1 Izoka nalyali isugu kusinda migongolo jeng'ha ja kisolo jilumbigwe na Mkulu Nguluwi. Lelo izoka nalimlonjela ayo mdala, "Hambi Nguluwi nakalonga yokomya, mleche kulya mafuza ga igodi lyoneche kuli kamgunda?" 2 Mdala nakalidichila alyo izoka, "Toweza kulya mafuza ga igodi lyoneche kuli kamgunda, 3 ila Nguluwi nakalonga, ‘Mleche kulya mafuza ga igodi liwele hagati ha kamgunda, kahi mleche kulidoliza, leka mleche kubagama.’ " 4 Izoka nalimlonjela mdala, "Ndangukomya hambagama hebu. 5 Nguluwi nakalonga ahyo kwa vila nakavizela kota wone mulye mafuza ga igodi alyo mogubulilwa meho, namwe mowa kota Nguluwi, movizela ganojile na gehile."

6 Lelo mdala loyawene kota igodi alyo linoga kwa chilyo, lyangunojeza kumeho na kota linoga kwa kuwa na luhala, nakabawa ifuza lya igodi alyo, nakalya. Nakamha mlume wa heye naye kahi nakalya. 7 Baho du meho gawo nagagubuligwa, nawavizela kota wamwazi, ahyo nawehonela mahamba ga igodi lya ikuyu, weditila salule ya kuvala mchuno.

8 Matinazo, mhela wa kwesela mlubehelo, mlume ayo na mche wake nawahulika Mkulu Nguluwi yojenda kuli kamgunda, nawo nawevisa hagati ha migodi jiwele amo leka Mkulu Nguluwi yaleche kuwona. 9 Ila Mkulu Nguluwi nakamchema ayo mlume, "Kwa kohi?" 10 Naye nakamwidichila, "Nanyhulika kujendajenda kwa hegwe kuli kamgunda, nandumba na kivisa kwa vila nandali mwazi." 11 Mkulu Nguluwi nakamuuza, "Whaani yakulonjele kota kwa mwazi? Ndaze, nakulya ifuza lya igodi lyondikulonjele uleche kulya?" 12 Ayo mlume nakamwidichila, "Mdala youmhele yekale hamwe na heni ndo yamhele ifuza lya igodi alyo, nani nandilya."

13 Aho Mkulu Nguluwi nakamuuza ayo mdala, "Kudita choni hegwe?" Mdala nakamwidichila, "Izoka nalimbada, nani nandilya."

14 Hamba Mkulu Nguluwi nakalilonjela lila izoka,

"Kwa vila nakudita ahyo,

nakupanjilwa kusinda migongolo jeng'ha ja kufujigwa,

na migongolo jeng'ha ja kisolo.

Kwa lida kotambala,

na kulya nhimbwisi mazuwa gose ga ukomu wa hegwe.

15 Ndowika ung'honyo hali hegwe na ayo mdala,

hali lulelo lwako na lulelo lwake,

heye kochitowa chitwi cha hegwe,

nagwe kochitowa chisigino cha heye."

16 Hamba nakamlonjela mdala,

"Ndokonjezela usungu wa kuponda,

kwa usungu koponda wana,

kowa na maya na mlume wa hegwe,

ila heye kowa na ludali lwa kukulongoza."

17 Hamba nakamlonjela Adamu,

"Kwa vila hegwe nakumhulichiza mdala wa hegwe,

nakulya ifuza ga igodi lyondiwalajize mleche kulya,

ahyo, kwa wihe wa hegwe isi naipanjilwa.

Kwa kitunya kochipalila chilyo cha hegwe,

mazuwa gose ga ukomu wa hegwe.

18 Isi yokulelela miwa na migugu,

nagwe koganigwa kulya mizuchila.

19 Kwa chituguti cha hegwe kopala chilyo,

mbaka louhiluka kuli misanga koulawile,

kwa vila hegwe kwa misanga, na kuli misanga kohiluka."

20 Adamu nakamchema mche wa heye itagwa, "Hawa*," kwa vila nayali mamo wa wanhu weng'ha. 21 Mkulu Nguluwi nakawagongomanyila Adamu na mche wake ivalo lya igozi, nakawavaliza.

22 Hamba Mkulu Nguluwi nakalonga, "Lelo munhu nakawa kota yumwe hali hetwe, kanguvizela ganojile na gehile. Halinguganigwa kulya alila ifuza lya igodi lya ukomu, kwa vila wone yalye, kochikala mazuwa gose." 23 Lelo Mkulu Nguluwi nakamuwinga Adamu leka yalute kunze mwa kamgunda ka Edeni, leka yakalime kuli misanga moyalawile. 24 Nakamuwinga kunze na kuwawika wamizi, wawele ndo vilumbigwe viwele na mabawa kuli nzingo kolilawilaga isanya kuli kamgunda ka Edeni na ipanga lya chiluli liilinguhinduka ako na ako, nakwamila nzila ilingulutila kuli igodi lya ukomu.