1 Mwaluko, wanhu weng'ha muisi nawali na ndonga imwe, nawali wolonga ulonzi ulingiwhana. 2 Lelo wanhu lowenule majendo kulawa kolilawilaga isanya, nawafika kuli isi ya chiwala ako Shinali, nawekala. 3 Hamba nawelonjela, "Lelo, tugongomanye matufali, tugasome goya kwa chiluli." Ahyo nawali na matufali honhu ha maganga na lami honhu ha ilongo. 4 Nawalonga, "Tizenjele muji na ilingo, liwele chinhembenhembe chake chofika mbaka kilanga leka tupegwe itagwa na kutogoligwa, tuleche kusambaluka kuli isi yeng'ha."

5 Lelo Mkulu Nguluwi nakalola hasi kuli honhu hao na ilingo lyowalinguzenga wanhu awo. 6 Mkulu Nguluwi nakalonga, "Wone wanhu wa isi imwe walingulonga ndonga imwe nawaluka kudita mbuli yino, lelo kwa chiwalo acho, chinhu choneche chowonuwila kudita, wochidita ne kulemwela. 7 Lelo tuduliche na kuiwifya ndonga ya hewo, leka waleche kikundiza." 8 Ahyo, Mkulu Nguluwi nakawasambalula honhu heng'ha muisi, nawo nawaleka kuuzenga muji wula. 9 Muji awo nauchemigwa Babuloni, kwa vila ako ndo Mkulu Nguluwi koyaiwifye ndonga ya hewo na kulawa ako Mkulu Nguluwi nakawasambalula wanhu chila honhu muisi.*

10 Ayi ndo mbuli ya lulelo lwa Shemu. Miyaka mili lojikolile kulawa nhonya ya mazi tendema, Shemu loyawele na miyaka miya imwe (100) nayali na mwana mlume yalinguchemigwa Alifakisadi. 11 Loyampatile Alufakisadi, Shemu nakekala miyaka miya jihano (500) na nakawa na wana wanji walume na wadala.

12 Alifakisadi nayali mhaza wa Shela, mhela awo nayali na miyaka makumi gadatu na jihano (35). 13 Loyampatile Shela, Alifakisadi nakekala miyaka miya zine na zidatu (403) na kuponda wana wanji walume na wadala.

14 Shela nayali mhaza wa Ebeli, mhela awo nayali na miyaka makumi gadatu (30). 15 Loyampatile Ebeli, Shela nakekala miyaka miya zine na zidatu (403) na kuponda wana wanji walume na wadala.

16 Ebeli loyawele na miyaka makumi gadatu na gane (34), nayali na mwana mlume yalinguchemigwa Pelegi. 17 Loyampatile Pelegi, Ebeli nakekala miyaka miya zine na makumi gadatu (430), nakapata wana wanji walume na wadala.

18 Pelegi loyawele na miyaka makumi gadatu (30), nayali na mwana mlume yalinguchemigwa Leu. 19 Loyampatile Leu, Pelegi nakekala miyaka miya mbili na tisa (209), nakapata wana wanji walume na wadala.

20 Leu loyawele na miyaka makumi gadatu na meli (32), nayali na mwana mlume yalinguchemigwa Selugi. 21 Loyampatile Selugi, Leu nakekala miyaka miya mbili na saba (207), nakapata wana wanji walume na wadala.

22 Selugi loyawele na miyaka makumi gadatu (30), nayali na mwana mlume yalinguchemigwa Naholi. 23 Loyampatile Naholi, Selugi nakekala miyaka miya mbili (200) nakapata wana wanji walume na wadala.

24 Naholi loyawele na miyaka makumi meli na tisa (29), nayali na mwana mlume yalinguchemigwa Tela. 25 Loyampatile Tela, Naholi nakekala miyaka miya imwe na kumi na tisa (119), nakapata wana wanji walume na wadala.

26 Tela loyawele na miyaka makumi saba (70), nakawa na wana walume wawele ndo Abulamu na Naholi na Halani.

27 Ayi ndo mbuli ya lulelo lwa Tela. Tela nayali na wana walume, wawele ndo Abulamu, Naholi na Halani. Halani nayali mhaza wa Loti. 28 Halani nakabagama kuli muji ulinguchemigwa Chalideya, mhela mhaza wa heye yang'hali mkomu. 29 Abulamu na Naholi weng'ha nawahesa. Mche wa Abulamu nayali yochemigwa Salai. Mche wa Naholi nayali yochemigwa Milika. Milika na mdodowe yalinguchemigwa Isika, nawali ndo wahinza wa Halani. 30 Salai nayali yalihela mwana kwa vila nayali mhende.

31 Tela nakamhola Abulamu, mwanage na Loti, mzukulu wake, yawele nayali ndo mwana wa Halani na Salai, mchewake Abulamu, nawoka weng'ha hamwe kulawa Uli, muji wa Wakalidayo, kuluta kuli isi ya Kanaani. Ila lowafichile kuli muji ulinguchemigwa Halani, nawekala amo. 32 Tela nakabagama ako Halani loyawele na miyaka miya mbili na jihano (205).