1 Mkulu Nguluwi nakamkumbuka Sala, nakamditila kota vyoyelahile. 2 Abulahamu naloyali yalalile, Sala nakapata himila, nakampondela mwana msongolo, mhela wuwula Nguluwi woyalonjile. 3 Abulahamu nakamchema ayo mwana yampondile Sala itagwa lyake, Isaka. 4 Isaka loyafichile mazuwa nane, Abulahamu nakamwinjiza ikumbi kota Nguluwi vyoyalajize. 5 Abulahamu nayali na miyaka miya imwe (100), mhela Isaka naloyapondigwe. 6 Naye Sala nakalonga, "Nguluwi kangalila lusele, yoneche yohulika mbuli azi, koseka hamwe na heni." 7 Hamba nakonjezela kulonga, "Yalikohi nayahamlonjele Abulahamu kota heni Sala ndokonyeza wana? Kahi ndimpondela mwana msongolo kuli ulalilo wa heye."

8 Isaka nakawa mkulu, zuwa loyalechile kong'ha, Abulahamu nakadita mnvina ng'hulu.

9 Hamba Sala nakamona Ishimaeli, mwana wa Abulahamu yapondigwe na Hagali Mmisili, yoseka. 10 Sala nakamlonjela Abulahamu, "Umuwinje chitumagwa ayo mdala hamwe na mwanage. Kwa vila hohalila hamwe na mwana wa heni Isaka." 11 Mbuli ayi naimigalila masinzo lukami Abulahamu kwa vila Ishimaeli naye nayali mwanage. 12 Ila Nguluwi nakamlonjela Abulahamu, "Uleche kisinza kwa mbuli ya mwana ayu, ne ayo chitumagwa wa hegwe mdala. Lyoneche loyokulonjela Sala, udite, ndangukomya walelwa wa hegwe wondikulahile wolawa kwa Isaka. 13 Mbuli ya ayo mwana wa chitumagwa wa hegwe mdala ndomdita yawe mhaza wa nhanzi ng'hulu kwa vila heye naye ndo mwana wa hegwe."

14 Ahyo lufuku, Abulahamu nakahola chilyo na kajilo ka mazi, nakamha Hagali na kumdwika mmayega, nakamuwinga hamwe na mwanage. Hagali nakoka, kawa yojendajenda mchihulo Beeli-sheba.

15 Mazi nalogamalile mli kala kajilo, Hagali nakamuwasiliza mwanage hasi migodi. 16 Heye nakaluta hafungo, kekala utali wa kota magulu miya imwe (100) hino, yolonga mnhumbula mwa heye, "Inoga ndeche kumona mwanangu yobagama." Loyawele yekalise aho mwana nakaluka kulila.

17 Nguluwi nakamhulika mwana ayo yolila, mhilisi wa Nguluwi nakamchema Hagali kulawa kilanga, nakumlonjela, "Kuna nongwa yachi Hagali? Uleche kudumba, Nguluwi nakahulika lizi ya mwana ako kouwele. 18 Wime na umwinule mwana mibate goya mmoko mwa hegwe, kwa vila ndomdita yawe mhaza wa nhanzi ng'hulu." 19 Nguluwi nakamgubula Hagali meho, naye nakalyona izimbo lya mazi. Nakaluta kamemeza mazi mkajilo, kamnweza mwanage. 20 Nguluwi kawa hamwe na ayo mwana, naye nakalutilila kukula. Nakekala kuchihulo nakawa mlasa msale. 21 Nayali yochikala kuli chihulo cha Palani, mayake nakamhesela mdala kulawa isi ya Misili.

22 Mhela awo, Abimeleki hamwe na Fikoli, mkulu wa wamizi wa heye, nakamlutila Abulahamu na kumlonjela, "Nguluwi kahamwe na hegwe kwa chila chinhu choulingudita. 23 Lelo ndilahile kwa itagwa lya Nguluwi kota hunditila uhadi heni ama wana wa heni ama walelwa wa heni. Kota heni vyombele nojile kwa hegwe, hihyo nagwe uwe na igano lya kwimilila kwa heni na kwa isi ino youlingikala." 24 Abulahamu nakalonga, "Ndangilaha."

25 Mhela awo Abulahamu nayali yomng'ung'utila Abimeleki mbuli ya izimbo lya mazi liwele vitumagwa wa Abimeleki lowali wambochile. 26 Abimeleki nakamlonjela, "Heni sivizelele yalikohi yaditile hino, mbaka lehano hegwe hundonjele, ne heni nasinahulika mbuli azi mbaka lehano." 27 Abulahamu nakahola ing'holo na isenga nakamha Abimeleki nawo weli nawadita ilagano hewo kwa hewo. 28 Abulahamu nakabagula ming'holo myana midala saba. 29 Abimeleki nakamuuza Abulahamu, "Lekachoni kwangubagula ajo ming'holo midala saba?"

30 Abulahamu nakamwidichila, "Aji ming'holo midala saba ndangukupa kwa moko wa heni baha kota ulolezi kota heni ndo mbawile izimbo alino." 31 Lelo izimbo alyo nalichemigwa Beeli-sheba*, kwa vila weng'ha weli nawawika ilagano kwa kilaha honhu aho.

32 Ahyo nawadita ilagano ako Beeli-sheba. Abimeleki na Fikoli, mkulu wa wamizi wa heye, nakoka na kuhiluka kuli isi ya Wafilisti. 33 Abulahamu nakanyala igodi lilinguchemigwa tamalisiki ako Beeli-sheba, nakalanda kwa itagwa lya Mkulu Nguluwi, Nguluwi wa mazuwa gose. 34 Abulahamu nakekala isi ya Wafilisti mihela minji.