1 Wɩɛ akalisa ŋarɛ wʋrʋgbɩɛ na, Yesu bɔrɛ kɔŋ Kapeniyum dɩɛ naŋ sɛ ba nyii gʋ wʋ kɔŋ waa gaa wʋ a jʋʋ ga dʋɔ na naŋ. 2 Dɩmʋŋ dʋɔ, bakpa fɔɩ gaa jaŋi waa gaa dʋɔ sɛ waa gaa suu sɛ dɩjʋʋtɩŋ tɩtaŋ na bakpa a jʋʋ ʋ. Sɛ Yesu tawɩ Ɩsʋɔ wɩɛ fa ba. 3 Dɩmaŋ sɛ baala banara barɛ sɩlɛ buobi wʋrʋ kɔŋ dɩmaŋ. 4 Ama bakpa fɔɩ baa dʋɔ, ba n yu gbɩɛ mʋ buobi wʋŋ tala wʋ jaŋ ŋ. Dɩmʋŋ dʋɔ ba jiŋ danɛ adugbe, fʋrʋ bʋɔ diele gaa wʋ wɩɛ na. Sɛ ba tibina ɩ yela wʋ duwei kalaŋ dʋɔ si wʋ asanaŋ. 5 Gʋ Yesu na ba lɩɛdi na, wʋ tawɩ buobi wʋŋ sɛ, <<Mabu, ma mʋ n dɩsʋbʋ chɩɛ nyaŋ.>>

6 Gʋ Yesu tawɩ dɩmʋŋ wɩɛ ŋina na, mbara bakalaasa baa barɛ wɩɛ dɩmaŋ baa tawɩ ba nyienaŋ sɛ, 7 <<Be dʋɔ sɛ wʋkpa wina a tawɩ dɩmʋŋ? Wʋ a tawɩ mbusu wɩɛ. Mmʋɔ aaŋ dɩlɛ mʋ dɩsʋbʋ chɩɛ? Amʋɔ Ɩsʋɔ nyiŋeŋ.>>

8 Gabʋanaŋ sɛ Yesu jiŋ ba nfɩɛrɛ, dɩmʋŋ dʋɔ wʋ tasɛ ba sɛ, <<Be dʋɔ sɛ ɩ fa nfɩɛrɛ ŋina? 9 Ŋɩ amʋɔ n duo na tibi naŋ, sɛ ma tawɩ fa buobi sɛ, ma mʋ n dɩsʋbʋ chɩɛ nyaŋ, yaa ma tawɩ sɛ, kʋlʋ na nyaa mʋ n kalaŋ na nyaa pala. 10 Ama ganaŋkʋ aja yela na ɩ jiŋ gʋ Wʋkpa Bu wʋŋ wɩɛna yikuo tibi dʋɔ sɛ wʋ a dɩlɛ mʋ dɩsʋbʋ chɩɛ.>> Sɛ Yesu tawɩ buobi wʋŋ sɛ, 11 <<Maa tawɩ nyaŋ sɛ, kʋlʋ mʋ n kalaŋ na nyaa ju dɩɛ.>> 12 Gabʋanaŋ sɛ buobi wʋŋ kʋlʋ mʋ wʋ kalaŋ wʋ a ju yela ba kpiniŋ a kɩɛ ɩ. Sɛ dɩ yɩɛ wʋkʋma wina doba sɛ ba kalɩɛ Ɩsʋɔ tawɩ sɛ, <<Dɩ n naa ta ŋina duluŋ ŋ.>>

13 Wɩɩ darɛ, Yesu bɔrɛ ju Galaliya buo nʋɔ, sɛ bakpa fɔɩ kɔŋ wʋ jaŋ sɛ wʋ kalaa-kalaa ba Ɩsʋɔ wɩɛ. 14 Gʋ wʋ dɔŋ buo nʋɔ wʋ a ju na, wʋ na Alifiyosi bu Lewi chaɩ lampo danɛ naŋ. Sɛ Yesu tawɩ ɩ sɛ, <<Kpaŋ maŋ.>> Sɛ wʋ kʋlʋ kpaŋ ɩ.

