1 Saŋ gʋrʋ dʋɔ Yesu ti bɔrɛ ju Yudatina tʋm danɛ naŋ. Na baalɛ wʋrʋ wɩɛ dɩmaŋ wʋ pam sɩŋ. 2 Na bakpa barɛ wɩɛ dɩmaŋ baa ja sɛ baa pʋɩ Yesu. Dɩmʋŋ dʋɔ baa pɩɛtɩ ɩ baa kɩɛ sɛ wʋ a chɔ baalɛ wʋŋ Fɩɛsɛ wɩɩ gaa yaa. 3 Sɛ Yesu tawɩ wʋŋ wʋ pam sɩŋ na sɛ, <<Kʋlʋ sɩŋ ba asanaŋ jɩna.>>

4 Sɛ Yesu tasɛ ba sɛ, <<Mosesi mbara fa gbɩɛ sɛ dɩ n yɩɛ dɩbam yaa dɩsʋbʋ Fɩɛsɛ wɩɩ? Dɩ n mɔlɔgɩ nkpa yaa dɩ n kʋ bakpa?>> Ama ba n tawɩ bʋrʋ ʋ.

5 Gʋ Yesu mʋ biŋbira kɩɛ ba na wʋ asa n lɩɛ ɛ, akala takɩɛ ba wɩɛna digela doŋ. Sɛ Yesu tawɩ baalɛ wʋŋ sɛ, <<Tɩɛŋɩ n pam.>> Sɛ wʋ tɩɛŋɩ sɛ gaa yɩɛ doŋ. 6 Gabʋanaŋ sɛ Farasitina baa lɩɩ tʋm danɛ gaa naŋ sɛ ba na Juo Hɛrɔdɩ wʋrʋgbɩɛtina baa barɛ ga mʋ sawʋra ganaŋkʋ ba kʋ Yesu na.

7 Yesu na wʋ kpalɛnarɛ kʋlʋ ju Galaliya buo nʋɔ. Sɛ bakpa fɔɩ lɩɩ Galaliya tibi dʋɔ kpaŋ ɩ. 8 Gʋ ba nyii ŋii wʋ a yɩɛ na, bakpa fɔɩ lɩɩ Yudiya tibi dʋɔ, Yerusalem dɩɛ naŋ, Idumiya tibi dʋɔ, Yodaŋ gatɩɛsa, Tiro na Sidoŋ dɩɛsɛ naŋ kɔŋ wʋ jaŋ. 9 Bakpa fɔɩ baa dʋɔ Yesu tawɩ wʋ kpalɛnarɛ baa sɛ ba n ja buori fa ɩ na wʋ a tu ju buo gaa dʋɔ, na bakpa n baa gaa fu wʋ dʋɔ. 10 Akala takɩɛ wʋ chɔ bakpa fɔɩ, dɩmʋŋ dʋɔ sɛ lʋmɩɛtina fɔɩ aja sɛ baa mʋ ba pamɩɛ tapʋ ɩ. 11 Saŋa kʋma gaa bakpa baa feliŋ sʋbʋ wɩɛ ba tɩba na ɩ na, baa lɩɩ sala wʋ asanaŋ kuusi sɛ, <<Nyaŋ n nyina Ɩsʋɔ Bu wʋŋ.>> 12 Sɛ Yesu jɔ ba nyienaŋ sɛ, ba n baa tawɩ wʋ tɛ wʋŋ wʋ yɩɛ na.

13 Yesu ju bʋrɔŋ garɛ dʋɔ, sɛ wʋ yagɛ baa wʋ a jawʋ na sɛ ba kɔŋ wʋ jaŋ. 14 Sɛ wʋ lɩsɛ ba tɩba gifi bala sɛ wʋ yagɛ ba sɛ kpirida* sɛ ba n wɩɛ wʋ jaŋ na wʋ a kpiri ba na baa ga tawɩ Ɩsʋɔ wɩɛ, 15 na baa yu yikuo na baa geŋ feliŋ sʋbʋ lɩɩ bakpa naŋ. 16 Gifi bala baa wʋ yagɛ na ba yɩrɩɛ mɩnaŋ: Simoŋ [wʋŋ Yesu si ɩ yɩrɛ sɛ Petero], 17 Jamesi na wʋ nabu Yohane Sebedi bie, [baa Yesu si ba yɩrɛ sɛ Bʋwanagɛsɩ ga tie akala sɛ duoni fuba bie]. 18 Na Andurusi, Filipo, Batolomiyo, Matiyo, Tomasi, Yakubu Alifiyosi bu, Tadiyosi, na Simoŋ wʋŋ baa yagɛ sɛ Sɩlɔtɩ* 19 na Yudasi Isikariyoti wʋŋ wʋ lɩsɛ Yesu fa na.

