1 Wala wahilisi weli nawafika muji wa Sodoma matinazo. Loti nayawele yekalise hali lwizi lwa muji wa Sodoma, loyawawene nakenuka kuwabochela, nakenamiza mbaka hasi 2 na kulonga, "Wakulu wa heni, muye hakaye hangu heni chitumagwa wa hemwe. Moweza kuhovuga magulu na kuwasa kwa heni nechilo ya lehano. Lufuku ng'hanu hananya moweza kulutilila na majendo ga hemwe." Ila hewo nawalonga, "Hebu, hetwe towasa honhu hawele hagati ha muji." 3 Loti nakawadedeza lukami, hamba nawakunda, nawahinduka na kwinjila mng'handa mwake. Loti nakawawichila chilyo, nakapanila mibumunda johajiwichigwe usaso, nawalya.

4 Ila nalowang'hali kuwasa nechilo, walume weng'ha wa muji wa Sodoma na wasongolo na wasekulu, nawaizunguluta ng'handa ya Loti. 5 Nawamchema Loti na kumuuza, "Wakohi wala walume wezile kwa hegwe? Walavye kunze. Twangugana kuwasa nawo."

6 Loti nakalawa kunze, nakapajila lwizi kumbele kwa heye, 7 nakawalonjela, "Wang'holozangu, ndanguwadedeza mleche kudita wihe awo. 8 Mlole, ndanawo wahinza weli wang'hali wasa na mlume. Mng'hundize ndiwape awo wahinza muwadite kota vyomgana. Ila mleche kuwaditila chinhu choneche chila walume awa kwa vila awa ndo wajenzi wawele hali wamizi wa heni."

9 Ila hewo nawalonga, "Hejela! Hegwe nakuya hano kota mjenzi na sambi kwangidita mtagusa. Lelo tokudita vibi kusinda awo wajenzi wa hegwe." Aho nawamkundujiza Loti kumbele behi na kuubegula lwizi lwa heye. 10 Ila wala wajenzi nawagolola moko gawo, nawamkwega Loti mng'handa na kupajila lwizi. 11 Hamba wawatowa kwa lumwemwesa lung'ang'ale kumeho na walemwela kulola walume weng'ha nawawele hali lwizi, wakulu kwa wadodo, mbaka nawapala kohi hawele na lwizi nahawauwene.

12 Wala wanhu weli nawamlonjela Loti, "Ndaze, kwanaye munhu yunji ahano, hanji wakasano ama wasongolo ama wahinza wa hegwe ama wanhu wanji wa ivyazi lyako walingikala hano, walavye honhu aha himahima, 13 kwa vila twahabehi kuudumya muji awu, kwa vila chililo chimfichile Mkulu Nguluwi kulawa kwa wanhu wa muji awu ndo chikulu ng'hatu, naye nakatulajiza tuye kuwadumya."

14 Lelo Loti nakawalutila wakasano wa heye, nakawalonjela, "Himahima! Mlawe honhu aha, kwa vila Mkulu Nguluwi koudumya muji awu." Ila hewo nawamona kota munhu yawele na idaba hela.

15 Lufuku, wahilisi nawamhimiliza Loti wolonga, "Ulilimche, muhole mchewako na awa wahinza wa hegwe weli mleche kubagama mhela muji awo hougazigwa." 16 Loti nayali yolema. Ila kwa vila Mkulu Nguluwi vyoyamonele isungu Loti, wala wahilisi nawamibata heye na mchewake na wahinza wa heye weli na kumlavya kunze ha muji ula. 17 Nalowawalavile kunze ha muji, mhilisi yumwe nakawalonjela, "Mbilime kwa kuulohola ukomu wa hemwe. Mleche kulola kumbele ama kwima mibindi. Mbilimile kuchidunda, mleche kubagama."

18 Loti nakawalonjela, "Hebu, wakulu wa heni! 19 Ndangukomya kota heni chitumagwa wa hemwe ndina igano lya kwimilila hameho henu, namwe miwonela isungu ng'hatu kwa kuulohola ukomu wa heni, ila kuchidunda ndo kutali lukami. Kubagama ako kofika nding'hali fika ako, nani ndobagama. 20 Mlole, kula kuna muji udodo uwele behi ndoweza kubilimila ako. Lelo mng'hundize mbilimile ako. Ula ndo muji udodo hela, na ako ndowa mkomu."

21 Naye nakamwidichila, "Goya, ndikukundiza kulanda kwa hegwe. Siudumya muji wouchemile. 22 Udite himahima. Ubilimile ako, nani siweza kudita chinhu choneche mbaka houfika ako." Lelo muji awo nauchemigwa Soali, ulinguzeleka kota udodo.

23 Isanya nalyali lilawile mhela Loti loyafichile hali muji wa Soali. 24 Aho ndo Mkulu Nguluwi nakalagaza hasi chiluli ching'ang'ale cha chikwatilo kulawa kilanga kwa muji wa Sodoma na Gomola, 25 nakajidunya miji ajo na ibindi lyeng'ha na wanhu weng'ha na mizuchila jeng'ha kuli misanga. 26 Ila mchewake Loti nayawele kumbele kwa Loti, nakalola kumbele, nakagaluka ibiwi lya mwino.

27 Loiwele lufuku, Abulahamu nakaluta honhu hoyawele yemile kumwando kwa Mkulu Nguluwi. 28 Loyali aho, nakalola hasi nzingo za Sodoma na Gomola na honhu heng'ha ha ibindi, kabubuwala vyoyaliwene iyosi likwina, iyosi kota itanuli ling'angala. 29 Nguluwi loyajidumile miji ja kibindi koyawele yochikala Loti, nakamkumbuka Abulahamu kwa kumlavya Loti kuli miji ajo, leka Loti yaleche kubagama hamwe na hewo.

30 Loti nakadumba kikala kuli muji wa Soali, lelo nakoka muji awo, heye hamwe na wahinza wa heye weli, nawaluta kikala mipalika kuchidunda. 31 Nalowawele ako, mhinza mkulu nakamlonjela lumbulye, "Mhaza wa hetwe nakalala na kuduhu mlume muisi wa kuwasa na hetwe kota vyoilinguganigwa kuli chihendo. 32 Lelo tumgalize mhaza kwa divai, leka tuwase naye na kukangaza lulelo kwa kuponda wana naye." 33 Nechilo ayo nawamgaliza mhaza wa hewo kwa divai, nayula mhinza mkulu nakaluta kuwasa naye. Ila mhaza wa heye nahavizelele mhela mhinza wa heye loyawasile naye ne loyochile.

34 Mitondo, yula mhinza wa mwaluko nakamlonjela yula mdodo, "Haucha nechilo heni nambasa na mhaza, lehano kahi tumgalize na divai, hamba hegwe uwase naye, leka hetwe twesa tukangaze lulelo kwa kuponda wana kwa mhaza wa hetwe." 35 Lelo nechilo ayo kahi nawamgaliza mhaza wa hewo kwa divai, hamba yula mhinza nakaluta kuwasa naye. Ila mhaza wa heye nahavizelele mhela mhinza wa heye hoyawasile naye ne loyochile. 36 Lelo wahinza weng'ha weli wa Loti nawawa na himila kwa kuwasa na mhaza wa hewo. 37 Yula mhinza wa mwaluko nakaponda mwana mlume, nakamchema Moabu. Ayo ndo mhaza wa Wamoabu mbaka lehano. 38 Yula mhinza mdodo kahi nakaponda mwana mlume, nakamchema Beni-ami*. Ayo ndo mhaza wa Waamoni mbaka lehano.