15 Dɩ kɔŋ takɩɛ Yesu na wʋ kpalɛnara wɩɛ Lewi waa dʋɔ baa di, na lampo lɩɛra* na dɩsʋbʋ yɩɛra fɔɩ kpi ba dʋɔ baa di. Dɩmʋŋ bakpa bana fɔɩ n cha ba kpamɩna Yesu. 16 Gʋ Mosesi mbara bakalaasa baa ba barɛ yɩɛ Farasitina na Yesu na dɩsʋbʋ yɩɛra na lampo lɩɛra a di na, ba tasɛ wʋ kpalɛnara baa sɛ, <<Be n yɩɛ sɛ Yesu na lampo lɩɛra na dɩsʋbʋ yɩɛra a di?>>

17 Gʋ Yesu nyii ŋina na wʋ lɩsɛ ba nʋɔ sɛ, <<Alaŋfiyatina n tiri lʋm chʋɔrɛ ɛ, amʋɔ lʋmɩɛtina. Ma n kɔŋ maa gaa yagɛ bachirigisa a, ama dɩsʋbʋ yɩɛra.>>

18 Gʋ Yohane Ɩsʋɔ Sɔrɛ kpalɛnara na Farasitina a chaŋ nʋɔ pɔgʋ na, bakpa barɛ kɔŋ gaa tasɛ Yesu sɛ, <<Be dʋɔ sɛ Yohane kpalɛnara na Farasitina kpalɛnara a chaŋ nʋɔ pɔgʋ, sɛ n kpalɛnara bɩrɛ baa chaŋ nʋɔ pɔgʋ?>>

19 Sɛ Yesu lɩsɛ ba nʋɔ sɛ, <<alʋfɔlɛ baalɛ wʋŋ mʋɔrɛ a chaŋ nʋɔ pɔgʋ yela wʋ wɩɛ ba jaŋ? Aye, gʋ wʋ wɩɛ ba jaŋ n na bɩrɛ, baa chaŋ nʋɔ pɔgʋ ʋ. 20 Ama saŋa gʋrʋ aja kɔŋ baa mʋ alʋfɔlɛ baalɛ wʋŋ lɩɩ ba jaŋ, saŋa gana sɛ baa chaŋ nʋɔ pɔgʋ.

21 <<Wʋrʋ baa mʋ dukuru fɔlɛ wʋ a tarɛ gabɩnɛ naŋ ŋ. Sɛ wʋ yɩɛ dɩmʋŋ na, gafɔlɛ gaa aja kparagi gabɩnɛ gaa na bʋɔ gaa a yɩɛ gajanɛ. 22 Dɩmʋŋ sɛ wʋrʋ baa chɩɛgɩ wayɩŋ sʋlʋŋ fɔlɛ wʋ a dʋ kpalɛ gabɩnɛ naŋ ŋ. Sɛ wʋ yɩɛ dɩmʋŋ na, sʋlʋŋ ŋii aja sagɛ kpalɛ gaa na gaa warɩɛ na sʋlʋŋ ŋii a chɩɛgɩ tʋsʋ. Dɩmʋŋ dʋɔ ŋɩ tiri gʋ ba n chɩɛgɩ wayɩŋ sʋlʋŋ fɔlɛ dʋ kpalɛ gafɔlɛ naŋ.>>

23 Fɩɛsɛ wɩɩ garɛ, Yesu na wʋ kpalɛnara baa dɔŋ kiliŋgbe fʋɔ garɛ naŋ. Sɛ wʋ kpalɛnara baa fara baa jaɩ kiliŋgbe ŋii ŋarɛ baa tawʋ. 24 Sɛ Farasitina baa barɛ tasɛ Yesu sɛ, <<Kɩɛ, be dʋɔ sɛ n kpalɛnara baa a yɩɛ ŋii daa mbara n fa gbɩɛ sɛ dɩ n yɩɛ Fɩɛsɛ wɩɩ?>>

25 Sɛ Yesu tasɛ ba sɛ, <<Ɩŋ karaŋ Ɩsʋɔ wɩɛ ŋii naŋ ŋii Dawidi yɩɛ saŋa gaa dusoŋ a kʋ wʋ na wʋ dɔŋa sɛ baa ja adiya baa di naa? 26 Dawidi ju Ɩsʋɔ tʋm danɛ gaa naŋ saŋa gaa Abiyata yɩɛ Ɩsʋɔ sei bɩnɩɛ naŋ bɩnɛ. Wʋ ju Ɩsʋɔ tʋm danɛ naŋ ga tawʋ bodobodo gaa ba yɩɛ ga chɩrɩchɩrɩ fa Ɩsʋɔ yela Mosesi mbara n fa gbɩɛ sɛ ba n tawʋ ʋ, amʋɔ Ɩsʋɔ seina nyiŋeŋ. Sɛ wʋ mʋ ŋarɛ fa wʋ dɔŋa na.>>

27 Sɛ Yesu tawɩ ba sɛ, <<Bakpa dʋɔ sɛ Ɩsʋɔ yɩɛ Fɩɛsɛ wɩɩ. Naa Fɩɛsɛ wɩɩ dʋɔ sɛ wʋ yɩɛ bakpa a 28 Dɩmʋŋ dʋɔ, Wʋkpa Bu wʋŋ yɩɛ Kpaŋjuo Fɩɛsɛ wɩɩ dʋɔ bɛ.>>