1 Gʋ dɩ kakaa wɩɛ ala na Yudatina Nyiŋi Asadi Adiya di* na Bodobodo* gaa ga Tana Yiisi Asadi Adiya di gɩyɩɛnɩŋ a tala na, sei bɩnɩɛ na mbara bakalaasa ja gbɩɛ gaa baa mʋna dʋɔ wɩsɛ chaŋ Yesu na baa kʋ ɩ. 2 Ama ba tawɩ sɛ, <<N baa yela dɩ chaŋ ɩ nyiŋi asadi adiya di gɩyɩɛnɩŋ ŋina naŋ, naa dɩmʋŋ na, ŋii kɔna siŋii dɩɛ naŋ.>>

3 Gʋ Yesu wɩɛ Batani Simoŋ wʋŋ wʋ cha kili gɩchalaŋa waa dʋɔ wʋ a di na, sɛ alʋ wʋrʋ kɔŋ dɩmaŋ wʋ chamɩna sapɩɛ bie garɛ yela naadɩ* nuŋ alifeŋsa ŋii ŋɩ yawʋ wɩɛ doŋ wɩɛ ga tɩba sɛ wʋ chɩɛgɩ wʋrʋgɩ Yesu nyinaŋ.

4 Gʋ bakpa baa ba wɩɛ dɩmaŋ na barɛ na dɩmʋŋ na, ba kara biŋbira sɛ ba tawɩ dɔŋa sɛ, <<Be n yɩɛ sɛ wʋ a warɩɛ nuŋ alifeŋsa ŋina? 5 Nafʋɔ baa dɩlɛ yaa nuŋ alifeŋsa ŋina na baa yu wʋrʋ bɩriŋnʋɔ kɩmtʋɔ na baa mʋ aterembie dinari ŋii fa ayɔŋtina.>> Sɛ ba tawɩ wʋ asanaŋ.

6 Sɛ Yesu tawɩ ba sɛ, <<N yela alʋ wʋŋ! Be n yɩɛ sɛ ɩ nyala ɩ dɩmʋŋ? Wʋ yɩɛ bʋrʋ gabam fa maŋ bɛ. 7 Akala takɩɛ ayɔŋtina bɩrɛ, ba wɩɛ amɩɛ jaŋ. Ɩ dɩlɛ yɩɛ dɩbam fa ba saŋa kʋma gaa ɩ jawʋ na. Ama maŋ bɩrɛ, ma taŋ amɩɛ jaŋ saŋ kʋma a. 8 Alʋ wʋŋ yɩɛ bʋrʋ gaa wʋ a dɩlɛ. Wʋ chɩɛgɩ nuŋ alifeŋsa ŋii wʋrʋgɩ ma wʋsɛ mʋ desina maŋ si daa ma wuu bɛ. 9 Maa tawɩ sɛ n nyii na dieli sɛ dulunya naŋ gapɩlɛkʋma gaa baa tawɩ Ɩsʋɔ Wɩɛ Abama ŋii na, baa tawɩ ŋii alʋ wʋŋ yɩɛ na mʋ nyiŋi ɩ.>>

10 Sɛ Yudasi Isikariyoti, kpirida gifi bala baa tɩba wʋrʋ ju Ɩsʋɔ sei bɩnɩɛ jaŋ na wʋ a ga lɩsɛ Yesu fa ba. 11 Ba asadi wɩɛ ŋii wʋ tawɩ ba na dʋɔ. Sɛ ba tawɩ ɩ sɛ baa fa ɩ aterembie. Lɩɩ dɩmʋŋ saŋa gana mʋ a ju na, sɛ wʋ fara wʋ a ja gbɩɛ gaa wʋ a mʋna dʋɔ lɩsɛ Yesu fa ba.

