1 Gʋ Yesu na wʋ kpalɛnara baa a ju sɛ ba tirina Yerusalem dɩɛ na, gʋ ba tala Betifage na Betaniya dɩɛsɛ bisi ŋii ŋɩ wɩɛ olifi dasɛ bʋrɔŋ bie gaa dʋɔ na sɛ Yesu kpiri wʋ kpalɛnara baa tɩba bala, 2 sɛ wʋ tawɩ ba sɛ, <<N ju dɩɛ bie gaa ga wɩɛ amɩɛ asanaŋ na naŋ. Gʋ ɩ jʋʋ na, ɩ na kpaŋa bie wʋŋ wʋrʋ n cha ta wʋ dʋɔ na pɔgaɩ, n buoli ɩ kɔna maŋ. 3 Wʋkʋma wʋŋ wʋ tasɛ amɩɛ sɛ, <Be sɛ ɩ yɩɛ na?> N tawɩ ɩ sɛ Kpaŋjuo wʋŋ n tiri ɩ, ama wʋ a bɔsɩna ɩ kɔŋ.>>

4 Gʋ ba ga talɛ na, ba na kpaŋa bie wʋŋ pɔga ɩ buonɔ. Gʋ baa buoli ɩ na, 5 sɛ bakpa barɛ baa ba sɩmɩɛɩ dɩmaŋ na tasɛ ba sɛ, <<Be n yɩɛ sɛ ɩ buoli kpaŋa bie wʋŋ?>> 6 Sɛ ba lɩsɛ nʋɔ ganaŋkʋ Yesu tawɩ ba na, sɛ ba yela ba sɛ ba mʋ kpaŋa bie wʋŋ laŋ. 7 Gʋ ba mʋ kpaŋa bie wʋŋ kɔna Yesu na, ba mʋ ba adugbe gagbasɛ jaga wʋ dʋɔ sɛ Yesu cha ŋɛ dʋɔ. 8 Sɛ bakpa fɔɩ mʋ ba adugbe gagbasɛ tɔ gbɩɛ naŋ, sɛ barɛ dʋɔ wʋŋɩɩ abilafa lɩɩ fʋɔsɛ naŋ gaa tɔ gbɩɛ naŋ fa ɩ. 9 Sɛ bakpa baa ba dɔŋ asanaŋ na baa ba kpamɩna wʋrʋgbɩɛ na kpiniŋ fara baa kuusi sɛ,

<<Hosana!*

Kusee n nyina wʋŋ wʋ a kɔŋ Ɩsʋɔ yɩrɛ naŋ!✝

10 Kusee n ju fa daa Dawidi Juori gaa gaa kɔnɛ na!

Hosana n ju fa Ɩsʋɔ wʋŋ wʋ wɩɛ adugbe na!>>

11 Sɛ Yesu gaa tala Yerusalem dɩɛ naŋ, wʋ jʋʋ Ɩsʋɔ tʋm danɛ naŋ, sɛ wʋ kɩɛ bʋrʋkʋma logo, ama lɩɩna gʋ tɩɛ a tam dʋɔ, wʋ na wʋ kpirida gifi bala baa bɔrɛ ju Betaniya.

12 Gʋ tɩɛna na, Yesu na wʋ kpirida baa lɩɩ Betaniya baa kɔŋ Yerusalem na, dusoŋ chaŋ Yesu. 13 Wʋ na figi daŋ garɛ sɩmɩɛɩ taŋasɛ ga pɔrɔgɩ fagɩɛ. Sɛ wʋ ju ga tie ga kɩɛ sɛ ga si bie yaa, ama wʋ tala dɩmaŋ na, wʋ n na bʋrʋ ʋ amʋɔ fagɩɛ, akala takɩɛ ŋɩ ba yɩɛ ga si saŋa a. 14 Sɛ Yesu tawɩ figi daŋ gaa sɛ, <<Wʋrʋ taŋ wʋ a ti di n bie e.>> Sɛ wʋ kpalɛnara baa nyii ŋii wʋ tawɩ daŋ gaa na.

15 Gʋ Yesu tala Yerusalem dɩɛ naŋ na, wʋ jʋʋ Ɩsʋɔ tʋm danɛ naŋ. Sɛ wʋ fara wʋ a geŋ baa baa di yawʋ na wʋ a lɩɩ dɩmaŋ. Sɛ wʋ titi ba tebulu aba ŋii baa chɩɛgɩna aterembie ŋɩ dʋɔ, na juori gakuosɛ yara gbeliŋ lɔ. 16 Sɛ wʋ gaa gbɩɛ sɛ wʋrʋ n ba ti yaa bʋrʋ Ɩsʋɔ tʋm danɛ naŋ. 17 Sɛ wʋ kalaa-kalaa ba tawɩ sɛ ba sabɩɛ Sabɩɛwɩɛ naŋ sɛ,

<<Ma tʋm danɛ aja yɩɛ dɩga danɛ

fa atawɩ yɩrɩ kpiniŋ.✝

Ama ɩ mʋ dɩmaŋ yɩɛ ŋmɩɛla baa ba chamɩna doŋ baa lɩɛ bakpa abʋrɩ na dɩchatɩŋ.>>✝

18 Gʋ Ɩsʋɔ sei bɩnɩɛ na mbara bakalaasa baa nyii ŋii Yesu yɩɛ Ɩsʋɔ tʋm danɛ naŋ na, sɛ ba fara baa ja gbɩɛ gaa baa mʋna dʋɔ na baa kʋ ɩ, ama baa se ɩ akala takɩɛ wʋ kalaa ŋii a su jama baa asa.

