1 Mhela awo, mndewa Amlafeli wa Shinali na mndewa Alioko wa Elasali na mndewa Kedolilaomeli wa Elamu na mndewa Tidali wa Goiimu, 2 nawetowa ngondo na Bela, mndewa wa Sodoma na Bilisha, mndewa wa Gomola na Shinabu, mndewa wa Adima na Shemebeli, mndewa wa Seboimu na mndewa wa muji ulinguchemigwa Bela, uwele sambi wanguchemigwa Soali. 3 Wandewa awo wahano nawawakungajiza hamwe wamizi wa hewo kuli ibindi lya Sidimu, liwele ndo Bahali ya Mwino. 4 Nawamhulichiza mndewa Kedolilaomeli kwa mhela wa miyaka kumi na mbili, ila loufichile mwaka wa kumi na tatu, nawamhinduka. 5 Loufichile mwaka wa kumi na nne, mndewa Kedolilaomeli na wala wandewa wayage nawoya kuwatowa wanhu wa Lefaimu, ako Ashitaloti-kalinaimu na Wasusimu, ako Hamu na Waemi, ako Shawe-kiliataimu 6 na Waholi, ako kuli isi ya vidunda vya Seili, nawawawinga mbaka Elipalani, habehi na chiwala. 7 Hamba nawahiluka kumbele mbaka Enimishipati, honhu halinguchemigwa kahi Kadeshi, nawaitowa isi yeng'ha ya Waamaleki na kuwasumya Waamoli wawele nawali wochikala Hasasoni-tamali.

8 Hamba Bela, mndewa wa Sodoma na Bilisha, mndewa wa Gomola na Shinabu, mndewa wa Adima na Shemebeli, mndewa wa Seboimu na mndewa wa muji wa Bela, nawaluta kuli ibindi lya Sidimu, 9 kitowa na Kedolilaomeli, mndewa wa Elamu na Tidali, mndewa wa Goiimu na Amlafeli, mndewa wa Shinali na Alioko, mndewa wa Elasali. Wandewa wane nawetowa na wandewa wahano. 10 Ibindi lya Sidimu nalyali limemile misimo ja lami, ahyowamizi wa wandewa wa Sodoma na Gomola lowawele woibilima ngondo, nawatumbuchila mumo, ila wanji nawabilimila kuli isi ya vidunda. 11 Wala wamizi wa wandewa wahano lowabilime, wamizi wa wandewa wane nawasumya ngondo yila. Ahyo nawahola lufufu lweng'ha lwa Sodoma na Gomola na hamwe vilyo vyeng'ha. 12 Nawamibata Loti, mwana wa mng'holoze Abulamu, yawele nayali yochikala Sodoma. Nawamhola heye hamwe na lufufu lwake lweng'ha.

13 Munhu yumwe yawele nakasulupuka na kubilima, nakaluta kumlonjela Abulamu, Muebulaniya, yawele nayali yochikala habehi na miyaloni ja Mamle, Mwamoli. Mamle nayali mng'holoze Eshikoli na Aneli. Weng'ha nawali wawichile ilagano na Abulamu. 14 Abulamu loyahuliche kota mwana wa mng'holoze nakaholigwa na kuhilikwa kuli upogozi, nakawachema wamizi wa heye wazidahe kitowa ngondo miya tatu na kumi na nane (318), wawele nawapondigwa ku ng'handa ya heye na kuwawinza wala wang'honyo mbaka kuli muji wa Dani. 15 Loifichile nechilo Abulamu nakawagawanula wamizi wa heye kuli vilundo na kuwatowa wang'honyo wa heye na kuwasumya. Wang'honyo wa heye wanji nawabilimila kuli muji wa Hoba, kasikazini mwa muji wa Damasiko. 16 Lelo Abulamu nakahiluka na lufufu lweng'ha naluholigwe na wang'honyo. Nakamgombola Loti na lufufu lwake, hamwe na wadala na wanhu wanji wawele nawaholigwa na kuhilikwa kuli upogozi.

17 Abulamu loyahiluche kulawa kumsumya Kedolilaomeli, mndewa wa Elamu na wayage, mndewa wa Sodoma kuluta kumbochela kuli ibindi lya Shawe, liwele nalyali lichemigwa Ibindi lya Mndewa. 18 Naye Melikisedeki, mndewa wa muji wa Salemu, yawele nayali mtambika wa Nguluwi Yawele Kuchanya ng'hatu, nakegala mibumunda na divai, 19 nakamtambichiza Abulamu yolonga,

"Abulamu yatambichizwe na Nguluwi Yawele Kuchanya ng'hatu,

yalumbile ulanga na isi.

20 Yatogoligwe Nguluwi Yawele Kuchanya ng'hatu,

yawele nakawawika wang'honyo wa hegwe mmoko mwako."

Naye Abulamu nakamha Melikisedeki ndolendole ya heye honhu hamwe ha kumi ha vinhu vyeng'ha viwela nakavihola kulawa kuli ngondo.

21 Lelo mndewa wa Sodoma, nakamlonjela Abulamu, "Umhe heni awo wanhu, ila vinhu vyeng'ha uvihole." 22 Ila Abulamu nakamlonjela mndewa wa Sodoma, "Ndangilaha kwa Mkulu Nguluwi, Nguluwi Yawele Kuchanya ng'hatu, yalumbile ulanga na isi, 23 kota sihola uzi ne ng'weso ya makwamba kulawa kuli vinhu vyeng'ha vya hegwe, leka hamba uleche kidaya na kulonga kota nandimdita Abulamu yawe na lufufu. 24 Lelo sihola chinhu choneche, ila vila vinhu viwele wasongolo wa heni nawalya na chasi cha wala wawele nawali hamwe na heni, wawele ndo Aneli na Eshikoli na Mamle, wawele wanguganigwa kupegwa."