1 Abulahamu nakenula majendo kulutila Negebu, nakekala hagati ha Kadeshi na Shuli, hamba nakaluta kikala ako Gelali kwa mhela uchefu. 2 Loyawele ako, Abulahamu nakalonga kota mchewake Sala ndo lumbulye. Lelo mndewa Abimeleki wa Gelali nakamhesa Sala. 3 Ila Nguluwi nakamuyila Abimeleki nechilo loyali yolota, nakamlonjela, "Hegwe kobagama kwa mbuli ya mdala youmholile, kwa vila kana mlume wake."

4 Abimeleki nayang'hali wasa na Sala, nakedichila, "Mkulu, kowakopola wanhu wohawawele na nongwa? 5 Heye Abulahamu ndo yalonjile kota ayu mdala ndo lumbulye. Kahi naye Sala nakalonga kota Abulahamu ndo lumbu wa heye. Heni ndita vyonditile kwa nhumbula igoloche ndahela nongwa." 6 Nguluwi nakamlonjela koyali yolota, "Goya. Ndivizela kota kudita ahyo kwa nhumbula igoloche na heni ndo ndikulemeze kudita gehile ago, ndo mina sikukundize umdolize ayo mdala. 7 Lelo umhiluse ayo mdala kwa mlume wa heye. Abulahamu ndo mloli wa heni, naye kokulandila nagwe kowa mkomu. Ila wone humhiluse, uvizele ng'hatu kota hegwe kobagama hamwe na wanhu wa hegwe weng'ha."

8 Abimeleki nakalilimka lufuku, nakawachema vitumagwa wa heye weng'ha na kuwalonjela mbuli nazoyaziwene koyali yolota, nawo nawadumba ng'hatu. 9 Baho Abimeleki nakamchema Abulahamu, nakamuuza, "Nakutuditila choni? Lekachoni nakunyambuza heni kudita gehile na sambi Nguluwi kangugana kungaza heni na undewa wa heni? Kunditila mbuli zohaziganigwa kuditigwa." 10 Abimeleki nakalutilila kumuuza Abulahamu, "Chinhu chachi chikuditile kudita hino?"

11 Abulahamu nakamwidichila, "Nandita hino kwa vila nandijesa kota kuduhu munhu ne yumwe yalingumdumba Nguluwi honhu hano, na kota mwahang'hopole leka mumhole mchewangu. 12 Kuleka kwa ago, ndangukomya, heye ndo lumbulyangu, mhaza wa heye na mhaza wa heni ndo yumwe, ila hatihanzile mamo, lelo nakawa mchewangu. 13 Mhela Nguluwi loyanditile ndiileche ng'handa ya mhaza wa heni na kuluta kuujenzi, nandimlonjela mchewangu, ‘Honeche hotuluta, dedede ulajile igano kwa heni kwa kulonga kota heni nda lumbulyo.’ "

14 Abimeleki nakamhilusa Sala kwa Abulahamu, nakamha na ming'holo na misenga na vitumagwa walume na wadala. 15 Abimeleki nakamlonjela Abulahamu, "Ulole, isi ayi yeng'ha ya heni. Lelo, uhagule heng'ha hala uhaganile, wikale." 16 Hamba nakamlonjela Sala, "Ulole, heni nandimha mng'holozo migwala elufu imwe (1,000) ja sendi leka kuwalajila wawele hamwe na hegwe kota kwahela nongwa, nakutawizwa kota kwahela nongwa" 17 Hamba Abulahamu nakamlanda Nguluwi, naye kamlohola Abimeleki na mchewake na chitumagwa wa heye mdala, mbaka nawaweza kuponda kahi wana. 18 Aho mwaluko Mkulu Nguluwi nayali yawalemeze wadala weng'ha wa ng'handa ya Abimeleki kuponda wana kwa mbuli ya Sala mchewake Abulahamu.