1 Isaka nayali sekulu ng'hatu na meho ga heye nagali hambe galole. Lelo nakamchema Esau mwanage mkulu, nakamlonjela, "Mwana wa heni." Naye Esau nakedichila, "Ena mhaza, ndangukuhulichiza." 2 Isaka nakalonga, "Ulole, heni nda sekulu ng'hatu, ahyo zuwa lya kubagama kwa heni silizelele. 3 Lelo uhole misale na upinde wa hegwe, ulute kisolo kapelembe igongolo. 4 Hamba uteleche chilyo chiinonile, undigalile ndilye leka ndikutambichize nding'hali kubagama."

5 Mhela awo Isaka loyawele yolongasa na Esau, Lebeka nayali yohulichiza. Ahyo, Esau loyalutile kisolo kupelemba igongolo, 6 Lebeka nakamlonjela Yakobo, wanage, "Nandimhulika mhaza wa hegwe yomlonjela mkulugo Esau kota, 7 yapelembe igongolo na yamtelechele chilyo chinonile ng'hatu, leka yalye, hamba yamtambichize hali Mkulu Nguluwi yang'hali kubagama. 8 Lelo mwana wa heni, uhulichize ulonzi wa heni na uwinze kota vyondilikulajiza. 9 Ulute hali chilundo cha mhene, kegale vinyehe vya mhene vili vinojile, ndimditile mhaza wa hegwe chilyo chinonile, chiwele kanguchigana ng'hatu. 10 Hamba komhilichila mhaza wa hegwe yalye, leka yakutambichize yang'hali kubagama."

11 Ila Yakobo nakamlonjela mayake, "Ukumbuchile kota lukuli lwa mkulu wangu Esau nalumema milaika, ila heni ndahela. 12 Hanji mhaza kogana kwabasa lukuli lwangu, nani ndokoneka ndangumhada, ahyo ndochigalila kipanjila honhu ha utambichizo." 13 Mayake nakamlonjela, "Kupanjilwa kwa hegwe na kuye kwa heni, mwana wa heni, hegwe udite vyondilikukulajiza. Ulute kengalile avyo vinyehe."

14 Lelo Yakobo nakaluta, nakahola vila vinyehe na kimigalila mayake, naye nakadita chilyo chinonile ng'hatu, chiwele nakachigana Isaka. 15 Hamba Lebeka nakahola nguwo zinojile lukami za Esau, mwanage mkulu, ziwele haluga, nakamvaliza Yakobo, mwanage mdodo. 16 Kahi nakamvaliza migozi ja vila vinyehe mmoko na honhu hadechedeche msingo ya heye. 17 Hamba Lebeka nakamha Yakobo chila chilyo chinonile na ibumunda loyaliteleche.

18 Lelo Yakobo nakenjila mng'handa mwa mhaza wa heye na kumchema, "Mhaza" Naye Isaka nakedichila, "Ena! Hegwe kwa mwanangu wachi?" 19 Yakobo nakamwidichila mhaza wa heye, "Heni nda Esau, mwanago wa mwaluko. Nandita kota vyoundajize. Dedede mhaza waheni, wikalise ulye upelembi wa heni leka unhambichize." 20 Ila Isaka nakamuuza, "Iwa ndaze nakupelemba himahima hino, mwana wa heni?" Yakobo nakamwidichila, "Mkulu Nguluwi, Nguluwi wa hegwe, nakandita sumye."

21 Ndo baho Isaka nakamlonjela Yakobo, "Lelo mwana wa heni uhejele behi ndikwabase leka ng'hunde kota hegwe kwa heye mwana wa heni Esau ama hebu." 22 Yakobo nakamhejelela mhaza wa heye Isaka, na heye nakamwabasa na kulonga, "Luzi ndo lwa Yakobo, ila moko ndo ga Esau." 23 Nahamzelele kwa vila moko ga heye gali na milaika minji kota ja Esau mkulugwe, ahyo nakewika goya kumtambichiza. 24 Nakamuuza kahi, "Kwangukomya ng'hatu hegwe ndo kwa mwana wa heni Esau?" Na heye nakamwidichila, "Ena." 25 Mhaza wa heye nakalonga, "Ndigalile alyo liwunde ndiye upelembi wa hegwe, mwana wa heni, ndikutambichize." Aho Yakobo nakamhilichila ndiya, naye nakalya, nakamhilichila divai kahi, nakanwa. 26 Ndo mhaza wa heye Isaka, nakamlonjela, "Uhejele habehi mwana wa heni, unonele." 27 Lelo Yakobo nakamhejelela mhaza wa heye na kumnonela, na mhaza wa heye loyahuliche kunhunyhilila kwa mivalo ja heye, nakamtambichiza yolonga,

"Kunhunyhilila kwa mwana wa heni,

ndo kota kunhunyhilila kwa mgunda woyautambichize Mkulu Nguluwi!

