1 Adamu nakawasa na mche wake Hawa, naye Hawa nakawa na himila, nakamponda Kaini. Hawa nakalonga, "Nandimponda mwana msongolo kwa utanzi wa Mkulu Nguluwi." 2 Hamba nakamponda msongolo kahi yawele nakachemigwa Abeli, ayo Abeli nayali mdimi wa ming'holo na Kaini nayali mlimi. 3 Mhela umwenga loukolile, Kaini nakamlavila Mkulu Nguluwi nhambiko kulawa kuli mbena za heye, 4 naye Abeli nakamlavila Mkulu Nguluwi nhambiko ya lulelo lwa mwaluko lwa ming'holo na vihande vya mafuta. Mkulu Nguluwi nakanojezwa na Abeli na nhambiko ya heye, 5 ila nahanojezwe na Kaini na nhambiko ya heye. Lelo Kaini nakazudila ng'hatu na kumeho kwa heye nakwali kukwisimbale. 6 Mkulu Nguluwi nakamlonjela Kaini, "Lekachoni kwanguzudila na lekachoni kumeho kwa hegwe kukwisimbala? 7 Ndaze, wone udite ganojile hukundigwa? Ila wone haudita ganojile, gehile gangusunjilila hali lwizi, gangukugana kukulongoza, ila hegwe kwanguganigwa kugasumya."

8 Hamba Kaini nakamlonjela Abeli mng'holoze, "Tulute kutali kuli mgunda." Lelo lowalutile kumgunda Kaini nakamvaba Abeli mng'holoze na kumkopola. 9 Mkulu Nguluwi nakamuuza Kaini, "Mng'holozo Abeli kakohi?" Kaini nakamwidichila, "Heni sivizelele. Ndaze, heni nda mwamizi wa mng'holozangu?" 10 Mkulu Nguluwi nakalonga, "Nakudita choni? Danda ya mng'holozo ya kota lizi, yangundilila kulawa kuli misanga. 11 Lelo hegwe nakupanjilwa na kuwinjigwa mchanya mwa misanga jiwele ngubochela danda ya mng'holozo youmkopole. 12 Wone ulime misanga hajikugalila kahi mbena. Kowa munhu wa kulubaluba, yalihela honhu ha kikala kwa mhela winji."

13 Kaini nakamlonjela Mkulu Nguluwi, "Utaguso wa heni ndo ukulu ng'hatu, siweza kwimilila. 14 Ulole, lehano nakumbinga kuli misanga jiwele na mboto na kundita ndiwe kutali na meho ga hegwe. Lelo ndowa munhu wa kulubaluba, yalihela honhu ha kikala muisi, yoneche yombona kong'hopola." 15 Ila Mkulu Nguluwi nakamwidichila, "Hebu! Yoneche yawele kokukopola hegwe Kaini, kohilulilwa mala saba." Lelo Mkulu Nguluwi nakamuwika Kaini ulajilo wa kumdita munhu yoneche yawele komona Kaini yaleche kumkopola. 16 Hamba Kaini nakoka hali Mkulu Nguluwi, nakawa yochikala kuli isi ya Nodi kuli nzingo ya kolilawilaga isanya mwa kamgunda ka Edeni.

17 Kaini nakawasa na mche wa heye na mche ayo nakawa na himila, nakamponda Enoki. Kaini nakazenga muji nakauchema Enoki itagwa lya mwana wa heye. 18 Enoki nakawa mhaza wa Iladi, naye Iladi nakawa mhaza wa Mehuyaeli na Mehuyaeli nakawa mhaza wa Mesushaeli na Mesushaeli nakawa mhaza wa Lameki. 19 Lameki nakahesa wache weli, yumwe nakachemigwa Ada na yunji nakachemigwa Sila. 20 Ada nakamponda Yabali yawele mhaza wa wadimi walingikala kuli mihema. 21 Mng'holoze nayali Yubali, ayo nayali mhaza wa hewo walingutowa ching'weleng'wele na kupemba mluli. 22 Sila naye nakamponda Tubali-kaini, yawele mponzi wa vinhu vyeng'ha vya shaba na chuma. Lumbulye Tubali-kaini nakachemigwa Naama.

23 Lameki nakawalonjela wache wa heye,

"Ada na Sila mhulichize lizi lya heni.

Mhulichize gondilonga hemwe wache wa Lameki.

Heni nandimkopola munhu kwa vila nakandumiza,

ena, nandimkopola msongolo kwa vila nakandita ndiwe na chilonda.

24 Wone Kaini kohilusilwa mala saba,

ndangukomya Lameki kohilusilwa mala makumi saba na saba."

25 Adamu nakawasa kahi na Hawa mche wake, naye nakamponda mwana mlume, kamchema Seti. Nakalonga, "Nguluwi kengalila mwana honhu ha Abeli yakopoligwe na Kaini." 26 Seti naye nakamponda mwana mlume, nakamchema Enoshi. Aho ndo wanhu nawaluka kumlanda Mkulu kwa itagwa lya Mkulu Nguluwi.