1 Gʋ tɩɛna nafo na, sei bɩnɩɛ, dɩɛ bɩnɩɛ, Mosesi mbara bakalaasa na dɩɛnaŋ bɩnɩɛ naŋ bɩnɩɛ dikpeŋ kpiniŋ jɔ dɩkɔŋ ganaŋkʋ baa yɩɛ Yesu na. Ba pɔgʋ ɩ sɛ ba mʋ ɩ ju ga fa Pilato.

2 Sɛ Pilato tasɛ Yesu sɛ, <<Nyaŋ n nyina Yudatina Juo naa?>> Sɛ Yesu lɩsɛ nʋɔ sɛ, <<Ŋii sɛ n tɩŋtɩŋ nya tawɩ na.>>

3 Sɛ sei bɩnɩɛ baa pʋɩ Yesu lɩɩ wɩɛ fɔɩ dʋɔ. 4 Sɛ Pilato ti bɔrɛ tasɛ Yesu sɛ, <<Nyii, wɩɛ fɔɩ ŋii baa tawɩ baa jaga n dʋɔ na, nyaa lɩsɛ nʋɔ?>>

5 Ama Yesu pɩɛ nʋɔ lɩsɛ sɛ dɩ yɩɛ Pilato doba.

6 Bɩriŋnʋɔ kʋma dɩ tala Yudatina nyiŋi asadi adiya di na, ŋɩ yɩɛ Pilato ayɩɛsa sɛ wʋ n yela bakpa baa ba tɔ ba danɛ na tɩba wʋŋ bakpa baa a jawʋ na wʋrʋ fa ba. 7 Saŋa gana na, ba tɔ baalɛ wʋrʋ danɛ baa yagɛ ɩ sɛ Barabasi. Na wʋ cha kpi baa ba kʋlʋ yuo chicha Roma bɩnɩɛ baa ba wɩɛ Yudatina tibi dʋɔ sɛ wʋ kʋ ba tɩba barɛ. 8 Sɛ bakpa baa kɔŋ Pilato jaŋ, sɛ ba tawɩ ɩ sɛ wʋ n yɩɛ fa ba takɩɛ ganaŋkʋ wʋ a yɩɛ bɩriŋnʋɔ kʋma na.

9 Sɛ Pilato tasɛ ba sɛ, <<Ɩ ja sɛ maŋ yela Yudatina Juo wʋŋ?>> 10 Akala takɩɛ Pilato jiŋ gʋ kɔlɩŋ dʋɔ sɛ sei bɩnɩɛ baa mʋ Yesu kɔna ɩ. 11 Ama sei bɩnɩɛ baa fuosi dʋ jama baa sɛ ba n tawɩ Pilato sɛ wʋ n yela Barabasi fa ba.

12 Sɛ Pilato ti bɔrɛ tasɛ ba sɛ, <<Be sɛ ɩ ja sɛ maŋ yɩɛ wʋŋ ɩ yagɛ ɩ sɛ Yudatina Juo na?>>

13 Sɛ ba kuusi sɛ, <<Jɔ ɩ daŋ gasagasa dʋɔ.>>

14 Sɛ Pilato tasɛ sɛ, <<Be dɩsʋbʋ sɛ wʋ yɩɛ bɛ?>> Ama ba kuusi na doŋ sɛ, <<Jɔ ɩ daŋ gasagasa dʋɔ.>>

15 Pilato aja wʋ a yɩɛ bakpa baa digela jawʋ fa ba dʋɔ, wʋ yela Barabasi fa ba. Sɛ wʋ yela sɛ ba taɩ Yesu achʋchʋɛ sɛ wʋ mʋ ɩ fa ba sɛ ba n jɔ ɩ daŋ gasagasa dʋɔ.

