1 Gʋ Yesu a lɩɩ Ɩsʋɔ tʋm danɛ naŋ na, wʋ kpalɛnara baa tɩba wʋrʋ tawɩ ɩ sɛ, <<Wʋkalaasa, kɩɛ bʋɛ ajanɩɛ abama ŋii ba mʋ ma danɩŋ ŋina sɛ ŋɩ yɩɛ dieli.>>

2 Sɛ Yesu tawɩ ɩ sɛ, <<Naa ɩ na danɩŋ ajanɩɛ ŋina ya? Bʋɩ garɛ baa ti jaga ga dʋɔ-dʋɔ ɔ. Baa salɩɛ ŋɩ kpiniŋ.>>

3 Gʋ Yesu chaɩ olifi dasɛ bʋrɔŋ gaa dʋɔ Ɩsʋɔ tʋm danɛ gaa sinabie. Petero, Jamesi, Yohane na Andurusi nyiŋeŋ kɔŋ wʋ jaŋ gaa tasɛ ɩ sɛ, 4 <<Tawɩ daa, saŋa gamʋɔ sɛ ŋina aja tibi? Sɛ be aaŋ ja yɩɛ daasɛ gaa gaa kalaa sɛ ŋina kpiniŋ aja kɔŋ tɩba.>>

5 Sɛ Yesu lɩsɛ ba nʋɔ sɛ, <<N kɩɛ amɩɛ wʋsɛ dʋɔ na dieli, na wʋrʋ n baa pɩna amɩɛ. 6 Bakpa fɔɩ aja kɔŋ ma yɩrɛ naŋ na baa gaa tawɩ sɛ, <Baa n nyina Kirisito wʋŋ> na baa pɩna bakpa fɔɩ. 7 Ɩ nyii yuo gaa ga tirina amɩɛ na yuo gaa ga wɩɛ taŋasɛ wɩɛ na, n baa yela na amɩɛ agela a kʋlʋ. Akala takɩɛ ŋɩ tiri gʋ ŋina a tibi, ama ŋii kalaa sɛ dulunya dɩtamtɩŋ talɛ ɛ. 8 Atawɩ yɩrɩ kpiniŋ aja yuo dɔŋa na juori a yuo juori. Na tibi a jigisi akpie dʋɔ-akpie dʋɔ na wɔŋfɩrɛ a kɔŋ. Ŋina kpiniŋ kɩɛna bɛ takɩɛ dʋŋɩwʋ ŋii ŋɩ dɔŋ asanaŋ pɔɩ na alʋ a lʋrʋ na.>>

9 Dɩmʋŋ dʋɔ, ŋɩ tiri gʋ n kɩɛ amɩɛ wʋsɛ dʋɔ na dieli. Ma dʋɔ, baa chaŋ amɩɛ mʋ ju wɩɛ adiitiŋ bɩnɩɛ asanaŋ na baa taɩ amɩɛ achʋchʋɛ Yudatina tʋm danɛ naŋ, baa chaŋ amɩɛ ju Roma bɩnɩɛ baa baa kɩɛ Isirali tibi dʋɔ na, na juoneŋ asanaŋ na baa ga di amɩɛ wɩɛ. Dɩmaŋ sɛ ɩ yu gbɩɛ tawɩ Ɩsʋɔ Wɩɛ Abama ŋii fa ba. 10 Ŋɩ tiri gʋ baa chɩŋkpɩɛ tawɩ Ɩsʋɔ Wɩɛ Abama ŋii fa atawɩ yɩrɩ kpiniŋ. 11 Sɛ ba chaŋ amɩɛ ju wɩɛ didiitiŋ na, n baa nyala amɩɛ wʋsɛ wɩɛ ŋii ɩ tawɩ na dʋɔ. Dɩ tala dɩmaŋ na, n tawɩ a kʋma ŋii Ɩsʋɔ aja kalaa amɩɛ na. Akala takɩɛ naa amɩɛ tɩŋtɩŋ aaŋ ja ɩ tawɩ ɩ, ama Ɩsʋɔ Feliŋ aaŋ ja tawɩ.

12 Sɛ Yesu tawɩ sɛ nalʋrʋ bie aja lɩsɛ dɔŋa fa na baa kʋ ba, na juo a lɩsɛ wʋbu fa. Bachaasɛ aja kʋlʋ sɩŋ ba lʋrʋda dʋɔ na baa kʋ ba. 13 Ma dʋɔ, bakpa kpiniŋ aja kɔla amɩɛ. Ama wʋŋ wʋ a sɩŋ na doŋ ga tala dɩtamtɩŋ na, wʋ a yu nkpa.

