1 Mkulu Nguluwi nakamlawila Abulahamu hali miyaloni ja Mamle. Abulahamu nayali yekale hali lwizi lwa chibumuli cha heye mhela wa ivuche lya nemisi 2 na loyenule meho ga heye, nakawona wanhu wadatu wemile habehi na heye. Baho loyawawene, nakalawa yobilima kuluta kuwabochela. Loyafichile kenamiza mbaka hasi, 3 nakulonga, "Wakulu, wone mlingungana ndanguwalanda mleche kukola hondili chitumagwa wa hemwe. 4 Mochigalilwa mazi mado leka muhovuje magulu na kwesela hali migodi mlubehelo. 5 Mhela homukwesela, ndowa nditeleka ndiya, mulye, leka muwe na mong'ho wa kulutilila na majendo, kwavila namuya kwa heni chitumagwa wa hemwe." Nawo nawalonga, "Goya, udite kota vyoulonjile."

6 Abulahamu nakahiluka himahima kuli chibumuli nakamlonjela Sala, "Uwiche himahima vijemo vidatu vya utimbo unojile, utimbe, uteleche mibumunda." 7 Hamba Abulahamu nakalawa himahima nakuluta kuli misenga, nakahagula ilogota limwe linenehe goya, nakamha chitumagwa yumwe yeyohaje kulidumula na kuliteleka. 8 Kahi Abulahamu nakahola mtindi na matombo na ajila miwunde ja ibuguma jiwele jisomigwe goya na kuwawichila wajenzi awo chilyo, naye nakema behi na hewo kuwaditila nalowali wolya hasi ha igodi.

9 Awala wajenzi nawamuuza, "Mdala wa hegwe Sala kakohi?" Abulahamu nakawedichila, "Kamchibumuli." 10 Yumwe wa hewo nakalonga, "Ndangukomya ndokuhiluchila mhela kota awu mwaka ukuya na mchewako Sala kowa na mwana mlume." Sala nayali yohulichiza kuli lwizi lwa ihema naluwele kumbele kwa heye. 11 Abulahamu na Sala nawali walalile, naye Sala mbuli zila za wadala nazali zidumile katali. 12 Lelo Sala nakaseka mgati mwa nhumbula yolonga, "Heni ndala na mkulu wa heni Abulahamu hihyo. Ndaze, londiwa ndalile hino, ndoweza kusangalala na kupata himila?" 13 Aho Mkulu Nguluwi nakamuuza Abulahamu, "Lekachoni Sala nakaseka na kiwuza vyoiwa yawe na mwana vyoyawele yalalile? 14 Ndaze, hana mbuli yoneche haiditikwa kwa Mkulu Nguluwi? Ndokuhiluchila mhela uwichigwe, mhela kota awu mwaka ukuya na Sala kowa na mwana mlume." 15 Ila Sala, nayawele yodumba, nakabela yolonga, "Sisechile!" Mkulu Nguluwi nakamlonjela, "Hebu! Kuseka, nakuseka."

16 Hamba wala wanhu nawoka, nawaulola muji wa Sodoma, naye Abulahamu nakawasindichiza. 17 Lelo Mkulu Nguluwi nakejesa, "Ndaze, ndimvise Abulahamu mbuli yondilingugana kuidita? 18 Heye Abulahamu kowa mhaza wa wanhu wa nhanzi ng'hulu na kwa heye nhanzi za isi zeng'ha zotambichizwa. 19 Ndimhagula heye leka yawalajize walelwa wa heye kibatilila nzila ya Mkulu Nguluwi, wawe watanganiche na kutagusa goya, ahyo Mkulu Nguluwi komigalila Abulahamu kota navyoyalagane."

20 Lelo Mkulu Nguluwi nakalonga, "Hana kung'ung'utilwa lukami kwa muji wa Sodoma na Gomola na gehile ga hewo makulu ng'hatu. 21 Lelo ndodulika kuluta ako ndikelolele nene kota kukomya nawadita kota vila chililo vyochimbuyile. Ndangugana kuvizela."

22 Kulawa baho, wala wanhu nawebatilila nzila ya kuluta Sodoma, ila Abulahamu nayang'hali yemile hali Mkulu Nguluwi. 23 Lelo Abulahamu nakamhejelela Mkulu Nguluwi na kumuuza, "Ndaze, kwangukomya kowakopola wanhu watanganiche hamwe na wehile? 24 Hanji wamumo wanhu watanganiche makumi gahano amo mli muji. Ndaze, koudumya muji weng'ha huuleka hebu kwa wala makumi gahano watanganiche wawele amo? 25 Ndangijesa kota hudita ahyo hebu. Kuwakopola wanhu watanganiche hamwe na wehile, watanganiche kuditilwa kota wehile. Hebu! Mtagusa wa isi yeng'ha holeka kutagusa gawele goya." 26 Mkulu Nguluwi, nakamlonjela, "Hondiwafika wanhu watanganiche makumi gahano kula Sodoma, ena ndouleka muji weng'ha uwe goya kwa mbuli ya hewo."

27 Abulahamu nakalonga, "Nanjeza kulongasa na Mkulu, hanga heni siwele chinhu, nda kota misanga na mivu hela. 28 Hanji wabaho wanhu watanganiche makumi gane na wahano kwa wala makumi gahano. Ndaze, koudumya muji weng'ha kwa vila wapunguka wanhu wahano?" Mkulu Nguluwi nakamwidichila, "Siudumya muji wone kowa na wanhu watanganiche makumi gane na wahano."

29 Abulahamu nakonjezela kulonga, "Hanji wanhu makumi gane wawele amo." Mkulu Nguluwi nakamwidichila, "Kwa mbuli ya wanhu watanganiche makumi gane, sidita ahyo."

30 Abulahamu nakonjezela kulonga, "Mkulu, ndangulanda uleche kunzudila, nani ndolonga kahi. Hanji wowabaho wanhu watanganiche makumi gadatu." Mkulu Nguluwi nakamwidichila, "Sidita ahyo hondiwafika awo wanhu makumi gadatu."

31 Abulahamu nakalonga, "Nanjeza kulonga na Mkulu kwa nhumbula ikangale. Hanji wowa baho wanhu watanganiche makumi meli." Nguluwi nakamwidichila, "Kwa mbuli ya awo wanhu makumi meli watanganiche, siudumya hebu."

32 Hamba Abulahamu nakalonga, "Mkulu, ndangulanda uleche kunzudila, ila ndolonga kahi kamwe hela. Ndaze, wone wawe wanhu watanganiche kumi, yowa ndaze?" Mkulu Nguluwi nakamwidichila, "Kwa mbuli ya awo watanganiche kumi, siudumya muji awo."

33 Mkulu Nguluwi loyasindile kulonga na Abulahamu, nakoka, naye Abulahamu nakahiluka kaye.