1 Hamba, nandimona Mwanaing'holo loyabenile imwe ya jila mihota saba. Nanyhulika yumwe wa wala vilumbigwe wawele na ukomu wane wolonga kwa lizi ng'hulu kota ya limlungu, "Uye!" 2 Heni nandola, nambona kwali na falasi mzelu naye yamkwinile nayali na upinde, nakapegwa itaji, naye nakalawa yawele yasumile, yawele na ludali lwa kulutilila kusumya.

3 Hamba, Mwanaing'holo nakabena ihota lya keli. Nandimhulika yula chilumbigwe wa keli yawele na ukomu yolonga, "Uye!" 4 Nakalawa falasi yunji mdung'hu ng'hatu, naye yamkwinile nakapegwa ludali lwa kusa kikala goya muisi, leka wanhu wekopole, naye nakapegwa ipanga ikulu.

5 Hamba Mwanaing'holo nakabena ihota lya kadatu. Nandimhulika chilumbigwe yula wa kadatu yawele na ukomu yolonga, "Uye!" Nandola nakwali na falasi yumwe mtitu naye yamkwinile nayali na vipimilo vili mmoko mwake. 6 Nanyulika kota lizi hali awo wawele na ukomu wane, ilonga, "Chibaba chimwe cha utimbo wa ngano kwa migwala ja mijito ya zuwa limwe na vibaba vidatu vya uhemba kwa igwala limwe. Ila uleche kuwifya mafuta na divai."

7 Hamba, Mwanaing'holo nakabena ihota lya kane. Nandimuhulika yula chilumbigwe wa kane yawele na ukomu, yolonga, "Uye!" 8 Nani nandola, nambona falasi yumwe yawele na lanji ya chivu, naye yamkwinile itagwa lyake ndo Kubagama na Isi ya Wabagame, nakamuwinza kumbele. Nawo nawapegwa ludali kwa lobo imwe ya isi, wawakopole wanhu kwa ipanga na lufemba na utamwa na migongolo jing'ang'ale ja kisolo.

9 Hamba, Mwanaing'holo nakabena ihota lya kahano. Nambona hala mlukweme lwa honhu ha kulavila nhambiko ha kufunyizila ubani hana muhe wa hewo wakopoligwe kwa chiwalo cha kudamla usenga wa Nguluwi na kulutilila kulonga kukomya kowakukundile. 10 Lelo, nawalila kwa lizi likulu, wolonga, "Hegwe Mkulu uwele ngulongoza, uwele welile na wa kukomya, mbaka nili kowa ubeteza kuwatagusa wala weng'ha walingikala hali isi kwa chiwalo cha kukopoligwa kwa hetwe?" 11 Nawapegwa chila yumwe ikanzu lilefu izelu, nawalonjelwa walutilile kubeteza kwa mhela udo, mbaka vitumagwa wayawo na wayawo walingumkunda Kilistu, walinguganigwa kukopoligwa kota hewo, lowakopoligwe.

12 Hamba nambona, mhela Mwanaing'holo vyoyabenile ihota lya sita, nakwali na limachinyina, isanya nalyali ititu kota igunila ititu na nyelezi yeng'ha nayali ndung'hu kota danda, 13 nazo nhondwe za ulanga nazigwa mchanya mwa isi kota mafuza mabowa ga ikuyu gawele ngugwa galingutigaswa na mbeho ng'hali. 14 Ulanga nausigwa kota kalatasi ibinigwe na chila chidunda na chihilwa vyeng'ha navyusigwa kulawa honhu hake. 15 Hamba, wandewa wa isi na wakulu walingulongoza na vilongozi wa wamizi na wawele na lufufu na wawele na mong'ho na chila mpogozi na munhu yelejehe, wevisile mmhalika na mmitalawe ja vidunda. 16 Nawavilonjela avyo vidunda na ajo mitalawe, "Mtugwile, mkatuvise kutali na heye yekalise mchigoda cha undewa na kutali na kuzudila kwa Mwanaing'holo! 17 Mina, zuwa iwele ng'hulu ya kutagusigwa kwa hewo ifika. Whaani yoweza kwima nzinzili?"