12 Wɩɩ gaa ga doŋ asanaŋ fa Bodobodo gaa ga Tana Yiisi Asadi Adiya di na, ŋɩ yɩɛ ba ayɩɛsa sɛ ba n kʋ Nyiŋi Asadi Adiya di fiebu mʋ diesi gadiesa. Sɛ Yesu kpalɛnara baa tasɛ ɩ sɛ, <<Le sɛ nyaa ja sɛ dɩ ju ga desina fa nyaŋ na nyaa ga di Nyiŋi Asadi Adiya di adiya?>>

13 Yesu kpiri wʋ kpalɛnara baa tɩba bala sɛ wʋ tawɩ ba sɛ, <<N ju dɩɛ janɛ gaa naŋ ɩ jaŋina baalɛ wʋrʋ wʋ siana sapɩɛ bie na lɩŋ, n kpaŋ ɩ, 14 ju waa gaa wʋ a jʋʋ ga dʋɔ na. N tawɩ waatɛ wʋŋ sɛ, <Wʋkalaasa wʋŋ sɛ, kalaa daa mʋɔra danɛ gaa maŋ na ma kpalɛnara dɩ cha tɩba di Nyiŋi Asadi Adiya di adiya ŋii.> 15 Wʋ a kalaa amɩɛ abaŋsʋrʋ danɛ janɛ garɛ sɛ ba desina tɩba na. Dɩmaŋ sɛ n yɩɛ nyiŋi asadi adiya di adiya ŋii fa daa.>>

16 Sɛ wʋ kpalɛnara baa kʋlʋ ju dɩɛ janɛ gaa naŋ ga na bʋrʋkʋma ganaŋkʋ Yesu tawɩ ba na. Sɛ ba yɩɛ Nyiŋi Asadi Adiya di adiya ŋii dɩmaŋ.

17 Gʋ bʋyanɔ talɛ na, Yesu na wʋ kpirida gifi bala baa kɔŋ waa gaa dʋɔ. 18 Gʋ ba chaɩ baa di na, sɛ Yesu tawɩ ba sɛ, <<Maa tawɩ sɛ n nyii na dieli sɛ, amɩɛ baa maŋ na amɩɛ dɩ di n na tɩba wʋrʋ aja lɩsɛ maŋ fa.>>

19 Gʋ ba nyii wɩɛ ŋii Yesu tawɩ na, sɛ ba bɔtaa. Sɛ ba tasɛ Yesu garɛ-garɛ sɛ, <<Maŋ bɛ yaa?>>

20 Sɛ Yesu lɩsɛ nʋɔ sɛ, <<Amɩɛ gifi bala bana tɩba wʋdʋŋdʋlʋŋ wʋŋ maŋ na ɩ dɩɩ di nyɩna garɛ naŋ na aaŋ ja wʋ a lɩsɛ maŋ fa. 21 Wʋkpa Bu wʋŋ aja sɩŋ ganaŋkʋ ba sabɩɛ wʋ wʋsɛ dʋɔ wɩɛ Ɩsʋɔ Wɩɛ naŋ na. Ama wʋkpa wʋŋ wʋ a lɩsɛ Wʋkpa Bu wʋŋ fa na, wʋŋ lakʋ! Nafʋɔ ba n lʋrʋ ɩ gba bɔ.>>

22 Gʋ Yesu na wʋ kpalɛnara baa a di na, wʋ mʋ bodobodo sɛ wʋ yɩlɩ Ɩsʋɔ sɛ wʋ jaɩ-jaɩ tɩba mʋ fa wʋ kpalɛnara baa, sɛ wʋ tawɩ ba sɛ, <<Ma wʋsɛ mɩnaŋ, n lɩɛ di.>>

23 Sɛ Yesu mʋ gafie bie gaa wayɩŋ sʋlʋŋ wɩɛ tɩba sɛ wʋ yɩlɩ Ɩsʋɔ sɛ wʋ mʋ fa wʋ kpalɛnara baa kpiniŋ sɛ ba n nyʋɔ fa dɔŋa.

24 Sɛ Yesu tawɩ ba sɛ, <<Ma asima mɩnaŋ, ŋii ŋɩ chɩɛgɩ wʋrʋgɩ fa bakpa kpiniŋ, ŋii n nyina dɩkɔŋ fɔlɛ gaa Ɩsʋɔ na bakpa jʋɔ. 25 Maa tawɩ sɛ n nyii na dieli sɛ, maa ti nyʋɔ wayɩŋ sʋlʋŋ ŋina ŋarɛ ɛ mʋ ga tala wɩɩ gaa maa nyʋɔ ŋɩ afɔlɩɛ Ɩsʋɔ Juori gaa naŋ.>>

26 Gʋ ba kpie numba yɩlɩ Ɩsʋɔ taŋ na, ba lɩɩ dɩmaŋ ju olifi dasɛ bʋrɔŋ dʋɔ.

27 Sɛ Yesu tawɩ wʋ kpalɛnara baa sɛ, <<Amɩɛ kpiniŋ ɩ puseŋ yela maŋ.>> Akala takɩɛ ba sabɩɛ Sabɩɛwɩɛ ŋii naŋ sɛ, Ɩsʋɔ tawɩ sɛ,

