1 Kulawa ago, nambona lwizi lugubuka kilanga. Lila lizi ya mwaluko yondiihuliche kota lizi ya mhalamhanda nailonga na heni, "Ukwine mbaka aku, nani ndokulajila mbuli zozilawila aho hogolawila aga." 2 Baho du namemezwa na Muhe wa Nguluwi, nambona chigoda cha undewa chiwichigwa kula kilanga na yumwe yekalise mchigoda chila. 3 Ayo yekalise mchigoda chila nayali yong'hala kota alimasi na kota iganga idung'hu linojile na ipinde lya nhonya liwele ling'halile kota mabwe, nauchizunguluta chila chigoda cha undewa. 4 Nakwali na vigoda makumi meli na gane, navizunguluta chila chigoda cha undewa na mchanya mwa vila vigoda nambona wasekulu makumi meli na gane, wekale, wavalile nguwo nzelu na vipembelo mmitwi vya zahabu. 5 Kuli chila chigoda cha undewa, nakwali kulawa lumwemwesa na lizi lya limlungu. Chenje saba za chiluli navyali vikwaka kumwando kwa chila chigoda cha undewa, chenje azo saba ndo muhe saba wa Nguluwi. 6 Kumwando kwa chila chigoda cha undewa, nakwali na chinhu chiwhanile na bahali ya chilolelo, nachali chwee kota iganga lilingung'hala lukami. Kuli banzi zeng'ha za chila chigoda, nakuzunguluta, nakwali na vilumbigwe vikomu vine. Vilumbigwe avyo navyali vimemile meho kumwando na kumbele. 7 Chilumbigwe acho cha mwaluko nachali kota isimba na chilumbigwe cha keli nachali kota isenga ibuguma na chilumbigwe acho cha kadatu nachali nakumeho kota kumeho kwa munhu na chilumbigwe cha kane nachali kota ikungule lilinguguluka. 8 Vilumbigwe avyo vine, chila chimwe nachali na mabawa sita, navyali vimemile meho mgati na kunze. Navyali hambe vyesele misi na nechilo, vilonga,

"Yelile, yelile, yelile, Mkulu Nguluwi Yawele na Ludali lweng'ha,

yalibaha na nayawele na yalinguya."

9 Chila mhela vilumbigwe avyo vine vyomtogola na kulonga heye ndo mkulu na kuta malumbo ayo yekalise mchanya mwa chigoda cha undewa, yalingikala mazuwa gose, 10 wala wasekulu makumi meli na gane, wangigwisa hali yula yalingikala hali chila chigoda cha undewa na kumfugamila heye yawele mkomu mazuwa gose. Nawo wanguwika vipembelo vya hewo hamwando ha chila chigoda cha undewa, wolonga,

11 "Mkulu na Nguluwi wa hetwe, ndo gwegwe baho wa kubochela,

ukulu na lutogo na mong'ho,

kwa vila hegwe ndo ulumbile vinhu vyeng'ha,

na kota vyouganile hegwe navyalibaha, navyo navilumbigwa."