1 Mkulu Nguluwi nakamlonjela Nuhu, "Winjile mgati mwa safina hamwe na ivyazi lyako lyeng'ha, kwa vila kuli lulelo lweng'ha, nandikona hegwe uliyeka utanganiche hali heni. 2 Uhole migongolo johajikokomoche kumi na jine kulawa kuli nhanzi zawo, jiwele saba ndo milume na saba ndo midala. Kahi ujihole migongolo jikokomoche mili kulawa kuli chila nhanzi zawo, jiwele ndo ilume na idala. 3 Hihyo kahi uvihole videje kumi na vine kulawa kuli chila nhanzi zawo, viwele saba ndo vilume na saba ndo vidala, leka kuzileka nhanzi zawo ziwe na ukomu muisi. 4 Logopuluta mazuwa saba, ndoidita nhonya itowe kwa mhela wa mazuwa makumi gane nemisi na nechilo na chila chiwele na ukomu chiwele nandichilumba muisi ndochidumya." 5 Nuhu nakadita geng'ha kota Mkulu Nguluwi vyoyalajize.

6 Nuhu nayali na miyaka miya sita mhela nhonya loitowile na mazi kumema muisi. 7 Nuhu na mche wake hamwe na wanage na wache zawo nawenjila mgati mwa safina leka kuibilima nhonya imemeze mazi. 8 Migongolo johajikokomoche na migongolo jikokomoche na videje na vilumbigwe vyeng'ha vilingutambala, 9 navinjila mgati mwa safina hamwe na Nuhu kota Nguluwi vyoyalajize. 10 Logapulute mazuwa saba, mazi nagaluka kuigubika isi.

11 Kuli zuwa lya kumi na saba kuli mwezi wa keli kuli mwaka wa miya sita (600) kuli kikala kwa Nuhu, zuwa alyo nzasa zeng'ha mbaka ziwele hasi ng'hatu mli misanga nazilavya mazi kwa mong'ho na lwizi ja mazi tendema ja kilanga najichumuligwa. 12 Nhonya naitowa kwa mhela wa mazuwa makumi gane nemisi na nechilo. 13 Zuwa lilyo nhonya loyaluche kutowa, Nuhu na mche wake hamwe na wanage, wawele ndo Shemu na Hamu na Yafeti na wache zawo, nawenjila mgati mwa safina. 14 Nawenjila hewo hamwe na migongolo ja kisolo kwa kiwhana na nhanzi zawo na migongolo ja kufujigwa kwa kiwhana na nhanzi zawo na migongolo jilingutambala kwa kihwana na nhanzi zawo na videje kwa kiwhana na nhanzi zawo na vilumbigwe viwele na mabawa kwa kiwhana na nhanzi zawo. 15 Avyo vilumbigwe vyeng'ha viwele na ukomu navinjila mgati mwa safina hamwe na Nuhu. 16 Chila nhanzi nachinjila chilumbigwe chilume na chidala kota Nguluwi vyoyamlajize Nuhu. Hamba Mkulu Nguluwi nakahinda lwizi lwa safina.

17 Nhonya naitowa kwa mhela wa mazuwa makumi gane. Mazi nagonjezeka na kwinula safina, nayelela mchanya mwa isi. 18 Mazi nagalutilila konjezeka lukami muisi na safina nayelela mchanya mwake. 19 Mazi ago nagawa menji ng'hatu mchanya muisi, nagagubika vidunda vyeng'ha viwele ng'wemang'wema muisi. 20 Nagamema mbaka nagavigubika vidunda viwele na ulefu wa mita sita. 21 Vilumbigwe vyeng'ha navibagama, videje na migongolo ja kudimigwa na migongolo ja kisolo na vilumbigwe vyeng'ha muisi vilingujenda mchilundo na wanhu weng'ha, 22 ena, chila chilumbigwe chiwele na ukomu muisi nachibagama. 23 Nguluwi nakachidumya chila chilumbigwe muisi, wanhu na migongolo na vilumbigwe vilingutambala na videje vya kilanga. Vyeng'ha navidumigwa muisi. Ila Nuhu hamwe na wala wanji wawele mgati mwa safina ndo nawasigala wakomu. 24 Mazi ago nagekala muisi kwa mazuwa miya imwe na makumi gahano (150).