<<Maa kʋ feŋ kparɛ wʋŋ

na feŋ baa a puseŋ.>>✝

28 Ama ma feŋ lɩɩ sɩŋ naŋ wʋrʋgbɩɛ na, maa pala amɩɛ asanaŋ ju Galaliya.

29 Sɛ Petero tawɩ Yesu sɛ, <<Sɛ ba kpiniŋ baa puseŋ yela nyaŋ na, maŋ bɩrɛ, maa yɩɛ dɩmʋŋ ŋ.>>

30 Sɛ Yesu tawɩ ɩ sɛ, <<Nyaŋ Petero, maa tawɩ sɛ nyii na dieli sɛ yuluma gana, pɔɩ na dijimba akɔlɛ bʋla na, nyaa pɩɛ maŋ butoro sɛ n ba jiŋ maŋ ŋ.>>

31 Sɛ Petero tawɩ baŋ dʋɔ sɛ, <<Dɩkɔŋ sɛ maŋ na nyaŋ dɩɩ sɩŋ gba, maa tawɩ sɛ ma ba jiŋ nyaŋ ŋ.>> Dɩmʋŋ sɛ wʋ kpalɛnara baa ba kakaa na gba tawɩ.

32 Sɛ Yesu na wʋ kpalɛnara ju diele gaa baa yagɛ sɛ Gesemani, sɛ wʋ tawɩ wʋ kpalɛnara baa sɛ, <<N cha jɩna na maa ga jɔ dɩga.>> 33 Sɛ Yesu mʋ Petero, Jamesi na Yohane kpaŋ wʋ wʋsɛ. Dɩmaŋ sɛ wʋ fara wʋ a bɔtaa sɛ wʋ jʋʋ gayɩyɩɛ. 34 Sɛ Yesu tawɩ ba sɛ, <<Wʋsɛ yɔgɔsɛ su ma digela gʋ ŋii dɩlɛ mʋ maŋ ju sɩŋ naŋ. N cha jɩna na ɩ gie.>>

35 Gʋ Yesu ju wʋ asanaŋ chonii na, sɛ wʋ laŋ fu sɛ wʋ jɔ dɩga sɛ, nafʋɔ aja yɩɛ dieli na, yela na awʋrʋfʋɔ ŋina a giligi maŋ. 36 Sɛ wʋ tawɩ sɛ, <<Aba,* Juo! Nyaa dɩlɛ yɩɛ bʋrʋkʋma. Yela na awʋrʋfʋɔ ŋina a giligi maŋ. Ama naa ŋii maa jawʋ ʋ, ama ŋii nyaa jawʋ na.>>

37 Gʋ Yesu bɔrɛ ju wʋ kpalɛnara batoro baa jaŋ na, wʋ ga na gʋ ba duo. Sɛ Yesu tasɛ Petero sɛ, <<Simoŋ, nya duo bɛ? Nya n dɩlɛ cha karafɩɛ darɛ yela nya n duo? 38 N gie na ɩ jɔ dɩga fa Ɩsʋɔ na n ba jʋʋ lɔ tɩba naŋ. Amɩɛ sʋbʋ a jawʋ, ama amɩɛ wʋsɛ bɩrɛ fʋʋ.>>

39 Sɛ Yesu bɔrɛ ju ga jɔ dɩga tawɩ wɩɛ a dʋŋdʋlʋŋ ŋina. 40 Sɛ Yesu bɔrɛ kɔŋ gaa na gʋ wʋ kpalɛnara batoro baa duo akala takɩɛ asoroŋ a kʋ ba fɔɩ sɛ ba ba jiŋ bʋrʋ gaa baa tawɩ fa ɩ.

