1 Nguluwi nakamtambichiza Nuhu na wanage, yolonga, "Mkalele, mwonjezeche, mkaimemeze isi yeng'ha. 2 Migongolo jeng'ha na videje vyeng'ha na vilumbigwe vyeng'ha vilingutambala muisi na somba zeng'ha zowa na lunhwinhwi na zowadumba hemwe. Weng'ha nawawichigwa hali ludali lwa hemwe. 3 Migongolo jeng'ha jiwele na ukomu jowa chilyo cha hemwe, kota vila vyondiwapele mizuchila leka jiwe chilyo cha hemwe. 4 Ila mleche kulya miwunde jiwele na danda, kwa vila ukomu wamumo mli danda. 5 Danda ya ukomu wa hemwe, kwa chila igongolo na wanhu. Yomkopola myage, naye kanguganigwa kukopoligwa.

6 "Yalingubohola danda ya munhu,

danda ya heye yoboholigwa na munhu,

kwa vila kwa munhu nakalumbigwa kiwhana na Nguluwi.

7 Ahyo mponde leka monjezeche, mponde kwa winji leka muimemeze isi yeng'ha."

8 Hamba Nguluwi nakamlonjela Nuhu na mwanage, 9 "Ndanguwika ilagano lya heni na hemwe na lulelo lwa hemwe 10 na vilumbigwe vyeng'ha viwele na ukomu na videje na migongolo ja kudimigwa na ja kisolo, vilumbigwe vyeng'ha vilawile mli safina hamwe na hemwe. 11 Ndanguwika ilagano lya heni na hemwe kota sividumya kahi vilumbigwe vyeng'ha viwele na ukomu ama kudumya chila chinhu muisi kwa mazi tendema kota vyonditile aho hamwande." 12 Kahi Nguluwi nakalonga, "Awu ndo ulajilo wa ilagano lyondilingudita na hemwe na chila chilumbigwe chiwele na ukomu, chiwele hamwe na hemwe kwa lulelo lweng'ha lulinguya. 13 Ndanguwika ipinde lya heni kuli ng'hungugu kuli ulanga. Nawo wowa ulajilo wa ilagano lya heni na isi yeng'ha. 14 Hala hondiigubika isi kwa ng'hungugu na alyo ipinde lya nhonya holyoneka kuli ng'hungugu, 15 ndolikumbuchila ilagano lyangu na hemwe na vilumbigwe vyeng'ha viwele vikomu. Mazi hagomema ng'hatu na kuvidumya vilumbigwe vyeng'ha viwele vikomu. 16 Alyo ipinde holilawila kuli ng'ungugu, ndolyona na kulikumbuchila ilagano alyo lya mazuwa gose kwa heni na vilumbigwe vyeng'ha viwele vikomu muisi." 17 Nguluwi nakamlonjela Nuhu, "Awu ndo ulajilo wa ilagano lyondiliwichile hali heni na vilumbigwe vyeng'ha viwele vikomu muisi."

18 Wana wa Nuhu walawile mli safina nawali Shemu na Hamu na Yafeti. Hamu nayali mhaza wa Kanaani. 19 Awo ndo wana wadatu wa Nuhu, kulawa kwa wana awo wanhu nawenela isi yeng'ha.

20 Nuhu nayali mlimi, naye nakawa munhu wa mwaluko kulima mgunda wa zabibu. 21 Nakanwa divai kulawa kuli zabibu zoyalimile, nakagala, hamba nakawasa mwazi mli chibumuli cha heye. 22 Hamu mhaza wa Kanaani, nakawona umwazi wa mhaza wa heye, nakalawa kunze na kuwalonjela wang'holoze weli. 23 Ila Shemu na Yafeti nawahola nguwo, nawatandazula mmayega mwawo, nawaluta chimbelembele na kuugubika umwazi wa mhaza wa hewo. Nawalola kufungo, hawauwene umwazi wa mhaza wa hewo. 24 Nuhu loyalilimche na kuvizela choyaditilwe na mwanage mdodo, 25 nakalonga,

"Kanaani yapanjilwe!

Kowakolela mijito wang'holoze mzidi wa chitumagwa yunji yoneche yula wa wang'holoze."

26 Kahi nakalonga,

"Mkulu Nguluwi mtambichize Shemu,

Kanaani yawe mpogozi wa Shemu.

27 Nguluwi yamtambichize Yafeti,

lulelo lwake lonjezeche,

na kwenela kuli isi yeng'ha."

28 Loimalile nhonya ya mazi tendema, Nuhu nakekala kwa miyaka miya tatu na makumi gahano (350), 29 hamba Nuhu nakabagama loyawele na miyaka miya tisa na makumi gahano (950).