siwa kahi na usungu!’

8 Kwa chiwalo acho nongwa za heye zomfika kwa zuwa imwe,

utamwa na masinzo na nzala.

Kolakazwa na chiluli,

kwa vila Mkulu Nguluwi yalingumtagusa heye kana mong'ho."

9 Wandewa wa isi waditile ung'hondwa naye na kikala naye kwa kubweda wolombocheza na kulila mhela wowokona iyosi lya kulakazwa kwa heye. 10 Wangwima kutali kwa chiwalo cha kudumba magazo ga heye na kulonga, "Kochona! Kochona, hegwe Babiloni, muji ukulu uwele na mong'ho! Kwa mhela wa saa imwe hela utaguso wa hegwe uya."

11 Waguza vinhu wa muisi wolila na kulombocheza kwa wula muji, kwa vila kuduhuli munhu yogula kahi vinhu vya heye, 12 kuduhu kahi wakugula zahabu za heye na maganga ga sendi nyinji na vinhu vilingupulika na lulu na kitani na nguwo za lanji ya zambalau na halili na ivalo idung'hu na vinhu vya chila mbuli kuli migodi ja chiuyeng'ha na vinhu vya mbalati za nhembo na vya migodi jiwele na sendi nyinji na shaba na chuma na mabwe 13 na mdalasini na ndugwa na ubani na manemane na udi na divai na mafuta na utimbo ulinimwanimwa na ngano na isenga na ming'holo na falasi na mutuka ulingukwejigwa na lukuli na nhumbula na wapogozi wa hewo na kikala kwa wanhu.

14 Waguza vinhu wamlonjela Babiloni, "Mafufugo geng'ha goulolelile gajilila na lufufu na lutogo vimala, huvipata kahi!" 15 Waguza vinhu wawele na lufufu lwinji kwachiwalo cha muji awo, wokwima kutali kwa chiwalo cha kudumba kwa magazo ga heye, wolila na kulombocheza, 16 wolonga, "Kochona! Kochona kwa muji awu ukulu. Kuzowela kuvala mivalo ja kitani na nguwo za lanji ya zambalau na ndung'hu na kinoliga kwa zahabu na maganga ga sendi nyinji na lulu! 17 Kwa saa imwe hela lufufu lwa hegwe lumala!"

Hamba waligwendesa meli weng'ha na walimmajendo na wana mazi weng'ha walingukola mijito mbahali, nawema kwa kutali, 18 na vyowaliwene iyosi lya chiluli chila chilakaze, nawalila kwa lizi, "Hainalawila hetwe kuwona muji ukulu kota awu!" 19 Weboholela nhimbwisi mchanya mmutwi mwa hewo wolila kwa lizi na kulombocheza, "Kochona! Kochona, hegwe muji ukulu! Wanhu weng'ha wawele na meli zilinguheluka mbahali nawapata lufufu lwinji kulawa kuli lufufu lwake. Kwa mhela wa saa imwe hela kwajiliza chila chinhu!"

20 "Usechelele hegwe kilanga, kwa chiwalo cha kuwifya kwa heye. Msechelele wanhu wa Nguluwi, vitumagwa na waloli! Mina Nguluwi kautagusa muji awo, kwa chiwalo cha mbuli yomuwaditile hemwe!"

21 Hamba, mhilisi wa kilanga yumwe yawele na mong'ho nakenula iganga liwele likulu lya lwala, kalitaga mbahali yolonga, "Kwa mong'ho awo, ahi ndo Babiloni vyoyotajigwa na kwajilila ng'hatu. 22 Lizi lya ching'weleng'wele na lizi lya wapemba miluli na mhalamhanda hozihulikwa kahi mgati mwa hegwe muji awo. Kuduhuli muwanzi wa mijito yoneche yila, ila yokoneka mwa hegwe kahi na lizi lya iganga lya lwala holihulikwa kahi mgati mwa hegwe. 23 Lumuli lwa chenje haukoneka kahi mgati mwa hegwe, lizi lya munhu yalinguhesa na yalinguhesigwa hazihulikwa kahi mgati mwa hegwe. Waguza vinhu wa hegwe nawali wanhu wazeleche muisi na kwa uhawi wa hegwe isi zeng'ha nazajilizwa!"

24 Muji awo wa Babiloni nautagusigwa kwa chiwalo cha amo koneka danda ya waloli wa Nguluwi na danda za wanhu wa Nguluwi na za wanhu weng'ha wakopoligwe muisi.