41 Gʋ Yesu ti bɔrɛ ju ba jaŋ butoro-tɛ na, wʋ tawɩ ba sɛ, <<Ɩ saŋ ɩ duo yela ɩ fɩɛsɛ? Dɩ mɩɛ! N kɩɛ, saŋa gaa talɛ, baa lɩsɛ Wʋkpa Bu wʋŋ dʋ dɩsʋbʋ yɩɛra pamɩɛ naŋ. 42 N kʋlʋ na dɩ ju! N kɩɛ, wʋŋ wʋ a lɩsɛ maŋ fa na aaŋ kɔnɛ na!>>

43 Gʋ Yesu saŋ wʋ a tawɩ wʋ a fa wʋ kpalɛnara baa na, Yudasi wʋŋ wʋ yɩɛ wʋ kpirida gifi bala baa tɩba wʋrʋ na, wʋ na jama baa ba kpamɩna ɩ ba chamɩna yuo dabɩlasɛ na akolie na kɔŋ dɩmaŋ. Na Sei bɩnɩɛ, Mosesi mbara bakalaasa na dɩɛ bɩnɩɛ n kpiri ba.

44 Sɛ Yudasi lɩsɛrɛ wʋŋ kalaa ba daasɛ sɛ, <<Wʋŋ maa puga ɩ na, na wʋŋ mɩnaŋ. N chaŋ ɩ, na ɩ chaŋ wʋ tɩba na dieli na ɩ mʋ ɩ ju.>> 45 Gabʋanaŋ dɩmaŋ sɛ Yudasi ju Yesu jaŋ sɛ wʋ tawɩ sɛ, <<Wʋkalaasa>> Sɛ wʋ puga ɩ. 46 Dɩmaŋ sɛ bakpa baa chaŋ Yesu sɛ ba chaŋ wʋ tɩba na doŋ. 47 Sɛ baa ba sɩmɩɛɩ tirina Yesu na, tɩba wʋrʋ lɩsɛ yuo dabɩla kara Ɩsʋɔ sei bɩnɩɛ naŋ bɩnɛ wʋŋ tʋmɩrɛ dɩlɛ lɩsɛ.

48 Sɛ Yesu tasɛ ba sɛ, <<Ma yɩɛ ŋmɩɛlɛ wʋŋ wʋ chamɩna doŋ wʋ a lɩɛ bakpa abʋrɩ bɛ sɛ ɩ mʋ yuo dabɩlasɛ na akolie ɩ kɔŋ ɩ chaŋ maŋ?>> 49 Wɩɩ kʋma ma wɩɛ amɩɛ jaŋ Ɩsʋɔ tʋm danɛ naŋ maa kalaa amɩɛ, ama ɩŋ chaŋ maŋ ŋ. Ama ŋɩ tiri gʋ ŋina a tibi ganaŋkʋ ba sabɩɛ Sabɩɛwɩɛ ŋii naŋ na, a kɔŋ tɩba. 50 Sɛ wʋ kpalɛnara baa kpiniŋ puseŋ yela ɩ.

51 Sɛ ba chaŋ yeleŋbu wʋrʋ wʋ fuona dɩkalala nyiŋeŋ wʋ kpamɩna Yesu. 52 Sɛ wʋ yela dɩkalala gaa lɔ sɛ wʋ se laŋ diboloŋ.

53 Sɛ ba mʋ Yesu ju sei bɩnɩɛ naŋ bɩnɛ wʋŋ waa dʋɔ sɛ sei bɩnɩɛ, dɩɛ bɩnɩɛ na mbara bakalaasa kpiniŋ gaa sila. 54 Na Petero cha wʋ kpamɩna Yesu nafarɛ-nafarɛ ga jʋʋ sei bɩnɩɛ naŋ bɩnɛ wʋŋ waa gaa naŋ sɛ wʋ ga cha kɩɛra baa jaŋ wʋ a wʋlʋ bʋala.

55 Sei bɩnɩɛ na dɩɛ naŋ bɩnɩɛ naŋ bɩnɩɛ dikpeŋ baa kpiniŋ aja wɩɛ ŋii baa sɩŋ ŋɩ dʋɔ mʋ sʋɔ Yesu na baa kʋ ɩ. Ama ba n yu u. 56 Sɛ bakpa fɔɩ di akarɩɛ seriya chicha Yesu, ama ba seriya ŋii n yɩɛ bʋdʋŋdʋlʋŋ ŋ.

57 Sɛ barɛ kʋlʋ di akarɩɛ seriya chicha Yesu sɛ, 58 <<Dɩ nyii gʋ wʋ tawɩ sɛ maa salɩɛ Ɩsʋɔ tʋm danɛ gaa wʋkpa maa na, na maa mʋ wɩɛ atoro ma gafɔlɛ gaa naa wʋkpa n ma na.>> 59 Ama ba di akarɩɛ seriya ŋii ŋɩ ba yɩɛ bʋdʋŋdʋlʋŋ ŋ.

