1 Ahyo ndo ulanga na isi vyovigongomanyigwe hamwe na vinhu vyeng'ha viwele mgati mwake. 2 Zuwa lya saba Nguluwi nakasinda mijito ja heye joyaditile, zuwa alyo lya saba Nguluwi nakesela kwa jila mijito jeng'ha joyakolile. 3 Nguluwi nakalitambichiza zuwa lya saba na kulidita liwe lyelile, kwa vila zuwa alyo Nguluwi nakesela kwa jila mijito ja heye jeng'ha ja kulumba. 4 Ahyo ndo vyoiwele, ulanga na isi yeng'ha vyovilumbigwe.

Mhela wula Mkulu Nguluwi loyazilumbile isi na ulanga, 5 nakwali haduhu mizuchila ne migodi kuli isi kwa vila Mkulu Nguluwi nayali haitowele nhonya isi na hakuwele munhu wa kulima. 6 Na baho mazi nagalawa hasi gainweza isi yeng'ha. 7 Lelo Mkulu Nguluwi nakamlumba mlume kwa misanga, nakamputila lweselo lwa ukomu mmenyhelo, ayo mlume nakawa chilumbigwe chiwele na ukomu.

8 Hamba Mkulu Nguluwi nakalumba kamgunda ako Edeni, nzingo ya kolilawilaga isanya na mumo nakumuwika mlume yamlumbile. 9 Mkulu Nguluwi kajoteza kuli misanga chila nhanzi ja migodi jinojile jilingulela mafuza ganojile kwa chilyo. Hagati ha kamgunda nakwali na igodi lya ukomu na igodi lya uwanzi wa ganojile na gehile.

10 Nakwali na lwanda ako Edeni luwele mazi gake nagachililika na kukanweza ako kamgunda, kulawila ako lwanda alo nalugawanuka kuwa nzanda zine. 11 Itagwa lya lwanda lwa mwaluko nalyali Pishoni, alo naluzunguluta honhu heng'ha ha Havila kuwele nakwali na zahabu. 12 Zahabu ya honhu aho ndo inoga ng'hatu. Ako kahi hana unhunyhililo ulinguchemigwa bedola na maganga ga sendi nyinji galingupulika galinguchemigwa shohamu. 13 Itagwa lya lwanda lwa keli ndo Gihoni, alo lwanguzunguluta honhu heng'ha ha Kushi. 14 Itagwa lya lwanda lwa kadatu ndo Tigili, luwele mazi gake ganguchililika kulutila nzingo ya kolilawilaga isanya kuli honhu heng'ha ha Ashulu na itagwa lya lwanda lwa kane ndo Eyufulate.

15 Lelo Mkulu Nguluwi nakamhola ayo mlume, kamuwika kuli kala kamgunda ka Edeni, yalime na kulolela. 16 Mkulu Nguluwi nakamlajiza ayo mlume, "Hegwe koweza kulya mafuza goneche kuli kamgunda, 17 ila mafuza ga igodi lya uwanzi wa ganojile na gehile, uleche kulya. Kwa vila loulya mafuza ga igodi alyo, ndangukomya, zuwa alyo hegwe kobagama."

18 Hamba Mkulu Nguluwi nakalonga, "Hainojile ayu mlume yawe yaliyeka. Ndomditila mtanzi yanojile." 19 Lelo kulawa kuli misanga, Mkulu Nguluwi nakalumba chila igongolo na videje vya kilanga, hamba nakamigalila ayo mlume yalole kowachemela matagwa gachi na matagwa goyawapele ndo nagawa matagwa gawo. 20 Lelo ayo mlume nakajipa matagwa migongolo jeng'ha jila ja kufujigwa na ja kisolo na videje vya kilanga. Ila hakuwele na mtanzi yatanganiche kwa Adamu.

21 Lelo Mkulu Nguluwi nakamdita ayo mlume yebatigwe na usinjizi lukami. Loyawele muusinjizi nakahola lubavu lwake lumwe na kuhagubika honhu hala kwa iwunde. 22 Na alo lubavu yaluholile Mkulu Nguluwi kulawa kwa yula mlume, nakaludita kuwa mdala, nakamigala kwa ayo mlume. 23 Ndo hala yula mlume loyalonjile,

"Ena! Ayu ndo izeje kulawa kuli mizeje jangu.

Na iwunde kulawa kuli miwunde jangu.

Ayu kochemigwa, ‘Mdala,’

kwa vila nakalavigwa kulawa kwa mlume."

24 Kwa chiwalo acho, mlume komleka mhaza na mayake na kilumba na mche wake, nawo awo weli wowa lukuli lumwe.

25 Mlume ayo na mdala wake, weng'ha nawali mwazi, ila hawawele wokona soni.