1 Hamba Nguluwi nakamkumbuka Nuhu na migongolo jeng'ha ja kisolo na jilingufujigwa jiwele najali hamwe na heye mgati mwa safina. Lelo Nguluwi nakegala mbeho mchanya mwa isi, mazi nagaluka kupungula. 2 Zila nzasa ziwele hasi ng'hatu mwa misanga nazidinyigwa na lwizi ja mazi tendema ja kilanga najihindigwa. Nhonya naileka kutowa. 3 Mazi nagalutilila kupungula mhole mhole muisi. Logakolile mazuwa miya imwe na makumi gahano (150), mazi nagapungula lukami. 4 Kuli zuwa lya kumi na saba lya mwezi wa saba, safina nayima mchanya mwa vidunda vya Alalati. 5 Mazi nagalutilila kupungula mhole mhole. Kuli zuwa lya mwaluko lya mwezi wa kumi, vinhembenhembe vya vidunda navyaluka koneka.

6 Mazuwa makumi gane logakwete, Nuhu nakachumula itubuli lyoyawichile kuli yila safina, 7 nakalilavya ibondwa kunze, ila naliguluka liluta na kuhiluka mumula kwa mhela winji mbaka mazi logakalile muisi. 8 Hamba Nuhu nakailavya ng'hunda leka ilole kota mazi gaswina mchanya mwa isi. 9 Ila kwa vila mazi nagang'hali gagubiche isi yeng'ha, ayo ng'hunda haiwene honhu ha kudulika, naihiluka kwa Nuhu kuli safina. Nuhu nakagolola moko, kaibata na kuihilusa mgati mwa safina. 10 Nuhu nakabeteza mazuwa ganji saba, hamba nakailavya kahi ayo ng'hunda kunze mwa safina. 11 Ng'hunda ayo naimhiluchila Nuhu matinazo iwele na ihamba lidodi lya mzeituni mumlomo mwake. Kwa chiwalo acho Nuhu nakavizela kota mazi nagali haduhu. 12 Hamba nakabeteza mazuwa ganji saba, nakailavya kahi yila ng'hunda, zuwa ali ng'hunda nahaihiluche kahi.

13 Nuhu loyawele na miyaka miya sita na umwe (601), zuwa lya mwaluko lya mwezi wa mwaluko, mazi nagakala muisi. Nuhu nakagubula chigubiko cha safina na loyalolile, nakona kota isi naikala. 14 Kuli zuwa lya makumi meli na saba (27) lya mwezi wa keli, isi naikala ng'hatu.

15 Nguluwi nakamlonjela Nuhu hino, 16 "Ulawe kuli safina hegwe na mche wako, hamwe na wanago na wache wawo. 17 Kahi uvilavye vilumbigwe vyeng'ha viwele na ukomu viwele hamwe na hegwe, viwele ndo videje na migongolo na chila chilumbigwe chilingutambala, leka vikalele kwa winji muisi na konjezeka na kwenela honhu heng'ha muisi." 18 Lelo Nuhu nakalawa kuli safina heye na mche wake, hamwe na wanage na wache wa wanage. 19 Migongolo jeng'ha na vilumbigwe vyeng'ha vilingutambala na videje vyeng'ha, navilawa kuli safina kwa kiwhana na nhanzi zawo.

20 Nuhu nakamzenjela Mkulu Nguluwi honhu ha kulavila nhambiko, nakahola limwe kuli chila nhanzi ya migongolo johajikokomoche na chideje chimwe chohachikokomoche kulawa kuli chila nhanzi, nakumlavila Nguluwi nhambiko za kulakazwa hala. 21 Unhunyhililo unojile wa nhambiko ayo naumnojeza Mkulu Nguluwi, naye nakalonga mnhumbula mwake, "Siipanjila kahi isi kwa chiwalo cha mbuli ya munhu. Nandivizela kota majesa ga heye ndo wihe kulawa mwaluko wa heye. Nani kahi sividumya vilumbigwe vyeng'ha kota vyonditile hamwande.

22 "Kota isi vyoilingulutilila kikala,

mihela ja kunyala na kubeta,

na ja mbeho na ivuche,

na luhela na chipalangule,

na nechilo na nemisi, hajiweza kuduma."