20 Yesu ju waa dʋɔ, sɛ bakpa fɔɩ ti gaa jaŋi waa gaa dʋɔ, dɩmʋŋ dʋɔ wʋ na kpalɛnara baa n dɩlɛ yu gbɩɛ na baa di i. 21 Gʋ wʋ lʋŋtina nyii dɩmʋŋ na ba ju baa ga mʋ ɩ kɔŋ dɩɛ, akala takɩɛ bakpa a tawɩ sɛ aja yɩɛ wʋ nfɩɛrɛ warɩɛwʋ.

22 Sɛ Mosesi mbara bakalaasa baa ba barɛ lɩɩ Yerusalem kɔŋ ba wɩɛ dɩmaŋ na tawɩ sɛ, <<Belesebu wʋŋ wʋ yɩɛ feliŋ sʋbʋ bɩnɛ na yikuo wɩɛ wʋ tɩba. Dɩmʋŋ dʋɔ sɛ wʋ a dɩlɛ wʋ a geŋ feliŋ sʋbʋ wʋ a lɩɩ bakpa tɩba.>>

23 Dɩmʋŋ dʋɔ Yesu yagɛ ba kɔŋ wʋ jaŋ sɛ wʋ tawɩ aduuna naŋ fa ba sɛ, <<Sɩnɛ sɛ Sɩtanɩ a dɩlɛ geŋ Sɩtanɩ lɩɩ bakpa tɩba? 24 Juori kʋma gaa ga kpara ga wʋsɛ tɩba gaa yuo dɔŋa na, gaa salɩɛ. 25 Dɩmʋŋ sɛ waa kʋma gaa ga kpara ga wʋsɛ gaa yuo dɔŋa na, gaa salɩɛ. 26 Dɩmʋŋ sɛ Sɩtanɩ gba kpara wʋ wʋsɛ wʋ a yuo dɔŋa na, wʋ aa dɩlɛ sɩŋ wʋ nafara dʋɔ ɔ. Dɩmʋŋ bɩrɛ na wʋ gɩtɛ talɛ mɩnaŋ. 27 Wʋrʋ taŋ wʋ a dɩlɛ ju doŋ-tɛ waa dʋɔ ga mʋ wʋ gapatɩɛ ɛ, amʋɔ wʋ chɩŋkpɩɛ pɔgʋ ɩ pɔɩ na wʋ a dɩlɛ ŋmɛlɩ ɩ. 28 Maa tawɩ sɛ n nyii na dieli sɛ Ɩsʋɔ aja wʋ a mʋ wʋkpa dɩsʋbʋ kpiniŋ na mbusu wɩɛ chɩɛ ɩ. 29 Ama wʋkʋma wʋŋ wʋ tawɩ mbusu wɩɛ baŋ Ɩsʋɔ Feliŋ na bɩrɛ, wʋ aa mʋ wʋ dɩsʋbʋ chɩɛ ɩ. Akala takɩɛ wʋ yɩɛ dɩsʋbʋ gaa ga taŋ gɩtɛ na.>>

30 Yesu tawɩ wɩɛ ŋina akala takɩɛ bakpa baa tawɩ sɛ feliŋ sʋbʋ wɩɛ wʋ tɩba.

31 Dɩmaŋ sɛ Yesu wʋnaa na wʋnabie kɔŋ diele gaa wʋ wɩɛ na gaa dʋɔ sɩŋ waa gaa asʋŋ, sɛ ba kpiri wʋrʋ sɛ wʋŋ ga yagɛ ɩ fa ba. 32 Na bakpa fɔɩ chaɩ logo ɩ, sɛ ba tawɩ ɩ sɛ, <<Kɩɛ, nnaa na nnabie sɩmɩɛɩ waa gaa asanaŋ baa ja nyaŋ.>>

33 Sɛ Yesu tasɛ ba sɛ, <<Mmʋɔ n nyina manaa na manabie?>>

34 Dɩmaŋ sɛ wʋ kɩɛ baa ba chaɩ logo ɩ na, sɛ wʋ tawɩ ba sɛ, <<Kɩɛ, manaa na manabie mɩnaŋ. 35 Wʋkʋma wʋŋ wʋ a yɩɛ Ɩsʋɔ jawʋ na n nyina manaa, manabu na madiesi.>>