1 Mhilisi wa kilanga wa kahano nakapemba mhalamhanda. Nambona nhondwe ilawile kilanga, ilagala mchanya mwa isi. Naye nakapegwa chichumulilo cha kwinjilila kuli ikulubila. 2 Nakalichumula ikulubila lyohambe lidume, nakulawa iyosi lya itanulu ikulu. Isanya na ulanga naviwichigwa jiza kwa iyosi lya ikulubila alyo. 3 Nzije nazilawa kuli iyosi alyo, nazinjila muisi, nawapegwa ludali kota wa nyinje. 4 Nazilonjelwa zileche kuwifya misolo na mahamba ga isi ne chinhu choneche chiwele chideche ne igodi lyoneche, ila wawawifye hela wala wanhu wasowile muhuli wa Nguluwi kuli vihanga vya hewo. 5 Nzije azo nazipegwa malajizo kota zileche kuwakopola, ila wagazigwe myezi jihano. Usungu wa magazo nawali kota munhu yalumigwe na nyinje. 6 Mazuwa gala, wanhu wopala kubagama ila howobagama, wopala nzila ya kubagama ila hawoyona hebu.

7 Nakoneka kwa azo nzije, nakwali kota falasi wawichigwe goya kwa ngondo. Mchanya mwa vitwi vya hewo nawali na vinhu vifandile kota chipembelo cha zahabu na kumeho kwa hewo nakwali kota za wanhu. 8 Nawo nawali na mnvili kota mnvili za wadala na mizino jawo najali kota mizino ja isimba. 9 Mhambaga za hewo nazali zigubikwe na chinhu kota ngwamo ya chuma. Lizi lya mabawa ga hewo nayali kota lizi ya mutuka ilingukwejigwa na falasi wenji walingubilima himahima kuluta kuli ngondo. 10 Nawo nawali na michila kota ja nyinje na michila ja hewo jali na ludali lwa kuwagaza wanhu myezi jihano. 11 Wanaye mndewa yalinguwalongoza, naye ndo mhilisi wa lila ikulubila kuli isi ya wabagame na itagwa lyake kwa Chiebulaniya ndo Abadoni na kwa Kiyunani kanalo itagwa lyake Apoliyoni ilinguzelaka kota, "Yalingugaza."

12 Kugaya kwa mwaluko mina kupuluta, ila ulole, kung'hali kugaya kwili kulinguya hamba.

13 Hamba, mhilisi wa kilanga wa sita nakapemba mhalamhanda yake. Nanyulika lizi ilawile kuli zila mbalati zine za honhu ha kulavila nhambiko ha zahabu hawele kumwando kwa Nguluwi. 14 Lizi ayo naimlonjela yula mhilisi wa sita nayawele na mhalamhanda, "Uwachumulile awo wahilisi wa kilanga wawohigwe habehi na lwanda lukulu lwa Eyufulate!" 15 Wala vitumagwa wane wa Limazoga nawachumulilwa, nawawele wawichigwe goya kwa yila saa na zuwa na mwezi na mhela, leka wakopole imwe ya kadatu ya wanhu muisi. 16 Nanyulika awo wamizi walingukwina falasi nawali miliyoni miya mbili (200,000,0000). 17 Ahyo navyombonile awo falasi na wakwinile falasi kuli ulotezi wa heni. Nawali na ngwamo za chuma mhambaga, ziwele kota chiluli, ziwele na lanji ndung'hu na buluu na njano na vitwi vya falasi awo ndo kota vitwi vya isimba na kuli milomo jawo mwangulawa milapi ja chiluli na iyosi na baluti ilingwaka. 18 Kwa mbuli azo za kugaya kwa kadatu, nagakopola imwe ya kadatu ya wanhu muisi, iwele ndo iyosi na baluti ilingwaka naiwele ilawa kuli milomo ja awo falasi. 19 Ludali lwa awo falasi nalwali mmilomo jawo na kuli michila jawo. Michila jawo najali kota mizoka na najali na mitwi, jiwele nawawalumiza wanhu kwa michila ajo.

20 Wanhu wanji waponile, wohawakopoligwe kwa kugazigwa ako, hawamgalamchile Nguluwi na hawalechile kufugamila vinhu wagongomanye kwa moko gawo, ne hawalechile kutambichila jimazoga na jimalukolo ja zahabu na ja sendi na shaba na ja maganga na ja migodi, johajidahile kulola na kuhulika ne kujenda. 21 Wala wohambe wamgalamchile Nguluwi na kuleka kukopola na uhawi na ung'hondwa na uhizi.