19 Gʋ dɩ tala bʋyanɔ na, Yesu na wʋ kpalɛnara baa lɩɩ Yerusalem dɩɛ gaa naŋ.

20 Nafo fuu gʋ ba dɔŋ gbɩɛ naŋ baa ju na, sɛ ba na gʋ figi daŋ gaa Yesu tawɩ ga nʋɔsɛ na sɩŋ ga tala ga lira naŋ. 21 Dɩmaŋ sɛ Petero nyiŋi wɩɛ ŋii Yesu tawɩ fa figi daŋ gaa na. Sɛ wʋ tawɩ Yesu sɛ, <<Wʋkalaasa, kɩɛ, figi daŋ gaa nya tawɩ ga nʋɔsɛ na, ga sɩŋ.>>

22 Sɛ Yesu lɩsɛ ba nʋɔ sɛ, <<N lɩɛ Ɩsʋɔ di.>> 23 Maa tawɩ sɛ n nyii na dieli sɛ, <<wʋkʋma wʋŋ wʋ a tawɩ bʋrɔŋ sɛ, <Kuli ju ga sala ɔpʋ naŋ> sɛ wʋ aa lɩɛ noro wʋ digela naŋ ŋ sɛ wʋ lɩɛ di sɛ ŋii wʋ tawɩ aja tibi na, ŋii yɩɛ dɩmʋŋ fa ɩ. 24 Dɩmʋŋ dʋɔ, n nyii na dieli sɛ, bʋrʋkʋma gaa ɩ jɔ dɩga sʋlʋ Ɩsʋɔ na, n lɩɛ di sɛ ɩ yu na gaa yɩɛ amɩɛ teri. 25 Sɛ ɩ jɔ dɩga na, n mʋ bʋrʋkʋma gaa wʋrʋ yɩɛ chicha amɩɛ na chɩɛ ɩ, na amɩɛ Juo wʋŋ wʋ wɩɛ Ɩsʋɔ adugbe na a mʋ amɩɛ dɩsʋbʋ chɩɛ amɩɛ. 26 Ama sɛ ɩŋ mʋ dɩsʋbʋ chɩɛ na, dɩmʋŋ sɛ amɩɛ Juo wʋŋ wʋ wɩɛ Ɩsʋɔ adugbe gba, baa mʋ amɩɛ dɩsʋbʋ chɩɛ amɩɛ ɛ.>>*

27 Gʋ Yesu na wʋ kpalɛnara baa ti bɔrɛ kɔŋ Yerusalem dɩɛ naŋ na, ba jʋʋ Ɩsʋɔ tʋm danɛ gaa naŋ. Gʋ Yesu dɔŋ Ɩsʋɔ tʋm danɛ gaa naŋ na, Ɩsʋɔ sei bɩnɩɛ, mbara bakalaasa na dɩɛ bɩnɩɛ baa barɛ kɔŋ wʋ jaŋ. 28 Sɛ ba tasɛ ɩ sɛ, <<Yikuo gamʋɔ sɛ nya wɩɛna sɛ nyaa yɩɛ abʋrɩ ŋina? Mmʋɔ n fa nyaŋ dɩmʋŋ yikuo gana?>>

29 Sɛ Yesu lɩsɛ ba nʋɔ sɛ, <<Maa tasɛ amɩɛ wɩɛ a dʋŋdʋlʋŋ, sɛ ɩ dɩlɛ lɩsɛ nʋɔ na, maa tawɩ amɩɛ yikuo gaa ma chamɩna maa yɩɛ ŋina kpiniŋ. 30 N tawɩ maŋ, Yohane Ɩsʋɔ Sɔrɛ wʋŋ Ɩsʋɔ sɔ lɩɩ Ɩsʋɔ bɛ yaa wʋkpa?>>

31 Sɛ ba tawɩ ba nyiŋeŋ-nyiŋeŋ sɛ, <<Dɩ lɩsɛ nʋɔ sɛ ŋɩ lɩɩ Ɩsʋɔ na, wʋ a tasɛ daa sɛ, be n yɩɛ sɛ dɩ n lɩɛ Yohane Ɩsʋɔ Sɔrɛ wʋŋ di? 32 Ama sɛ dɩ lɩsɛ nʋɔ sɛ ŋɩ lɩɩ bakpa na [Baa se bakpa baa, akala takɩɛ wʋkʋma lɩɛdi gʋ Yohane cha wʋ yɩɛ Ɩsʋɔ ɔja bɛ.]>>

33 Dɩmʋŋ dʋɔ, ba lɩsɛ nʋɔ sɛ, <<Dɩ ba jiŋ ŋ>> Sɛ Yesu tawɩ ba sɛ, <<Maŋ gba, maa tawɩ amɩɛ yikuo gaa maa mʋ maa yɩɛ ŋina kpiniŋ na a.>>