1 Aho mwaluko, Nguluwi nakalumba ulanga na isi. 2 Isi nayali kota kugunuche na nayali ilihela chinhu. Jiza nalyali ligubiche mazi menji na Muhe wa Nguluwi nawali wenele mchanya mwa mazi menji.

3 Nguluwi nakalonga, "Kuwe na lumuli," baho lumuli nalulawila. 4 Nguluwi nakona lumuli lunoga. Hamba Nguluwi nakavilekaniza lumuli na jiza. 5 Nguluwi nakaluchema lumuli "Nemisi" na jiza nakaichema "Nechilo." Naiwa matinazo, naiwa mitondo, zuwa lya mwaluko.

6 Nguluwi nakalonga, "Mazi gagawanuche kuli banzi mbili, kuchanya na hasi." 7 Naiwa ahyo. Nguluwi nakalekaniza mazi ga kuchanya na mazi ga hasi. 8 Nguluwi nakahachema honhu aho ha hagati ha mazi "Ulanga." Naiwa matinazo, naiwa mitondo, zuwa lya keli.

9 Nguluwi nakalonga, "Mazi gawele hasi ha ulanga gawe honhu hamwe, leka hawe na honhu halihela mazi." Naiwa hihyo. 10 Nguluwi nakahachema honhu aho halihela mazi "Misanga" na nhing'hano ya mazi kaichema "Bahali." Nakona kota inoga.

11 Hamba Nguluwi nakalonga, "Misanga joteze mizuchila jilingulela nyhule na migodi jilingulela mafuza gawele na nyhule, nyhule zilingulela mizuchila ja nhanzi yiyo." Naiwa hihyo. 12 Lelo misanga najoteza mizuchila jilingulela nyhule za chila nhanzi na migodi jilingulela mafuza gawele na nyhule za chila nhanzi, Nguluwi nakona kota inoga. 13 Naiwa matinazo, naiwa mitondo, zuwa lya kadatu.

14 Nguluwi nakalonga, "Mimwemwesa jiwe kilanga, jilekanize nemisi na nechilo, jilajile mihela ja mnvina na zuwa na miyaka, 15 na lumwemwese kilanga na kuimwemwesela isi." Naiwa hihyo. 16 Lelo Nguluwi nakadita mimwemwesa mili mikulu, wula ukulu ulangaze nemisi na wula udodo ulangaze nechilo, nakadita na nhondwe kahi. 17 Nguluwi nakawika mimwemwesa jiwele kilanga jimwemwesele isi, 18 iwe ilangaza nemisi na nechilo na kulekaniza lumuli na jiza. Nguluwi nakona kota inoga. 19 Naiwa matinazo, naiwa mitondo, zuwa lya kane.

20 Nguluwi nakalonga, "Mazi nagalavye vilundo vya vilumbigwe viwele na ukomu na ulanga umemezwe videje vilinguguluka." 21 Lelo Nguluwi nakalumba migongolo ming'hangala ja bahali, chila chilumbigwe cha mli bahali na nhanzi zawo. Nakalumba chila videje na nhanzi zawo. Nguluwi nakona kota inoga. 22 Nguluwi nakavitambichiza, nakalonga, "Milele leka monjezeche na muimemeze bahali na videje navyo vyonjezeche muisi." 23 Naiwa matinazo, naiwa mitondo, zuwa lya kahano.

24 Kahi Nguluwi nakalonga, "Isi iwe na vilumbigwe vyeng'ha viwele na ukomu, vilingudimigwa na vilingikala kisolo na vilingutambala, chila chilumbigwe kwa nhanzi zake." Naiwa hihyo. 25 Lelo Nguluwi nakalumba nhanzi zeng'ha za migongolo ja kisolo na ja kufujigwa na vilingutambala. Nguluwi nakona kota inoga.

26 Hamba Nguluwi nakalonga, "Tumdite munhu kwa kiwhana na hetwe, yalongoze somba na videje na migongolo ja kufujigwa na vilumbigwe vyeng'ha vilingutambala." 27 Lelo Nguluwi nakamlumba munhu kwa kiwhana na heye. Ena, kwa kiwhana na heye nakamlumba. Nakawalumba mlume na mdala. 28 Nguluwi nakawatambichiza na kuwalonjela, "Muwe na wana na mwonjezeche na mkaimemeze isi yeng'ha na kuilongoza. Mlongoze somba na videje na chila chilumbigwe chiwele na ukomu chilingutambala muisi."

29 Hamba Nguluwi nakalonga, "Mlole, ndanguwapa chila izuchila muisi lilingulela nyhule na chila igodi lilingulela mafuza gawele na nyhule, mafuza gake na nyhule zake zowa chilyo cha hemwe. 30 Najo migongolo jeng'ha na videje vyeng'ha na vilumbigwe vilingutambala, ena chila chilumbigwe chiwele na ukomu, chilyo chawo chowa mahamba geng'ha ga mizuchila." Naiwa hihyo. 31 Nguluwi nakona chila chinhu choyaditile kota ndo chinoga ng'hatu. Naiwa matinazo, naiwa mitondo, zuwa lya sita.