1 Hamba, nambona Mwanaing'holo yemile mchanya mwa chidunda cha Siyoni, hamwe na wanhu wa heye, lachi imwe na elufu makumi gane na zine (144,000) wawele na itagwa lya heye na itagwa lya mhaza wa heye, lyandichigwe kuli vihanga vya hewo. 2 Lelo, nanyulika lizi kulawa kilanga, kota lizi lya kubogoma kwa mazi menji na kota lizi lya limlungu lilingubuma. Lizi yonyuliche nayali kota lizi ya wavina muzichi wotowa ving'weleng'wele vya hewo. 3 Nawali wokwimba lwimbo lunyale kumwando kwa chigoda cha undewa na kumwando kwa wala vilumbigwe wawele na ukomu wane na wala wasekulu. Kuduhuli munhu yajezile kilangusa lwimbo ula ila wala wanhu lachi imwe na elufu makumi gane na zine (144,000) nawagomboligwe kuli isi. 4 Wanhu awa ndo nahawawele wakokomoche kwa kuwasa na wadala, nawo ndo hawanawasa na wadala. Awa ndo walingumuwinza Mwanaing'holo chila hoyoluta. Awa wagomboligwa kuli wanhu, nawali wa mwaluko kulavigwa kwa Nguluwi na kwa Mwanaing'holo. 5 Mli milomo ja hewo, hawoneche udesi, mina nawalihela wihe.

6 Hamba, nambona mhilisi wa kilanga yunji, yoguluka kilanga, yawele na Mbuli Inojile ya mazuwa gose ya Nguluwi, yowadamlila awo wanhu walingikala kuli isi na chila isi na nhanzi na lukolo na ndonga, 7 yolonga kwa lizi ng'hulu, "Mumdumbe Nguluwi na kuutogola ukulu wa heye! Mina mhela wa kuwatagusa wanhu wuya. Mumfugamile heye yaditile kilanga na isi na bahali na nzasa za mazi."

8 Hamba mhilisi wa kilanga yunji wa keli nakamuwinza, ayo wa mwaluko yolonga, "Ugwa! Muji ukulu wa Babiloni ugwa! Mina hegwe ndo unwezile isi zeng'ha divai ya heye ing'ang'ale ilinguwambuza wanhu wawe na maya ga kudita ung'hondwa!"

9 Mhilisi wa kilanga wa kadatu, nakawawinza awo weli yolonga kwa lizi likulu, "Munhu yoneche yolifugamila alyo igongolo na limalukolo lyake na kubochela ulajilo kuli chihanga cha heye ama kuli moko wa heye, 10 heye yuye konwa divai ya kuzudila kwa Nguluwi ijidigwe mli chizombe cha kuzudila kwa heye ne kuhanzanywa na mazi. Munhu ayo kogazigwa kuli chiluli na kwa baluti kumwando mwa wahilisi wa kilanga welile na kumwando kwa Mwanaing'holo. 11 Iyosi lya chiluli liwele nguwagaza lyangukwina mchanya mazuwa gose. Wanhu awo walingulifugamila alyo igongolo ling'ang'ale na limalukolo lya heye na kuwichigwa ulajilo wa itagwa lya heye, hawowa na mhumu nemisi na nechilo."

12 Ahyo, ndo wanhu wa Nguluwi vyowalinguganigwa, mina wala wanhu wawele nguwinza mzilo wa Nguluwi na wawele na makundo kwa Yesu, wawe wemilile.

13 Hamba, nyhulika lizi lilawa kilanga lilonga, "Wandiche! Kulawa sambi, wabweda wanhu wawele ngubagama welumbile na Mkulu." Naye Muhe kangulonga, "Ena! Wokwesela kulawa kuli magazo ga hewo, mina wosangalala kwa chiwalo cha mijito ja kitunya kwa hewo."

14 Hamba, nandola aku, nakwali na ng'hungugu nzelu aho. Mchanya mwa ng'hungugu ayo nakwali na yumwe yawele kota Mwana wa munhu. Heye nayali yavalile chipembelo cha zahabu kumutwi na kibata sengo mmoko mwa heye. 15 Hamba mhilisi yunji wa kilanga nakalawa mli ng'handa ya Nguluwi ya ako kilanga, kwa lizi ng'hulu naimlonjela yula yekalise mchanya mwa ng'hungugu, "Dedede, ukolele mijito sengo ya hegwe, ukabete mbena, mina mhela wa mbena wuya, mbena ya isi ya goya." 16 Lelo, yula yawele yekalise mchanya mwa ng'hungugu na kupujila sengo ya heye muisi, mbena ya isi ibetigwa. 17 Hamba, mhilisi wa kilanga myage nakalawa kuli ng'handa ya Nguluwi iwele kilanga yebate sengo iwele inoligwe ng'hatu.

18 Hamba, mhilisi wa kilanga myage yawele na ludali lwa chiluli, nakalawa kuli honhu ha kulavila nhambiko, nakamlonjela kwa lizi ling'angala yula mhilisi yawele na sengo inoligwe ng'atu, "Nagwe ukanole ayo sengo ya hegwe, ukadumule sanha za mizabibu ja isi, mina zabibu za heye zipya!" 19 Lelo, mhilisi wa kilanga ayu nakataga sengo ya heye muisi, nakakana sanha za izabibu lya isi, nakazinjiza honhu ha kukamila zabibu, honhu hawele na kuzudila kwa Nguluwi. 20 Zabibu zikamigwe mgati mwa alyo ikamilo liwele kunze kwa muji na danda ilawa kuli ikamilo alyo yanguchililika kota lwanda na kumema mbaka wimo wa mita imwe na nusu na ulefu uwele ngufika kilomita miya mbili (200).