1 Lelo Mkulu Nguluwi nakamlonjela Abulamu, "Uche kuli isi ayi youlingikala sambi. Luleche lukolo lwa mhaza wa hegwe na ivyazi lyake, ulute kuli isi yondikulajila.

2 "Ndokudita hegwe uwe nhanzi ng'hulu,

ndokutambichiza na kulikwiniza itagwa lyako,

leka nagwe uwe utambichizo kwa wanji.

3 Yawele kokutambichiza, nani ndomtambichiza,

yawele kokupanjila, nani ndompanjila.

Kwa kukolela hegwe, nhanzi za isi zeng'ha zotambichizwa."

4 Lelo Abulamu nakoka kota Mkulu Nguluwi vyoyamlajize, naye Loti nakaluta hamwe na heye. Abulamu nakoka Halani loyawele na miyaka makumi saba na jihano (75). 5 Abulamu nakamhola Salai, mchewake na Loti, mwana wa mng'holoze, hamwe na lufufu lwao lweng'ha na wanhu weng'ha wawele wawapatile ako Halani, nawoka kuluta kuli isi ya Kanaani. Lowenjile kuli isi ya Kanaani, 6 Abulamu nakalutilila na majendo mbaka kuli muji ulinguchemigwa Shekemu, hamba nakawika kambi kuli honhu Helile hawele na igodi likulu lilinguchemigwa Mole. Mhela awo, Wakanaani nawali ndo wenyeng'haye wa isi ayo. 7 Hamba Mkulu Nguluwi nakamlawila Abulamu, nakamlonjela, "Lulelo lwa hegwe ndolupa isi ayi." Lelo Abulamu nakazenga honhu ha kulavila nhambiko honhu aho kwa vila Mkulu Nguluwi nayali yamlawile. 8 Hamba Abulamu nakoka, nakalutila kuli isi ya vidunda kolilawilaga isanya mwa Beteli, nakawika kambi hagati ha muji wa Beteli, ubanzi wa kolizinjilaga isanya na muji wa Ayi, ubanzi wa kolilawilaga isanya. Aho kahi nakamzenjela Mkulu Nguluwi honhu ha kulavila nhambiko na kumlanda kwa itagwa lyake. 9 Hamba Abulamu nakalutilila na majendo kulutila ubanzi wa Negebu.

10 Mhela awo, lufemba nalulawila muisi. Ahyo Abulamu nakaganigwa kuluta Misili na kikala ako kwa mhela uchefu, kwa vila kuli isi ya hewo nakwali haduhu chilyo. 11 Loyawele habehi kufika Misili, Abulamu nakamlonjela Salai mchewake, "Ndanguvizela kota hegwe ndo mdala unojile na uwele na kumeho kunojile. 12 Wamisili howokona wolonga, ‘Ayu ndo mchewake,’ hamba wong'hopola, ila hegwe wokuleka mkomu. 13 Lelo walonjele kota hegwe ndo lumbulyangu leka wanditile ganojile, nani ndolechigwa ndiwele mkomu kwa chiwalo cha hegwe." 14 Lelo Abulamu loyafichile kuli isi ya Misili, wenyeng'haye wa ako nawamona Salai kota ndo mdala yanojile lukami. 15 Wang'hangala wa Falao lowamuwene Salai, nawamlonjela Falao ndaze Salai vyoyanojile. Hamba Salai nakahilikwa haluga ha Falao. 16 Kwa chiwalo cha Salai, Falao nakamditila ganojile Abulamu. Ahyo Falao nakamha Abulamu ming'holo na mhene na misenga na midogowi na vitumagwa walume na wadala na ngamiya.

17 Ila Mkulu Nguluwi nakamgaza Falao na wanhu weng'ha wawele kuli ng'handa ya heye kwa kuwadita wawe na matamwa, kwa chiwalo cha Salai, mche wa Abulamu. 18 Falao nakamchema Abulamu, nakamuuza, "Ndo chinhu chachi achi chounditile? Lekachoni hundonjele kota Salai ndo mchewako? 19 Lekachoni nakulonga kota ndo lumbulyo, mbaka nandimhola yawe mchewangu? Lelo, mchewako ayu aha, umhole wuche." 20 Hamba Falao nakawalajiza wanhu wa heye wamhiliche Abulamu mbaka hanze ha isi kuno yawele na mchewake na lufufu lwake lweng'ha.