1 Ayi ndo mbuli ya lulelo lwa Nuhu, Shemu na Hamu na Yafeti. Awa wadatu nawali na wana loimalile nhonya ya mazi tendema.

2 Wana walume wa Yafeti nawali Gomeli na Magogu na Madayi na Yavani na Tubali na Mesheki na Tilasi. 3 Wana walume wa Gomeli nawali Ashikenasi na Lifati na Togama. 4 Wana walume wa Yavani nawali Elisha na Talishishi na Kitimu na Lodanimu. 5 Awo nawali ndo wanhu wa mwaluko ng'hatu wawele nawenela honhu ha mwhani. Chila lulelo naluwa nhanzi na chila nhanzi nayali na ndonga yake na lukolo lwake na honhu hake.

6 Wana walume wa Hamu nawali Kushi na Misili na Puti na Kanaani. 7 Wana walume wa Kushi nawali Seba na Havila na Sabuta na Lahama na Sabuteka. Wana walume wa Lahama nawali Sheba na Dedani. 8 Kushi nayali mhaza wa Nimulodi, yawele nayali ndo mwamizi wa mwaluko muisi yeng'ha kuwa na mong'ho ng'hatu. 9 Nayali mpelembi yawele na mong'ho hali Mkulu Nguluwi. Acho ndo chiwalo cha kuwa na ulonzi ulingulonga, "Yakudite uwe kota Nimulodi, mpelembi yawele na mong'ho hali Mkulu Nguluwi." 10 Miji ja mwaluko kulongoza kuli undewa wa heye, najali ndo Babuloni na Eleki na Akadi na Kalinehi. Miji ajo najali kuli isi ya Shinali. 11 Kulawa ako, Nimulodi nakaluta Ashulu, nakazenga miji ja Ninawi na Lehoboti-ili na Kala 12 na Leseni, uwele hagati ha Ninawi na Kala. Kala nawali ndo muji ukulu.

13 Misili nayali sekulu wa Waludi na Waanamu na Walehabi na Wanafutuhi 14 na Wapatilusi na Wakasiluhimu, wawele ndo mwaluko wa Wafilisti na Wakafutoli.

15 Kanaani nayali na wana walume weli, wawele ndo Sidoni, yawele ndo wa mwaluko na Heti. 16 Kanaani kahi nayali sekulu wa Wayebusi na Waamoli na Wagiligashi 17 na Wahivi na Waaliki na Wasini 18 na Waaluvadi na Wasemali na Wahamati. Hamba wanhu wa ng'holo zilivinji za Kanaani nawasambaluka, 19 ahyo na honhu ha isi ya hewo nayali kulawa Sidoni kulutila kusini mbaka Gelali mbaka Gasa na kulutila kolilawilaga isanya mbaka Sodoma na Gomola na Adima na Seboimu mbaka Lasha. 20 Awo ndo walelwa wa Hamu. Nawali na ng'holo zawo na ndonga zawo na isi zawo.

21 Shemu, mkulugwe Yafeti, nayali mwana wa Ebeli. 22 Wana walume wa Shemu nawali Elamu na Ashulu na Alipakisadi na Ludi na Alamu. 23 Wana walume wa Alamu nawali Usi na Huli na Geteli na Mashi. 24 Alipakisadi nayali mhaza wa Shela na Shela nayali mhaza wa Ebeli. 25 Ebeli nayali na wana walume weli, wa mwaluko nakamchema Pelegi kwa vila mhela awo wanhu wa isi nawali wasambaluche na wa keli nayali yochemigwa Yokitani. 26 Yokitani nayali mhaza wa Alimodadi na Shelefu na Hasalimaweti na Yela 27 na Hadolamu na Usali na Dikila 28 na Obali na Abimaeli na Sheba 29 na Ofili na Havila na Yobabu. Awo weng'ha nawali ndo wana walume wa Yokitani. 30 Isi iwele nawekala nayenela kulawa Mesha mbaka Sefali kuli isi ya vidunda vya kolilawilaga isanya. 31 Awo ndo walelwa wa Shemu na wanhu wa isi za hewo na ulonzi wa hewo na kuli isi za hewo na undewa wa hewo.

32 Ayi ndo mbuli ya lukolo lwa wana wa Nuhu, kwa ivyazi lya hewo na ulonzi wa hewo. Kulawa kwa wanhu awo nawenela kuli isi yeng'ha, kulawa loimalile nhonya ya mazi tendema.