28 Nguluwi yakujidile nungwi ya kilanga,

yakupe misanga jiwele na mboto,

nyhule na zabibu kwa winji.

29 Nhanzi za wanhu ziwe chitumagwa kwa hegwe,

na wanhu wa isi wakinamizile.

Uwe chilongozi wa wang'holozo,

na lulelo lwa mayako lukinamizile.

Chila yokupanjila, nayapanjilwe,

chila yokutambichiza, yatambichizwe!"

30 Isaka loyasindile kumtambichiza Yakobo, na heye Yakobo loyali yokuka hela kumwando ha mhaza wa heye Isaka, Esau mkulugwe Yakobo, nakahiluka kulawa kuupelembi. 31 Esau kahi nakadita chilyo chinonile, na kumhilichila mhaza wa heye, na kumlonjela, "Ena mhaza, winuche ulye upelembi wa heni mwanago, leka unhambichize" 32 Isaka nakauza, "Hegwe kwa whaani?" Na heye nakamwidichila, "Nda heni mwanago Esau, mlelwa wa hegwe wa mwaluko." 33 Aho Isaka nakakakama lukami, nakalonga, "Ka whaani lelo yula yapelembile na kingalila upelembi, kwa vila nandilya, kahi mina ndimtambichiza hegwe hunoya? Ena na kotambichizwa."

34 Esau loyahuliche ulonzi wa mhaza wa heye, nakaluka kulila kwa usungu. Hamba nakamlonjela mhaza wa heye, "Mhaza wa heni, dedede unhambichize na heni!" 35 Ila Isaka nakalonga, "Mng'holozo nakoya chiuhadi, naye kahola utambichizo wa hegwe." 36 Esau nakalonga, "Ndo mina kanguchemigwa Yakobo. Kwa vila nakahola honhu hangu lwa keli. Mwaluko nakahola honhu hangu ha ulelwa wa mwaluko, na sambi kahola utambichizo wa heni." Hamba nakamuuza mhaza wa heye, "Ndaze, hauponile utambichizo woneche ula?" 37 Isaka nakamwidichila, "Mina ndimdita Yakobo yawe chilongozi wa hegwe, na ndimpa wang'holozo weng'ha wawe vitumagwa wa heye. Ndimpa nyhule na divai. Ndikuditile choni lelo hegwe mwana wa heni?" 38 Esau nakamlonjela mhaza wa heye, "Mhaza, hambi kwanawo utambichizo umwe hela? Unhambichize na heni kahi, mhaza." Aho Esau nakalila kwa lizi likulu. 39 Ndo Isaka mhaza wa heye, nakamlonjela,

"Honhu hako ha kuchikala kowa kutali na ulongo uwele na mboto,

na kutali na nungwi ya kilanga.

40 Kochikala kwa kitowa ngondo kwa ipanga,

na kowa chitumagwa wa mng'holozo,

ila lougana kumhinduka,

kowa kutali na ulongozi wa heye."

41 Esau baho nakamzudila Yakobo kwa chiwalo cha utambichizo nayapegwe na mhaza wa heye. Esau nakejesa, "Mazuwa ga kuwasiliza chililo cha mhaza gahabehi, mbuli ayo hoimala, baho hondimkopola mdodowangu Yakobo." 42 Ila Lebeka naloyavizelele nachoyogana kudita mwanage mkulu, nakamchema mwanage mdodo Yakobo, na kumlonjela, "Wilolele, mng'holozo Esau kangisangalaza kwa kiwika goya yogana yakukopole. 43 Lelo mwana wa heni uhulichize ulonzi wa heni. Uche ubilimile kwa kalumbu Labani akula Halani. 44 Wikale na heye kwa mhela udo, mbaka kuzudila kwa mng'holozo hokumala. 45 Kuzudila kwa heye hokuhola, na heye hoyowa yasemwile goumditile, ndomlajiza munhu yakuhiluse. Lekachoni filigwe na hemwe mweng'ha weli zuwa imwe?"

46 Lebeka nakamlonjela Isaka, "Heni nhoka kikala na awa wadala weli Wahiti wa Esau. Wone Yakobo yohesa yumwe wa wadala awa Wahiti, fola mbagame."