16 Sɛ yuora baa mʋ Yesu ju Pilato juorigbɩɛ, sɛ ba yagɛ ba dɔŋa baa kpiniŋ gaa sila. 17 Sɛ ba fu ɩ kirimaŋ lɩŋ gagba gajalɩŋtɛ sɛ ba mʋ sɔba lʋʋ juori gapa mʋ fu ɩ. 18 Sɛ ba fara baa jabi ɩ sɛ, <<Yudatina Juo, yu nkpa.>> 19 Ba mʋ ŋmɩrɛ baa taɩ wʋ nyinaŋ sɛ ba tɔ mɩtalɩŋ fu ɩ. Sɛ ba luuŋ ba dʋna dʋɔ wʋ asanaŋ mʋ jabi ɩ. 20 Gʋ ba jabi Yesu taŋ na, ba fulu kirimaŋ lɩŋ gagba gajalɩŋtɛ gaa sɛ ba mʋ wʋ tɩŋtɩŋ wʋ gagba fu ɩ. Sɛ ba mʋ ɩ lɩɩ na baa ga jɔ ɩ daŋ gasagasa dʋɔ.

21 Gʋ yuora baa mʋ Yesu baa ju na, ba jaŋina baalɛ wʋrʋ baa yagɛ ɩ sɛ Simoŋ, Alesanda na Rufusi ba Juo wʋŋ wʋ lɩɩ Kireni na. Wʋ lɩɩ dɩɛ bie garɛ naŋ wʋ a lam sɛ yuora baa chaŋ ɩ dʋ ɩ sɛ ba mʋ daŋ gasagasa gaa sɩlɛ ɩ. 22 Gʋ ba ga tala diele gaa baa yagɛ sɛ Goligota na [tie akala sɛ Nyi Gafie]. 23 Sɛ ba mʋ gafɔla lira mʋlʋŋ dʋ sʋlʋŋ naŋ fa Yesu sɛ wʋ n nyʋɔ, ama wʋ n nyʋɔ ɔ. 24 Gʋ ba jɔ Yesu daŋ gasagasa dʋɔ taŋ na, sɛ ba lɔ wʋ gagbasɛ dʋɔ mbi mʋ kpara fa dɔŋa.

25 Yɩɛ nafo karafɩɛ saŋgʋ sɛ ba jɔ Yesu daŋ gasagasa dʋɔ. 26 Sɛ ba sabɩɛ wɩɛ ŋii ba sɩŋ ŋɩ dʋɔ fu Yesu dɩpʋɛ na jaga wʋ nyie dʋɔ daŋ gasagasa gaa dʋɔ sɛ,

<<YUDATINA JUO.>>

27 Ba jɔ ŋmɩɛla baa ba chamɩna doŋ baa lɩɛ bakpa abʋrɩ na bala barɛ gba daŋ gasagasa dʋɔ. Wʋrʋ wɩɛ wʋ pam jɩsaŋ dʋɔ sɛ wʋrʋ dʋɔ wʋ pam naŋbii dʋɔ. 28 Ŋina yela sɛ wɩɛ ŋii ba sabɩɛ si Ɩsʋɔ Wɩɛ naŋ na kɔŋ tɩba sɛ, <<Ba mʋ ɩ kpi basʋbʋɛ dʋɔ.*>>* 29 Bakpa baa baa laŋ dɩmaŋ na kpiniŋ a jigisi ba nyie baa tii ɩ baa tawɩ sɛ, <<Kɩɛ! Naa nyaŋ n tawɩ sɛ nyaa salɩɛ Ɩsʋɔ tʋm danɛ na nyaa mʋ wɩɛ atoro ma ga naa? 30 Mɔlɔgɩ n wʋsɛ na nya tibi daŋ gasagasa gaa dʋɔ!>>

31 Dɩmʋŋ sɛ sei bɩnɩɛ na mbara bakalaasa baa gba jabi ɩ tawɩ sɛ, <<Wʋ a mɔlɔgɩ barɛ, ama wʋ n dɩlɛ mɔlɔgɩ wʋ wʋsɛ ɛ. 32 Wʋ sɛ wʋ yɩɛ Kirisito* na Isiralitina Juo na, wʋ n tibi lɩɩ daŋ gasagasa gaa dʋɔ na dɩ na, na dɩ lɩɛ ɩ di.>> Sɛ ŋmɩɛla baa ba chamɩna doŋ baa lɩɛ bakpa abʋrɩ, sɛ ba jɔ ba daŋ gasagasa dʋɔ kpi Yesu dʋɔ na gba tii ɩ.

