1 Lozipulute mbuli azo, ulonzi wa Mkulu Nguluwi naumuyila Abulamu kuli uloli, naulonga, "Uleche kudumba Abulamu! Heni nda ngome ya hegwe. Ndokwamila na chonolo cha hegwe chowa chikulu ng'hatu!" 2 Ila Abulamu nakamwidichila, "Gwa Mkulu Nguluwi, konipa choni hanga ndangulutilila kikala ne mwana, kuno mhalizi wa heni ndo Elieseli wa Damasiko? 3 Ulole, humhele mwana, ahyo chitumagwa yapondigwe mng'handa ya heni ndo kowa mhalizi wa heni."

4 Hamba Mkulu Nguluwi nakamlonjela Abulamu, "Ayu howa mhalizi wa hegwe. Ila mwanago gwegwe ndo kowa mhalizi wa hegwe." 5 Aho Mkulu Nguluwi nakamigala Abulamu kunze na kumlonjela, "Ulole kilanga! Uziwaze nhondwe, wone koweza kuziwaza. Ahyo ndo vyoluwa lulelo lwa hegwe louwa lwinji." 6 Abulamu nakamtogola Mkulu Nguluwi, kwa chiwalo acho Mkulu Nguluwi nakamtawiza Abulamu kota nakatanganika.

7 Mkulu Nguluwi nakamlonjela Abulamu, "Heni ndo Mkulu Nguluwi, mbele nandikugala hegwe kulawa Uli, muji wa Wakalidayo, leka ndikupe isi ayi iwe ya hegwe." 8 Ila Abulamu nakamlonjela, "Gwa Mkulu Nguluwi, ndovizela ndaze kota ndoihola isi ayi leka iwe ya heni?" 9 Mkulu Nguluwi nakamlonjela, "Ngalile isenga ilogota idala liwele na miyaka midatu na mhene ndala iwele na miyaka midatu na ing'holo ilume liwele na miyaka midatu na ng'hunda na ibofu lya ng'hunda." 10 Abulamu nakadita kota vyoyalonjelwe na Mkulu Nguluwi. Nakalidumula chila igongolo kuli vihande vili na kuviwika goya banzi mbili kudilo na kumoso kuno vichilola, ila videje havidumuligwe kuli vihande vili. 11 Mikungule lojiwele jigana kulya miwunde ajo, Abulamu nayali yojiwinga.

12 Isanya loliwele lizinga, Abulamu nakebatika lukami na usinjizi. Ahyo jiza totolo na lunwinwi navimfika. 13 Aho Mkulu Nguluwi nakamlonjela Abulamu, "Uvizele ng'hatu kota walelwa wa hegwe wochikala kota wajenzi kuli isi yohaiwele ya hewo, wowa wapogozi na wogazigwa kwa mhela wa miyaka miya nne (400). 14 Ila ndowagaza wanhu wa isi wawele hewo wanguwakolela mijito, hamba wala wawele kuli upogozi wolawa kuli isi ayo wawele na lufufu lwinji. 15 Ila hegwe kochikala kwa mhela winji na kobagama kwa kikala goya. 16 Walelwa wa hegwe howowa kuli isi ya chijenzi kwa mhela wa miyaka miya nne (400), hamba wohiluka kuli isi ayi na kuwatowa na kuwasumya Waamoli na kuilongoza isi, kwa vila gehile ga Waamoli hagawele ga kuhega kutagusigwa kuli mhela awu."

17 Mhela isanya lolizinjile na jiza kwaluka, Nguluwi nakalajiza chiya chilingufung'ha iyosi na chiluli mgati mwa chiya acho navyoneka vikola hagati ha jila miwunde. 18 Mkulu Nguluwi nakadita ilagano na Abulamu aku yolonga, "Ndanguwapa isi ayi walelwa wa hegwe, kulawa kuli lwanda lwa Naili lwa Misili mbaka kuli lula lwanda lukulu lwa Eyufulate, 19 aha ndo honhu ha Wakeni na Wakenisi na Wakadimoni 20 na Wahiti na Wapelisi na Walefayi 21 na Waamoli na Wakanaani na Wagiligashi na Wayebusi."