60 Sɛ sei bɩnɩɛ naŋ bɩnɛ wʋŋ kʋlʋ sɩŋ ba kpiniŋ ba asanaŋ tasɛ Yesu sɛ, <<Seriya ŋii baa di baa chicha nyaŋ n na, nya tana ŋɩ nʋɔ lɩsɛ?>> 61 Ama Yesu n tawɩ bʋrʋ ʋ. Sɛ sei bɩnɩɛ naŋ bɩnɛ wʋŋ ti bɔrɛ tasɛ Yesu sɛ, <<Nyaŋ n nyina Kirisito, Ɩsʋɔ wʋŋ dɩtʋm ɩ na Bu wʋŋ?>>

62 Sɛ Yesu lɩsɛ nʋɔ sɛ, <<Maŋ n nyina ɩ! Ɩ na Wʋkpa Bu wʋŋ wʋ chaɩ Ɩsʋɔ Doŋ-tɛ wʋŋ pam jɩsaŋ dʋɔ wʋ a lɩɩ Ɩsʋɔ tanɩɛ naŋ wʋ a kɔnɛ.>>

63 Sɛ sei bɩnɩɛ naŋ bɩnɛ wʋŋ chati wʋ gagba, sɛ wʋ tasɛ sɛ, <<Be dʋɔ sɛ dɩ ti dɩ ja seriyatina barɛ?>> 64 Ɩ nyii mbusu wɩɛ ŋii wʋ tawɩ baŋ Ɩsʋɔ na? Sɩnɛ n nyina amɩɛ nfɩɛrɛ? Sɛ ba kpiniŋ ba fu ɩ dɩpʋɛ sɛ wʋ daga sɩŋ.

65 Sɛ barɛ tɔ mɩtalɩŋ fu Yesu, sɛ ba mʋ dukuru pɔgʋ wʋ asa sɛ ba jɔ ɩ tasɛ ɩ sɛ, <<Gbala kalaa wʋŋ wʋ jɔ nyaŋ na.>> Sɛ kɩɛra baa mʋ ɩ ju ga tugu ɩ.

66 Gʋ Petero wɩɛ waa gaa naŋ na, Sei bɩnɩɛ naŋ bɩnɛ wʋŋ tʋmɩrɛ galibiesi tɩba wʋrʋ kɔŋ dɩmaŋ. 67 Gʋ wʋ na Petero a wʋlʋ bʋala na, wʋ kɩɛ ɩ na dieli sɛ wʋ tawɩ ɩ sɛ, <<Nyaŋ gba, nya kpi Yesu Nasarati wʋkpa wʋŋ dʋɔ.>>

68 Ama Petero pɩɛ sɛ, <<Ma ba jiŋ ŋ, sɛ wɩɛ ŋii nya tawɩ na gba maa nyii tie e.>> Sɛ Petero lɩɩ ju waa buonɔ ga wii.

69 Sɛ tʋmɩrɛ galibie wʋŋ ti na Petero dɩmaŋ na, wʋ ti bɔrɛ tawɩ bakpa baa ba sɩmɩɛɩ ɩ dɩmaŋ na sɛ, <<Baalɛ wina gba kpi Yesu kpalɛnara baa dʋɔ.>> 70 Sɛ Petero ti bɔrɛ pɩɛ. Gʋ dɩ yɩɛ chonii na, baa ba sɩmɩɛɩ ɩ dɩmaŋ na tawɩ Petero sɛ, <<Gasiŋteŋ, nya yɩɛ ba tɩba wʋrʋ bɛ. Akala takɩɛ nya yɩɛ Galaliya wʋkpa bɛ.>>

71 Sɛ Petero tawɩ nʋɔsɛ fa wʋ wʋsɛ sɛ, <<Ma ba jiŋ baalɛ wʋŋ ɩ tawɩ wʋ wʋsɛ dʋɔ wɩɛ n na a.>>

72 Gabʋanaŋ sɛ dijimba kɔlɛ bʋlatɛ. Sɛ Petero nyiŋi wɩɛ ŋii Yesu tawɩ ɩ na sɛ, <<Pɔɩ na dijimba a kɔlɛ bʋlatɛ na, nyaa pɩɛ butoro sɛ n ba jiŋ maŋ ŋ.>> Sɛ wʋ wii.