33 Gʋ dɩ tala wiita keŋkeŋ na, giteŋteŋbiri kɔŋ tibi dʋɔ kpiniŋ ga tala bʋyanɔ karafɩɛ atoro. 34 Karafɩɛ atoro gana naŋ na, Yesu kuusi na doŋ sɛ, <<Eli, Eli, lama sabatani?>> Tie akala sɛ, <<Ma Ɩsʋɔ, ma Ɩsʋɔ, be n yɩɛ sɛ nya yela maŋ?>>

35 Gʋ baa ba sɩmɩɛɩ dɩmaŋ na barɛ nyii wɩɛ ŋii wʋ tawɩ na, ba tawɩ sɛ, <<N nyii, wʋ a yagɛ Ɩsʋɔ ɔja Eliya!>>

36 Sɛ ba tɩba wʋrʋ se ju ga mʋ dɩchɩɛ nyʋ wayɩŋ sʋlʋŋ aŋaŋsa ŋarɛ naŋ, sɛ wʋ mʋ saga daŋ dʋɔ, sɛ wʋ jiŋna ga ju Yesu nʋɔ jaŋ sɛ wʋ n chʋchʋʋ. Sɛ wʋ tawɩ sɛ, <<N yela na dɩɩ kɩɛ sɛ Eliya aja wʋ a kɔŋ gaa tibi na ɩ daŋ gasagasa gaa dʋɔ yaa.>>

37 Sɛ Yesu kuusi na doŋ sɛ wʋ sɩŋ.

38 Sɛ dukuru gaa ba mʋ gara Ɩsʋɔ tʋm danɛ naŋ na chati tɩba bʋla lɩɩ adugbe gaa tala tie. 39 Gʋ yuora gafie bɩnɛ wʋŋ sɩmɩɛɩ dɩmaŋ, sɛ wʋ na ganaŋkʋ Yesu kuusi sɛ wʋ sɩŋ na, sɛ wʋ tawɩ sɛ, <<Gasiŋteŋ, baalɛ wina yɩɛ Ɩsʋɔ Bu bɛ.>>

40 Na ala barɛ dʋɔ sɩmɩɛɩ taŋasɛ baa kɩɛ. Ba tɩba barɛ n nyina Mariya Magadalini na Mariya, Yakubu pii na Yosisi ba naa na Salome. 41 Na dɩmʋŋ ala bana cha kpaŋ Yesu sɛ ba kɩɛ wʋ dʋɔ gʋ wʋ cha wʋ wɩɛ Galaliya na. Ala fɔɩ baa ba cha kpaŋ ɩ ju Yerusalem na gba wɩɛ dɩmaŋ.

42 Wɩɩ gaa Yudatina a mʋ baa desina ba wʋsɛ baa daa Fɩɛsɛ wɩɩ na bʋyanɔ 43 Yosefu wʋŋ wʋ lɩɩ Arimatiya, wʋ yɩɛ wʋkpa kpari dɩɛnaŋ bɩnɩɛ naŋ bɩnɩɛ dikpeŋ naŋ tɩba wʋrʋ bɛ. Sɛ wʋ dana Ɩsʋɔ Juori gaa kɔnɛ, wʋ yu digela ju Pilato jaŋ ga sʋlʋ sɛ wʋ n mʋ Yesu gɩtatɛ gaa fa ɩ na wʋ a mʋ ga wuu. 44 Gʋ Pilato nyii gʋ Yesu taŋ sɩŋ na, dɩ yɩɛ ɩ doba. Wʋ yagɛ yuora gafie bɩnɛ wʋŋ tasɛ ɩ sɛ Yesu taŋ sɩŋ? 45 Gʋ Pilato nyii lɩɩ yuora gafie bɩnɛ wʋŋ jaŋ sɛ Yesu sɩŋ na, wʋ fa gbɩɛ sɛ Yosefu n ju ga mʋ Yesu gɩtatɛ ga wuu. 46 Sɛ Yosefu ga lɩɛ dɩkalala sɛ wʋ ga sagi Yesu gɩtatɛ lɩɩ daŋ gasagasa gaa dʋɔ, sɛ wʋ mʋ dɩkalala pɔgʋ ɩ. Sɛ wʋ mʋ ɩ ga wuu akpanaŋ bʋɔ naŋ. Sɛ wʋ gbiliti bʋɩ gajanɛ garɛ mʋ tɔ bʋɔ gaa nʋɔ. 47 Sɛ Mariya Magadalini na Mariya, Yosisi wʋnaa ga na diele gaa wʋ wuu Yesu na.