14 Sɛ Yesu ti ju dʋɔ tawɩ sɛ, <<Dɩ kɔŋ sɛ ɩ na akɔlɛsa ŋii ŋɩ wɩɛ Ɩsʋɔ tʋm danɛ gaa naŋ na, sɛ dɩ n daga na ŋii sɩŋ dɩmaŋ ŋ, [n yela wʋkʋma wʋŋ wʋ a karaŋ dɩmʋŋ wɩɛ ŋina na a nyii tie.] N yela wʋkʋma wʋŋ wʋ wɩɛ Yudiya tibi dʋɔ na a se ju bʋrɔŋsɛ dʋɔ. 15 N yela na wʋŋ wʋ wɩɛ danɛ adugbe na, n baa tibi jʋʋ danɛ naŋ ga mʋ bʋrʋ. 16 N yela na wʋŋ wʋ wɩɛ fʋɔnaŋ na, n baa yɩɛ wʋ nfɩɛrɛ sɛ wʋ a ti bɔrɛ kɔŋ dɩɛ gaa mʋ wʋ adugbe gagba. 17 Dɩmʋŋ gɩyɩɛnɩŋ ŋina naŋ na, filietina na alʋsɔna, baa lakʋ! 18 N jɔ dɩga na dɩmʋŋ wɩɛ ŋina n baa tibi gbaŋgbaŋ saŋa. 19 Akala takɩɛ, dɩmʋŋ saŋa gana naŋ na, wʋkpa wʋsɛ aja chaŋ ɩ na dieli kii saŋa gaa Ɩsʋɔ lɔ dulunya gaa tala jaŋ, sɛ ŋɩ ŋarɛ baa ti tibi i. 20 Sɛ Ɩsʋɔ n kɔgɩ gɩyɩɛnɩŋ ŋina dʋɔ na, dɩmʋŋ bɩrɛ, nafʋɔ wʋrʋ baa yu nkpa a. Ama baa wʋ lɩsɛ ba na dʋɔ, wʋ a kɔgɩ gɩyɩɛnɩŋ ŋii dʋɔ. 21 Dɩmʋŋ saŋa gana naŋ na, sɛ wʋrʋ tawɩ amɩɛ sɛ, <N kɩɛ, Kirisito wʋŋ mɩnaŋ,> yaa <N kɩɛ, wʋŋ n wɩɛna dɩmaŋ na,> n baa lɩɛ di. 22 Akala takɩɛ, barɛ baa baa yɩɛ akarɩɛ sɛ ba yɩɛ Kirisito na akarɩɛ bajana aja kɔŋ gaa yɩɛ daasɛ na adaŋgana na baa mʋ pɩna baa Ɩsʋɔ lɩsɛ ba na. 23 Dɩmʋŋ dʋɔ, n kɩɛ amɩɛ wʋsɛ dʋɔ na dieli, ma chɩŋkpɩɛ tawɩ amɩɛ wɩɛ ŋina kpiniŋ pɔɩ na saŋa gana a tala.>>

24 Sɛ Yesu ju dʋɔ tawɩ sɛ, <<Dɩmʋŋ saŋa gana naŋ, wʋkpa wʋsɛ chaŋ wʋrʋgbɩɛ na, wiita baa lɩɩ ɩ, sɛ gafita baa fʋlʋŋsɛ ɛ.>> 25 Achikpebi aja kuli lɩɩ Ɩsʋɔ tanɛ naŋ gaa sala, na Ɩsʋɔ adugbe abʋrɩ kpiniŋ ajigisi.

26 Dɩmʋŋ saŋa gana naŋ na, bakpa aja na Wʋkpa Bu wʋŋ a kɔnɛ na yikuo na jilima lɩɩ Ɩsʋɔ tanɩɛ naŋ. 27 Na wʋ a kpiri wʋ gabʋɔsɛ dulunya naŋ gapɩlɛkʋma na baa pala sila Ɩsʋɔ bakpa baa wʋ lɩsɛ dulunya naŋ na kpiniŋ lɩɩ wiita dɩlɩɩtɩŋ na dɩsalɩtɩŋ, adugbe na atagbɩɛ.

28 Sɛ Yesu jɔ ba diduu sɛ, <<N kɩɛ figi daŋ na ɩ kpalɩɛna bʋrʋ garɛ. Ga pɔrɔgɩ na, n jiŋ gʋ awuluŋ tirina. 29 Dɩmʋŋ gba sɛ ɩ na ŋina kpiniŋ a tibi na, n jiŋ gʋ Wʋkpa Bu wʋŋ bɔrɛ kɔŋ tirina, wʋ wɩɛ buonɔ. 30 Maa tawɩ sɛ n nyii na dieli, gɩnanaŋ gana baa laŋ ŋ ga tala saŋa gaa ŋina kpiniŋ aja tibi. 31 Ɩsʋɔ adugbe na tie aja laŋ, ama ma wɩɛ ŋii bɩrɛ, ŋii laŋ ŋ.>>

32 Sɛ Yesu ju dʋɔ tawɩ sɛ, <<Wʋrʋ ba jiŋ wɩɩ gaa yaa saŋa gaa a. Ɩsʋɔ gabʋɔsɛ baa ba wɩɛ Ɩsʋɔ adugbe yaa Bu wʋŋ gba ba jiŋ ŋ, amʋɔ Juo wʋŋ nyiŋeŋ. 33 Dɩmʋŋ dʋɔ n kɩɛ amɩɛ wʋsɛ dʋɔ na dieli na ɩ gie, akala takɩɛ ɩ ba jiŋ saŋa gaa ŋii kɔŋ na a. 34 Ŋɩ kɩɛna bɛ takɩɛ baalɛ wʋrʋ a ju gbɩɛ sɛ wʋ mʋ wʋ waa dʋ wʋ tʋmɩra pamɩɛ naŋ. Sɛ wʋ fa wʋkʋma wʋ dɩtʋm gaa wʋ n yɩɛ. Sɛ wʋ tawɩ buonɔ kɩɛrɛ wʋŋ sɛ wʋŋ duo wʋ wʋsɛ dʋɔ.>>

35 Dɩmʋŋ dʋɔ, n duo amɩɛ wʋsɛ dʋɔ, akala takɩɛ ɩ ba jiŋ wɩɩ gaa waatɛ wʋŋ aja bɔrɛ kɔŋ ŋ. A dɩlɛ yɩɛ bʋyanɔ, tɩɛtɩtɩba, tafɩlɛ yaa nafo, 36 na wʋ n baa gaa purugi amɩɛ ɩ duwei asoroŋ. 37 Wɩɛ ŋii ma tawɩ fa amɩɛ na, maa tawɩ wʋkʋma sɛ, <<N duo amɩɛ wʋsɛ dʋɔ.>>