1 Abulamu nakoka kuli isi ya Misili, nakahiluka Negebu kuno yawele na mchewake na lufufu lwa heye lweng'ha hamwe na Loti. 2 Mhela awo, Abulamu nayali na lufufu ng'hatu. Nayali na migongolo minji na sendi na zahabu. 3 Nakalutilila na majendo kulawa Negebu mbaka Beteli. Nakafika honhu hawele nayali yawichile kambi ya chibumuli aho hamwande, hagati ha Beteli na Ayi, 4 na nayali yazenjile honhu ha kulavila nhambiko. Aho Abulamu nakamfugamila Mkulu Nguluwi. 5 Loti yawele nakelongoza na Abulamu, naye nayali na ming'holo na misenga na mihema. 6 Nawali na migongolo minji lukami, mbaka nawalemwela kikala hamwe kuli isi yila. 7 Lelo nakulawila kilewa hali wadimi wa Abulamu na wadimi wa Loti. Mhela awo, Wakanaani na Wapelisi ndo nawali wochikala kuli isi ayo.

8 Lelo Abulamu nakamlonjela Loti, "Haleche kuwa na kilewa hali hetwe na hali wadimi wa hegwe na wadimi wa heni, kwa vila hetwe twa ivyazi limwe. 9 Ulole isi ayi yeng'ha. Ahyo toweza kibagula. Wone koluta kumoso, heni ndoluta kudilo, houluta kudilo, heni ndoluta kumoso."

10 Loti nakalola, nakalyona ibindi lya lwanda lwa Yolodani, nakalyona kota lina mazi ga kuhega chila honhu kota kamgunda ka Mkulu Nguluwi na kota isi ya Misili kuli ubanzi wa Soali. Mbuli ayi nailawila mhela Mkulu Nguluwi loyawele yang'hali kujidumya miji ja Sodoma na Gomola. 11 Lelo, Loti nakahagula honhu heng'ha ha ibindi lya lwanda lwa Yolodani mbaka kolilawilaga isanya. Ahyo ndo vyowebagule. 12 Abulamu nakasigala muisi ya Kanaani, naye Loti nakekala hagati ha miji jiwele kuli ibindi, nakaluta kikala habehi na Sodoma. 13 Wanhu wa Sodoma nawali wehile, nawali wodita gehile ng'hatu kwa Mkulu Nguluwi.

14 Loti loyebagule na Abulamu, Mkulu Nguluwi nakamlonjela Abulamu, "Ulole banzi zeng'ha, ziwele ndo kasikazini na kusini na kolilawilaga isanya na kolizinjilaga isanya. 15 Isi ayi yeng'ha youlinguyona ndokupa hegwe na walelwa wa hegwe leka iwe ya hemwe mazuwa gose. 16 Walelwa wa hegwe ndowadita wawe wenji lukami mbaka wawe hawalinguweza kuwazigwa kota nhimbwisi ya kuli isi vyohailinguweza kuwazigwa. 17 Lelo, winuche leka ujende kuli isi ayi yeng'ha kwa vila ndokupa hegwe." 18 Baho, Abulamu nakosa ihema lyake, nakaluta kikala habehi na igodi likulu lya Mamle kula Hebuloni, ako nakamzenjela Mkulu Nguluwi honhu ha kulavila nhambiko.