1 Wanhu lowaluche konjezeka muisi na kuwa na wahinza, 2 wahilisi wa Nguluwi* nawawona awo wahinza wa wanhu ndo wenolije ng'hatu, wawahola wala wawaganile na kuwa wadala wawo. 3 Aho Mkulu Nguluwi nakalonga, "Muhe wa heni hauchikala mgati mwa munhu mazuwa gose, kwa vila heye ndo wa kubagama hela. Lelo hochikala lukami mzidi wa miyaka miya imwe na makumi meli." 4 Kuli mhela awo nakwali na minhu muisi jiwele ndo lulelo lwa wahilisi wa Nguluwi na wahinza wa wanhu. Awo ndo wanhu wawele nawali na mong'ho na walingutogoligwa aho katali, nawachemigwa Wanefili.

5 Mkulu Nguluwi loyauwene winji wa wihe wa wanhu muisi na kota chila choyajesile mnhumbula mwa heye mhela weng'ha ndo wihe hela, 6 ahyo nakawa na masinzo ng'hatu kwa kumlumba. Mkulu Nguluwi nayali yong'ung'uta ng'hatu mnhumbula mwa heye, 7 ahyo Mkulu Nguluwi nakalonga, "Ndomwajiliza munhu yondimlumbile. Kahi ndokwajiliza migongolo na vilumbigwe vilingutambala na videje. Ndina masinzo ng'hatu kwa vila nandivilumba." 8 Ila Mkulu Nguluwi nakanojezwa na Nuhu.

9 Ayi ndo mbuli ya Nuhu, yawele heye yaliyeka nayali yalihela nongwa na yalingumkunda Nguluwi kuli mhela wa heye weng'ha wa kikala kwa heye. Ahyo Nuhu na Nguluwi nawegana. 10 Nuhu nayali na wana wadatu walume, wawele ndo Shemu na Hamu na Yafeti. 11 Nguluwi nakayona isi kota yiha ng'hatu na naimema wihe na ivuche. 12 Ena, Nguluwi nakayona isi kota nayiha ng'hatu, kwa vila chila munhu nakawinza nzila ya heye yihile.

13 Nguluwi nakamlonjela Nuhu, "Nanuwila kuwadumya wanhu weng'ha kwa vila nawaimemeza isi wihe. Ena, ndowadumya ng'hatu hamwe na isi yeng'ha. 14 Lelo ugongomanye safina kwa mbawo zinojile. Ugawanule vihengo mgati na ubakalize lami mgati na kunze. 15 Koidita iwe kota hino, ulefu uwe wa utali wa mita miya imwe na makumi gadatu na zidatu na ugazi wa mita makumi meli na mbili na mita kumi na zidatu kuluta kuchanya. 16 Safina ayo iwe na vinduwiko vidatu. Hagati mwa safina ayo kuwe na chiswiswili cha fudi sentimita makumi gane na zine kwa nzingo za hafungo mwa chinduwiko acho na lwizi hafungo. 17 Ndochigala nhonya ng'hulu na kuvidumya vinhu vyeng'ha viwele vikomu muisi. Chila chinhu muisi chodumigwa. 18 Ila ndowika ilagano na hegwe. Kokwinjila kuli safina, hegwe na mche wako hamwe na wanago na wache wawo. 19 Nagwe kokwinjiza kuli safina chila nhanzi ya vilumbigwe, vili vili chilume na chidala, leka viwe vikomu hamwe na hegwe.

20 "Chila nhanzi ya videje na chila nhanzi ya igongolo na chila nhanzi ya chilumbigwe chilingutambala, vili vili leka kuviwika viwe vikomu. 21 Kahi uhole vilyo vyeng'ha vilinguligwa na uviwiche kwa chiwalo cha chilyo cha hemwe na vilumbigwe avyo." 22 Nuhu nakadita chila chinhu kota Nguluwi vyoyamlajize.