1 Mhela Abulamu loyawele na miyaka makumi tisa na tisa (99), Mkulu Nguluwi nakamlawila na kumlonjela, "Heni ndo Nguluwi Mbele na Mong'ho. Uwinze malajizo ga heni leka wikale kwa kugoloka. 2 Nani ndolidita ilagano na hegwe na kukonjezela ng'hatu lulelo lwako." 3 Lelo Abulamu nakafugama naye Nguluwi nakamlonjela, 4 "Ilagano liwele ndolidita na hegwe lyowa kota ali. Kowa mhaza wa nhanzi nyinji. 5 Kulawa sambi huchemigwa kahi Abulamu, ila kochemigwa Abulahamu, kwa vila nandikudita uwe mhaza wa nhanzi nyinji. 6 Ndokudita uwe na walelwa wenji, nawo wowa isi ng'hulu na wamwe wa hewo wowa wandewa. 7 Ndolitawiza ilagano lya heni na hegwe na lulelo lwa hegwe na lulelo lwawo lweng'ha ne kuduma. Nani kahi ndowa Nguluwi wa hegwe na Nguluwi wa lulelo lwako mazuwa gose. 8 Ndokupa hegwe na walelwa wa hegwe isi ayi youlingikala kota mjenzi. Isi yeng'ha ya Kanaani yowa ya walelwa wa hegwe, nani ndowa Nguluwi wa hewo."

9 Hamba Nguluwi nakamlonjela Abulahamu, "Kwa banzi ya hegwe, hegwe kolibatilila ilagano lya heni, hegwe na lulelo lwako lweng'ha na lulelo lwao lweng'ha. 10 Ali ndo ilagano loulibatilila kuli heni na hegwe na lulelo lwako, chila mlume hali hemwe imgana yenjile ikumbi. 11 Mokwinjila ikumbi, ayi ndo yowa ulajilo wa ilagano lya heni na hemwe. 12 Chila mwana mlume wa mazuwa nane hali hemwe imgana yenjile ikumbi. Chila mlume kuli lulelo lwenu, yawe munhu yapondigwe mng'handa mwenu ama yaguligwe kwa sendi za hemwe kulawa kwa mjenzi yohawele lulelo lwenu. 13 Ena, chila yumwe wa hewo yapondigwe kuli ng'handa ya hegwe na yaguligwe kwa sendi za hegwe ndangukomya, imgana yenjile ikumbi. Acho ndo chilajilo cha ilagano lyangu kuli ng'huli za hemwe, ilagano lya mazuwa gose ne kuduma. 14 Mlume yoneche yohenjile ikumbi kobaguligwa na wanhu wa heye, kwa vila nakabena ilagano lya heni."

15 Hamba Nguluwi nakamlonjela Abulahamu, "Kuwala mdala wa hegwe, humchema kahi itagwa lyake Salai, ila itagwa lyake lyowa Sala. 16 Ndomtambichiza, naye kokupondela mwana mlume. Ena ndomtambichiza Sala, naye kowa mamo wa nhanzi nyinji na wandewa wa isi wolawa kwa heye." 17 Aho Abulahamu nakafugama, nakaseka mnhumbula mwa heye yochijesa, "Hambi, yokomya ng'hatu mwana kupondigwa na ng'hongoloka wa miyaka miya? Na ndaze, Sala yawele na miyaka makumi tisa, koweza kuponda mwana?" 18 Lelo Abulahamu nakamlonjela Nguluwi, "Na uwe ukundile ilagano alyo na uwe uliwichile kwa Ishimaeli." 19 Nguluwi nakamwidichila, "Hebu, ila mdala wa hegwe Sala kokupondela mwana mlume, nagwe komchema Isaka. Ndoliwika goya ilagano lyangu kwa heye na walelwa wa heye, naliwe ilagano lya mazuwa gose.

20 "Nyhulika mbuli ya kulanda kwa hegwe Ishimaeli. Ndomtambichiza na kowa na wana wenji na kumonjezela ng'hatu. Ishimaeli kowa mhaza wa wandewa kumi na weli, nani ndomdita yawe mhaza wa nhanzi ng'hulu. 21 Ila ilagano lyangu lyotawizwa kwa Isaka yawele kokupondela Sala mwaka ukuya mhela kota awu." 22 Lelo Nguluwi loyasindile kulonga, nakamleka Abulahamu, nakahiluka kilanga.

23 Aho, Abulahamu nakamwinjiza ikumbi mwanage Ishimaeli na kuwenjiza ikumbi walume weng'ha nawapondigwe mng'handa mwake na waguligwe kwa sendi za heye, nakawenjiza ikumbi weng'ha zuwa lilila kota Nguluwi navyoyamlajize. 24 Abulahamu nayali na miyaka makumi tisa na tisa (99) naloyenjizwe ikumbi 25 na Ishimaeli mwanage nayali na miyaka kumi na midatu (13) naloyenjizwe ikumbi. 26,27 Abulahamu na mwanage Ishimaeli, hamwe na walume weng'ha wa ng'handa ya heye na wanhu weng'ha nawapondigwe mng'handa mwake na wala waguligwe kwa sendi za heye nawenjizwa ikumbi zuwa lilila.