1 Ayi ndo mbuli ya lulelo lwa Adamu. Mhela Nguluwi loyamlumbile munhu, nakamlumba kwa kiwhana na heye. 2 Nakawalumba mlume na mdala, hamba nakawatambichiza na kuwapa itagwa "Munhu."

3 Adamu loyawele na miyaka miya imwe na makumi gadatu (130), nakawa na mwana msongolo yewhanile na heye, nakamchema Seti. 4 Kulawa aho, Adamu nakekala miyaka miya nane (800), nakawa na wana wanji walume na wadala. 5 Adamu nakabagama loyawele na miyaka miya tisa na makumi gadatu (930).

6 Mhela Seti loyawele na miyaka miya imwe na jihano (105), nakawa mhaza wa Enoshi. 7 Loyampatile Enoshi, Seti nakekala miyaka miya nane na saba (807), na kuponda wana wanji walume na wadala. 8 Seti nakabagama loyawele na miyaka miya tisa na kumi na meli (920).

9 Mhela Enoshi loyali na miyaka makumi tisa (90), nakawa mhaza wa Kenani. 10 Loyampatile Kenani, Enoshi nakekala miyaka miya nane na kumi na jihano (850), nakawa na wana wanji walume na wadala. 11 Enoshi nakabagama loyawele na miyaka miya tisa na jihano (905).

12 Mhela Kenani loyawele na miyaka makumi saba (70), nayali na mwana yalinguchemigwa Mahalaleli. 13 Loyampatile Mahalaleli, Kenani nakekala miyaka miya nane na makumi gane (840), nakawa na wana wanji walume na wadala. 14 Kenani nakabagama loyawele na miyaka miya tisa na kumi (910).

15 Mhela Mahalaleli loyawele na miyaka makumi sita na jihano (650), nakawa mhaza wa Yaledi. 16 Loyampatile Yaledi, Mahalaleli nakekala miyaka miya nane na makumi gadatu (830), nakawa na wana wanji walume na wadala. 17 Mahalaleli nakabagama loyawele na miyaka miya nane na makumi tisa na jihano (895).

18 Mhela Yaledi loyawele na miyaka miya imwe na makumi sita na mili (162), nakawa mhaza wa Enoki. 19 Loyampatile Enoki, Yaledi nakekala miyaka miya nane (800), nakawa na wana wanji walume na wadala. 20 Yaledi nakabagama loyawele na miyaka miya tisa na makumi sita na mili (962).

21 Mhela Enoki loyawele na miyaka makumi sita na jihano (65), nakawa mhaza wa Metusela. 22 Enoki na Nguluwi nawali weganile. Loyawele mhaza wa Metusela, Enoki nakekala miyaka miya jidatu (300), nakawa na wana walume na wadala. 23 Enoki nakekala miyaka miya jidatu na makumi sita na jihano (365). 24 Enoki nayali weganile na Nguluwi, nakajilila hela, kwa vila Nguluwi nakamhola.

25 Mhela Metusela loyawele na miyaka miya imwe na makumi nane na saba (187), nakawa mhaza wa Lameki. 26 Loyampatile Lameki, Metusela nakekala miyaka miya saba na makumi nane na mili (782), nakawa na wana wanji walume na wadala. 27 Metusela nakabagama loyawele na miyaka miya tisa na makumi sita na tisa (969).

28 Mhela Lameki loyawele na miyaka miya imwe na makumi nane na mili (182), nakampata mwana msongolo. 29 Nakamchema mwana ayo Nuhu, yolonga, "Mwana ayu ndo yotuhembuliza kwa mijito jing'hang'hale yotulingukola kwa moko ga hetwe kuli isi yaipanjile Mkulu Nguluwi." 30 Loyampatile Nuhu, Lameki nakekala miyaka miya jihano na makumi tisa na jihano (595), nakawa na wana wanji walume na wadala. 31 Lameki nakabagama loyawele na miyaka miya saba na makumi saba na saba (777).

32 Nuhu loyafichile miyaka miya jihano (500), nakawa mhaza wa Shemu na Hamu na Yafeti.